Isanquienare Mateo 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Irosati yora Eroreshi iquemacotaqueri Jesoshi. Yora Eroreshi ipincatsariventajeitiri maaroni carireasati.

²Icantajeitiri ishanincapee: —Irioyeata Joa Jesoshitajantsiri. Noacantavetacari, iro cantaincha aamaashiteari tinaanajaitatsi ini, irootaque imatantarori itasoncantayeti.

³Ari chapinqui yora Eroreshi yaapitsataqueri irirenti Jeripe ijina, opajita Eroriashi. Yora Joa icantavetacari: “Te oncameetsateji paapitsateri pirenti ijina”. Irosati yaacantantacari, yoiminqueacantaqueri. Yoisoyeetaqueri carenatsaqui.

⁵Ari icoavetaca iroacantitearime, iro cantaincha oshequi ipincatsajeitaqueri atiri Joa, iojeitiri iquenquetsatacotiri Tasorentsi. Ijivetaca Eroreshi: “Ariorica noacanteri, inquisacojeitanaqueari atiripee”.

⁶Impoiji omoncarataca quitaiteri itimantacari peerani Eroreshi. Yapatojeitaqueri oshequi ishaninca, iquimoshireimentajeitacari. Aisati omaninquetacotimentaqueri oshinto Eroriashi. Oshequi ineacameetsataquero,

⁷irootaque icantantarori: —Paitarica pincoacotaquenari, aitaque nompaquempiro. Ioti Tasorentsi eiro namatavitimpitsi.

⁸Ocantiro iniro: —Pincanteri iroacanteri Joa. Irosati ocantantariri: —Nocoaque poacanteri Joa, impoiji pimpacotenaro matitaqui iitoni, iotanteari ina queario icamasanotaque.

⁹Ari yoashiretanaca Eroreshi. Te incoaveteaji, iro cantaincha iquemajeitaqueri maaroni ishaninca icantaquerori irishintotsori.

¹⁰Irootaque ipesacantantacariri Joa.

¹¹Impoiji yameetaquenero matitaqui iito Joani. Aavaquero, aanaquenero iniro.

¹²Irinti iroamereni yaajeitanaqueri, itijaitiri. Impoiji ijajeitanaque, icamantapaaqueri Jesoshi: —Yoyeetaqueriyea Joa.

¹³Iquemantacari Jesoshi icamaque Joa, ijatanaque apaniro anta tenta intimeji atiri. Itentajeitanaquena, iro noquenajeitantanacari pitotsi. Iro cantaincha iquemacojeitaqueri atiripee, iponeayetanaca nampitsipeequi, ishiteajeitanaca, yoijajeitanaquena.

¹⁴Ari naatacojeitapaaque, noneajeitapaaqueri oshequi apatojeitainchari. Oshequi icavintsaajeitapaaqueri, yoavisacojeitaqueri mantsiaripee.

¹⁵Ari ishaavijitanaque catsirincaiteri. Nocarajeitaqueri pashini iroamere, nocantajeivetacari: —Pamene, caraiteitaque aca, aisati ishaavijiteanaque catsirincaiteri. Pintiancajeiteri yocapee irijajeite nampitsipeequi iramanantajeite iroyeari.

¹⁶Yacanaquena: —¿Paita irantsipetashitanteari irijate? Jentsite, pimpajeiteri avirori iroajeiteari.

¹⁷Nocantajeitaqueri: —Te ontimeji nompajeiteriri. Jero oca ocarataque tanta apapacoroni. Jerica aisati apite shima.

¹⁸Icantaquena: —Pamaquenaro. Ari nopaqueri.

¹⁹Impoiji icantajeitaqueri: —Pisavicajeite saveshishiqui. Ari isavicajeitanaque. Impoiji yaavaquero tanta aisati shima. Ari yamenanaque jenoqui, icantiri iriri: —Irove, Apa, pipaquenaro oca noyearica. Impoiji icarajaquero, ipaquenaro. Novaajeitaqueneri yora apatojeitainchari.

²⁰Yoajeitacaro maaroni, iquemajeitanaca. Impoiji napatojeitajiro timaarantapaajantsiri, nojaayetajiro cantiriqui, ocarataque 12.

²¹Naamaaca ari icarajeiti yora oajeitacarori 5,000 shirampari, aisati tsinanepee, jeri aisati jananequipee.

²²Impoiji icantajeitaquena: —Noamerepee, pintejeitanajea pitotsiqui, pijivajeitanajena intatiquero. Impoiji aisati icantajeitaqueri apatojeitainchari: —Pijajeitanaje pivancopeequi.

²³Impoiji ijatanaque apaniro toncaariqui, iquenquetsatacairi iriri. Ari otsitenitanaque, itimi apaniro iriori anta.

²⁴Narojeiquea nainti, noquenacojeitanaque nianquijaqui. Antearo omotoncane, aisati oipiacotajana tampea.

²⁵Irotajantsi onquitaitetaje noneajeitavaqueri, yaniijatapaaquero incajare, te intsitiaquiteji. Te niojeitavajeriji,

²⁶irootaque notsaroacaajeitantacariri, nocajemajeitanaque: —Jeee. Coraqueve camaarira. Oshequi notsaroacaajeitacari.

²⁷Iro cantaincha icantajeitapaajana: —Narotaque pocajantsi, piveshireimentajeitavajena, eiro pitsaroacaajeitanatsi.

²⁸Ari icantiri Petero: —Avirorica novincatsarite, pincajemena naniijatashitanajempi nijaqui.

²⁹Ari icantiri: —Caatequeti. Irosati imitajantanaca, yaniijatanaque anta Jesoshiqui.

³⁰Iro cantaincha impoiji iquenqueshiretaquero tampea, aisati itsaroanaque. Ineavaitia itsitianaque, icajemanaque: —Novincatsarite, paavajena.

³¹Irosati yacotashitantavajari, yaavajiri. Icantiri: —Capichaji pishiretaquena, ¿paita pitseencantanari?

³²Ari itetanajaro pitotsi, irosati opeantanaja tampea.

³³Oshequi nopincatsajeitaqueri, nocantajeitaqueri: —Queariotaqueteemi, aviro Itomi Tasorentsi.

³⁴Ari nomonteajeitanaja, nareejeitapaaja Jenesaretequi.

³⁵Yora savicajeitatsiri iojeitavaqueri Jesoshi, itiancajeitaqueri ishaninca, yamacantajeitaqueri mantsiayetatsiri.

³⁶Ari yantitapaaqueri iitsaare ocaratapai. Yavisacojeitanaji maaroni antitajeitaqueriri.