Mataio 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹Ta nam ra kilala Erodes ra luluai i valongore ra tinata ure Iesu,

²ma i tatike tai kana umana tultul: Go Ioanes ra Tena Baptaiso, i tar laun mulai kan ra minat, ma damana go ra lavur dekdek tana.

³Tago Erodes i tar kinim pa Ioanes ma i tar vi ia, ma i tar varuk ia ta ra pal na banubat ure Erodia, a taulai kai turana Pilipo.

⁴Tago Ioanes i ga biti tana ba: Pa i ko ba una ben ia.

⁵Ba Erodes i ga mainge na doko Ioanes, i burutue ra kor na tarai, tago dia ga kapupi ia ba ia ra propet.

⁶Ta ra bung ba di nuk uraure pa nam ra bung di ga kava Erodes tana, a vavina, natu i Erodia, i malagene pire diat, ma i vagugu Erodes.

⁷Ma i vatading ia ma ra vavalima ba na tabar ia ma ra magit ba na vatang upi ia.

⁸Ma i tatike ra tinata nana i tovo value me, dari: Una tul tar ra lor i Ioanes ra Tena Baptaiso tagu ta ra la.

⁹Ma ra king i tabun ra balana tana; ma tago kana vavalima, ma tago diat bula dia ki me ta ra nian, i kure tar ia ka;

¹⁰i vartuluai upi ia, ma di kutu ra inoa i Ioanes ta ra pal na banubat.

¹¹Ma di kap ra lorina ta ra la ma di tul tar ia tai ra vavina, ma i kap ia tadav nana.

¹²Ma kana tarai na vartovo dia pot, ma dia puak pa ra tomono ma dia punang ia, ma dia vana ma dia ve Iesu.

¹³Ba Iesu i valongore, i vana kan nam ra gunan ta ra mon ta ra pakana pui irai, ma ba ra kor na tarai dia valongore dia val mur ia kan ra lavur pia na pal.

¹⁴Ba i irop ma i gire ra ngala na kor na tarai, i mari muka diat, ma i valagar pa kadia lavur minait.

¹⁵Ba i tar talvivi kana tarai na vartovo dia tadav ia, dia biti: Go a pui, ma i tar bolo ra pakana bung, una tulue go ra kor upi diat a vana ta ra gunagunan, diat a kukul adiat.

¹⁶Iesu i biti ta diat: Diat a vana upi ra ava? Avat a tabar diat.

¹⁷Ma dia biti tana: A ilima ka ra gem ma ra ivut uka ra en ave vung ia.

¹⁸Ma i biti: Avat a kap ia tadav iau.

¹⁹Ma i tulue ra kor na tarai ba diat a ki ra vura, ma i vatur ra ilima na gem ma ra ivu en, ma i tadarake ra bakut, ma i lotu pa ure, ma i tabik tar ra gem tai kana tarai na vartovo, ma dia tabar ra kor na tarai me.

²⁰Dia tar ian par tana ma dia tar maur, ma dia vangan vabuka ra vinun ma ra ivu rat ma ra tagigina dia tar ian valili ia.

²¹A ilima na arip na marmar na tarai dia ga ian ma ra vaden ma ra umana bul bula.

²²Ma i vovo lolole vue kana tarai na vartovo ta ra mon upi diat a lua ura ta ra papar, ma pi ia iat na tulue ra tarai.

²³Ba i tar tulue ra kor na tarai i tutua urama ra luana upi na araring irai papa; ba i tar talvivi i kiki varkolono.

²⁴A mon i vanavana ara na ta iat ma ra bobol i tup ia, ma ra vuvu i tur maro lua.

²⁵Ta ra ivat na pakana varkia na monamono ra marum Iesu i vana ra ul a tava kikil tadav diat.

²⁶Ba ra tarai na vartovo dia gire i vana ra ul a tava, dia purpuruan, dia tatike: Go a ninana ka, ma dia kukula ma ra bunurut.

²⁷Iesu i tatike lulut ta diat dari: Avat a nurnur, iau kaka go, koko avat a burut.

²⁸Petero i biti tana: Luluai, ba u nam, una tul tar iau ba ina vana tadav u ta ra ul a tava.

²⁹Ma i biti: Una mai. Petero i irop ta ra mon ma i vana ra ul a tava upi na vana tadav Iesu.

³⁰Ba i gire ra vuvu, i ururian, ma ba i to na dudu, i oro dari: Luluai, una valaun iau.

³¹Iesu i tulue vuavue ra limana, i vatur vake, ma i biti: I ikikilik kaum nurnur: u ururian ta ra ava?

³²Ba dir koa ta ra mon, a vuvu i par.

³³Ma diat dia ki ra mon, dia lotu tadav ia, ma dia biti tana: A dovotina, u Natu i God.

³⁴Dia pukai ta ra papar a tava kikil ta ra gunan Genesaret.

³⁵Ba ra tarai ta nam ra gunan dia gire ilam ia, dia vartuluai ta ra lavur gunagunan vurvurbit upi ra lavur minait, dia kap diat tadav ia;

³⁶ma dia lul ia ba diat a bili kana ngu na mal; ma diat par dia bili ia, dia lagar muka tana.