Matoosa 14

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

¹He wode Galila dere haariza Herdoosi asay Yesusa nashizayssa siydes.

²Herdoosi ba ashkaratas “Hessa gidikko, Xammaqiza Yohannisi hayqoppe dendidi yides guussakka! Hayssi wuri gita malatay iza kushen oosettizay hessassa” gides.

³Herdoosi ba isha Piliphoosa macho Herodiyadi gaason Yohannisa oythidi qasho keeththan yeggides.

⁴Gaasoyka Yohannisi Herdoosa “Ne izo ekkana mala woga gidenna gida gishassa” gides.

⁵Herdoosikka Yohannisa wodhanas koyishin asay Yohannisa nabe mala xeelliza gish babbides.

⁶Herdoosi ba yeletetha gallas Herodiyadi naya yethan iza ufayssida gish naya iza oychidaz ubba immanas izis caaqides.

⁸Nayakka aayey zoren “Xammaqiza Yohannisa hu7e keren wothada ha7i hannin taas imma” gadus.

⁹He wode kawozi izas mishettides. Gido attin caaqida gishshinne izara diza imathata gish giidi nay oyshoy polettana mala azazides.

¹⁰Kiittidinne Yohannisa woyne keeththan dishin qoodhe qanxisides.

¹¹Qanxetida hu7eza keren woththidi nays immida. Nayakka ekkada ba aayeys immadus.

¹²Yohannisa kaallizayti iza aha ekkidi moogidinne hanidayssa ubba Yesusas yootida.

¹³Hessa siyida mala Yesusi kase ba dizaso aggidinne wogolon gelidi barka hara asi bayndaso bides. Dereyka hessa siydi katamay dizasoppe tohora iza kaallides.

¹⁴Yesusikka wogolozappe wodhdhishe daro asa beyidi asas mishettides. Saketizaytaka pathides.

¹⁵Gadey qammi qammi bizayssa beyidi iza kaallizayti izakko shiiqidi “Hayssi nu dizasoy bazzo; gadeyka qammi qammi biza gish gede gutatan gutatan biidi baasi maanaz shammana mala asaa yedda” gida.

¹⁶Gido attin Yesusikka ista “Inte asas maanaz immite attin asay baanas koshshenna” gides.

¹⁷Istika izas zaaridi “Hayssan nuus ichashu ukethinne nam7u moleppe attin haray baawa” gida.

¹⁸Izikka ista “Ane heyta dizayta haa taas ekki yiite” gides.

¹⁹Qasseka asay maata bolla uttana mala azazides. Ichashu ukethanne nam7u moleta ba kushen oykkidi ba ayfe pude salo dhoqu histi galatidi, uketha menthi bana kaallizaytas immides. Istika asaas immida.

²⁰Asay wurikka miidi kallides. Hessafe guye iza kaallizayti asaappe mishin attidayssa tammanne nam7u leemate kumeth shiishida.

²¹Mida asay macasattinne guutha nayti gujettonta attumasay xalala ichashu shi gidana.

²²Heerakka iza kaallizayti wogolon gelidi gede pinth izappe kasetidi pinana mala azazidi asa moyzanas baassi guye attides.

²³Dereza moyzidappe guye woossa woossanas barka zuma bolla kezides. Gadey dhuminka yaan zuma bolla barka dees.

²⁴Hessa wode wogoloya abba kantha bishin dambalay dendidi daro metotho oykkides.

²⁵Qamappe koyro kuttoy baqqishin Yesusi abba bollara hamutidi iza kaallizayti dizaso yides.

²⁶Yesusa kaallizaytikka izi abba bollara hamuti yishin beyi babbida gish iza moytile giidinne waassida.

²⁷Yesusi heerakka “Aykkoy ba! Tanakko; babbofte!” gides.

²⁸Phexroosi “Godo! Nena gidikko ta abba bollara hamutada neekko baana mala tana azaza” gides.

²⁹Yesusi iza “Haaya!” gides. Phexroosikka wogolozappe wodhdhidi haaththa bollara hamutidi Yesusakko yides.

³⁰Gido attin carkoza wolqa biyidi babbida gish haaththan miteteth oykkidi “Godo! Tana ashsha!” gi waassides.

³¹Yesusi heerakka ba kushe yeddi oykkidi “Neno, ammanoy paccidaysso! Aazas sidhadii?” gides.

³²Yesusinne Phexroosi wogolozan gelida mala carkoy sirph gides.

³³Hessafe guye wogolon dizayti “Neni tumu Xoossa Naa!” giidi izas goynnida.

³⁴Yesusinne iza kaallizayti abba pinnidi Gensereexe geetettizaso gakkida.

³⁵Heen dizayti Yesusa gididayssa eridi, he heeran yuuyi aadhdhanas diza asaas kiita yeddida. Asaykka harganchata ubba Yesusakko ehides.

³⁶Harganchati iza afala xeera xalala bochchana mala Yesusa woossida. Bochchidayti wurikka paxida.