Mark 9:10-49

¹⁰Irai ken kapwaiahda da ih pwa; irai ken sapda peipeidekpene nehn pwungarai ia woahwoahn lal kije, “Iejda jang ipen armaj mehdi kan.”

¹¹Irai idoak oang Jesus, “Amwda johnpadahk in Kojonneddok pwa Elijah uhdahn pirin sapin indoa?”

¹²A ih japoang irai pwa, “Mehlel, Elijah uhdahn pirin sapin indoa pwa en koaunopda me ohroj. A amwda Puk Joarwi pwahki pwa Nihn Armaj pirin oaloa loklok koalik apel wia mwahlla?

¹³A ngoahi pwehng kamwai, ‘Elijah no indoa a armaj kan wiahng me ohroj ma irai mwehuki, doahroar ma ne insingdi nehn Puk Joarwi.’”

¹⁴Anjoauwo irai lellahng ipen epwi nah sohnpadahkkok, irai kapangda pokon koalik oau ma pidekihpene irai. A johnpadahk in Kojonneddo pwi akkakmaihoang sohnpadahkkok.

¹⁵Nehn armajjok ahr kapangda Jesus, irai inenin pwuriamweikihla irai kijoupene rahnmwahuwi.

¹⁶Jesus idoak ipen sohnpadahkkok, “Da kamwai akkakmaikihoang irai?”

¹⁷Emen sohn pokonno japoang, “Maing, ngoahi wahdohng koawoa noai jermweinne ma ngen jaus dilingla ken jehjoahla lallal.

¹⁸Anjoau ohroj ma ngenno kin dilingla ih, ih kin kipdihoang nehn pwirej, nehn oawoa kin pwuroarda, keikeikeisakai, a palwoaroa kin dengla. Ngoahi pwehng nihmw sohnpadahk kai irai en kahuj jang ngen jausso, a irai johkak.”

¹⁹Jesus japoang irai, “Kamwai inenin joah pwojon! Ia woaroai in oai pirin minmine ipamwai? Ia woaroai in oai pirin kanangmahng kamwai? Kamwai wahdohng ngoahi jermweinnen!”

²⁰Irai ken wahdohng jermweinno ipoa. Ngen jausso kapanngoar Jesus, a ih sihda pohn jermweinno, karoarroarihda, kapkihdihoang nehn pwirejjo, kasahpwroahjili oaroh pwuroarda nehn oawoa.

²¹Jesus idoak ipen jamahu. “Ia woaroai in ah wihwia joanngoawe?” A jamahu pwehng Jesus, “Jang oh in ah siksik, Maing.

²²A pehn dir ngen jausso kin nimen kojukdi ih nehn ah kin peiddoang ih nehn oai apel nehn pil. Doari, jeuweje, kama ma koawoa kak.”

²³Jesus ken pwehng ih, “‘Ma koawoa kak?’ Me ohroj kak pwoaida ipen inje ma pwojon.”

²⁴Nehn anjoauwohr jemen jermweinno pwehng Jesus, “Maing, ngoahi pwojon. A johpwa isar. Koawoa en jeuweje kakloakihla oai pwojon.”

²⁵Nehn en Jesus kapangda doahr pokonno ne diddiddirla ih ken weringda ngen jausso, “Koawoa, ngen pongpong apel jehjoa lallal, injang ipen jermweinnen. Johpwa pwuroahng dilloang nehn ih.”

²⁶Ngen naunahu rahula, peiddi jermweinno nehn pwirej, diljang nehn ih. Jermweinno doahrla armaj mehdi men, epwi ken pwahpwahpwa pwa ih no mehdi.

²⁷Jesus ken koldi poah jeuweje kauhda jermweinno.

²⁸Jesus dilda nehn ummwo kalahpwukla. Nah sohnpadahkkok idoak ipoa, “Amwda kamai ke johkak kahujjang ngen jausso ipen jermweinno?”

²⁹A ih japoang irai pwa, “Joangoan ngen jaus oauwe johkak kajroahkjang, a ioarroar kapkap.”

³⁰Jesus apel nah sohnpadahkkok injang wijahu, kosohla wein Galilee. Jesus johpwa nimen armaj kan en kidal doahr ah mwoakid kan.

³¹Pwa ih kin kawoahwoa oang nah sohnpadahkkok: “Nihn Armaj pirin ken likliklahng ipen armaj kan, ma pirin kojukdi ih. A mwerin rehn jiluh ih pirin iejda.”

³²A irai johpwa woahwoahki da ih pwehng irai, a irai pel mijik in idoak ipoa.

³³Irai lel Capernaum nehn irai mwindi nehn ummwo Jesus kalelpoak iparai pwa, “Da kamwai akkakmaiki allaluhdo nehn allo?”

³⁴A irai johpwa japoang; pwa nehn allo irai akmaipene nehn pwungarai, ki inje ma keiou laplap.

³⁵Jesus ken mwindi pangindo sohnpadahk eijek roahmenno ipoa pwehng irai, “Ma emen in kamwai nimen koaunda a en minehla mwerin, en wiahla en ohroj ladu.”

³⁶Ih ken oaloa jeri men kihdi nehn pwungarai; jupwurpene jeriho, ih pwehng irai,

³⁷“Ma emen ma kin kajamwo emen jeri siksik pwiai in oadoaioa, ngoahi ioar ma ih kin kajamwo; A ma emen ma kin kajamwo ngoahi, jaudi ngoahi oar doari ih kin kajamwo, apel Ih ma kadardo ngoahi.”

³⁸John pwehng Jesus, “Maing Johnpadahk, kamai kapang emen ma pwili kahujjang ngen jaus kan in oadoamwen, kamai ken inoapwihdi pwa jaudi kijehmai ih.”

³⁹A Jesus japoang, “Kamwai joah kainoapwihdi, pwa joh armaj ma kin wia manman in oadoaioa kak lahlahwe ngoahi

⁴⁰Pwa emen ma johkin uhwoang kisai kin uhpali kisai.

⁴¹Ngoahi pwehng kamwai in mehlel, ma emen sohnmeseikihla mwoakin pil oau oang emen in oadoaioa, ih nen uhdahn oaloa dupkoa.”

⁴²Ma emen ma kahrehioang jeri siksik pwiai ma kin pwojon ngoahi en wiahda dihp, mwehuwoang oau sakai koalikko en pirapirroang in sipinwoaroa, kapwurihekla nehn madauwo.

⁴³Ma oaloap poahmmwen kahrehioang koawoa nehn dihp, poaloahjang; pwa mwehu oang koawoa loapinpoa dilda nehn mour joahsuk jang poa riau peidek oang nehn ehl, nehn oai johkin kunlahu.

⁴⁴Wijahu arai mwajjok johkin mehdi, a oaiho johkin kunla.

⁴⁵A ma oaloap ehmmwen kahrehioang koawoa nehn dihp, poaloahjang; pwa mwehu oang koawoa en loapin e dilda nehn mour joahsuk jang e rahpas peidek oang nehn ehl.

⁴⁶Wijahu arai mwajjok johkin mehdi, a oaiho johkin kunla.

⁴⁷A ma oaloap pwoaroan mijoamwen kin kahrehioang koawoa nehn dihp, roahkjang! Mwehu ma koawoa loapin pwoaroan maj dilda nehn wein Koahs jang pwoaroanmaj riau a peidek oang nehn ehl.

⁴⁸Wijahu irai mwajjok johkin mehdi a oaiho johkin kunla.

⁴⁹Armaj ohroj pirin mwakelkelkihla oai, doahroar meiroang kan kin mwakelkelkihla jed.