Mareko 9:10-49

¹⁰Teina riba ta abo se nuatudidini, se nuatudadaasaeai, si ene, Mate eai torouiomana aisana?

¹¹Isi se hesiolau ia arinai si ene, “Paana saha tauuriuri tataodi si ene, Elia taba ie lage baguna?”

¹²Ia i heuio i ribalau isi aridi eai, i ene, “Mamohoi Elia i lage bagunama, ia abi gamagamagaridi abo i heharihariudi; hinage edoha se uriwatai, Tau Natuna amamna gamagamagaridi abo i hearodi, eo ia abo se isuewaei?

¹³Na, ea heribamiu ta Elia mamohoi i laomao, isi edi gadosisi ia arinai se abidio, doha hinage ia enana se urimaodai.”

¹⁴Ia ie uioma ena heaheatayao aridi eai, moutuadi lailai i itadi se toro hetahetaiiridi, eo tauuriuri tataodi se hesihesiolau aridi eai.

¹⁵Moutuana wa ia se ita, isi aruadi se loi, se aitautau ia arinai, ia se lautoiei.

¹⁶Ia ie hesiolau tauuriuri tataodi aridi eai i ene, “Saha au oiribaei isi aridi eai?”

¹⁷Moutuadi ne tauna esau ia i heuio, i ene, “Tau Heaheata e, natugu ea woeaiama oa arim eai, earua auaurea ia arinai;

¹⁸ia se basaalaalatei: awana i gosagosapuro, eo moana i taburuiahisi, ia tauna i eagayaga: ea ribalau em heaheatayao aridi eai bena se aiduiei, isi nige abina se ata.”

¹⁹Iesu ia i heuio, i ene, “Kapore! sunuma gagiri isina ta, eau arimiu eai miamiagu, i lau e, aitea huia? Ea healapaipaimiu, i lau e aitea huia? Ia au woeaiama arigu eai.”

²⁰Ia abo se woeaiama ia arinai: ia Iesu i italaei ina earua ta gama wa ie basaalaalatei, ie guri dobi tano eai, ie boroborousi, awana i gosagosasapuro.

²¹Iesu i hesiolau ia tamana arinai, i ene, “Auiana teina asiebo ta ie tubu ia arinai?” I ene “Ma gagirina eai.

²²Huia gamagari ia se gabaei oeagi boeana eai, eo goila eai hinage, bena abo ie mate wa; ena abina u ata u nuatoatoaimai, u saguimai.”

²³Iesu ie ribalau ia arinai, i ene, “Taba u awamamohoiei: tau taba i awamamohoiei ginauri gamagaridi abidi i atao.”

²⁴Gama ne tamana i eogalau ma matasuruna, i ene, “Guiau e, ea awamamohoiei: egu awamamohoi mo i beruberu arinai u saguigu.”

²⁵Iesu moutuadi i itadi se aitautauma, earua bii ne i aiduiei, i ene, “Oa earua auaureana ta, eo doodoona, ea heribam ta u lau murimuri eai, tabu u luuio ia boeana eai.”

²⁶Earua wa abo ie eoga, gama wa i basaalaalatei abo ie lau murimuri eai: merumeruna wa doha tau matematena, moutuana wa si ene, “I mate aririo.”

²⁷Na, Iesu i abilau ia nimana eai, i abihetoro; ia abo i toro.

²⁸Ia i awasaema numa alona eai, ena heaheatayao se oimuri modigau ia arinai, si ene, “Paana saha ai aiduiena nige abina aie ata?”

²⁹Ia ie ribalau isi aridi eai, i ene, “Demoni ina doha nige se pesa gaibu murimuri eai, uura, eo aiudi aridi eai mo.”

³⁰Nei dimona ne abo se laugabaei, Galilaia eai se baeyawa; ia nige i henua ena lau bena tau esau i nuatui.

³¹Ia ena heaheatayao i heatadi, ie ribalau isi aridi eai, i ene, “Tau Natuna ia abo se mosei tatao nimadi eai, ia bena abo se unuhemate; se unuiyao, abotai abo i torouio asubena hehaionana eai.”

³²Teina riba ta se hekau, ia bena se oimuriei, na se matausi.

³³Ia ie lage Kaperenauma eai, numa alona eai ia i hesiolau isi aridi eai, i ene. “Omi saha au haiawayagaraei dobila eai?”

³⁴Isi nige arinadi; isibom dobila eai se haiawayagara wa, eai isi aridi eai abo edi bada ede.

³⁵Ia ie bawa, saudoudoi‐labui i eogaidi; ie ribalau isi aridi eai, i ene, “Tau esau i henua bena i baguna, ia abo i murimurita, eo isi gamagaridi edi heaheari eai i lau.”

³⁶Iesu merumeru gagirina esau ie abi, i torelaei duaduaridi eai: abo i labasi, i ribalau aridi eai,

³⁷i ene, “Ia merumeru gagirina ina doha i oiami eau esagu eai, ia i oiamigu hinage: tauoiamiguma nige eaubom i oiamigu, ia hinage Tauhetamariguma wa ie oiami.”

³⁸Ioane i heuio ia arinai, i ene, “Tanuagagu e, tau esau aie ita oa esam eai demoni ie aiduiedi; ia nige ie lauwataida; ia ai ribagigiri paana ia nige ie lauwataida.”

³⁹Iesu i ene, “Ia tabu au ribagigiri: tau esau taba gigibori ta i laulauei eau esagu eai, taba nige i ribahebaaeagu.

⁴⁰Ena ia nige ie hetataguduguduida ita enada meta.

⁴¹Ena esau, esau, goila nomnom biana esau i leawa eau esagu eai, paana oa Keriso enana; ea ribalaowa omi arimiu eai, mamohoi, ia maisana taba nige i deha.

⁴²“Ena esau, esau, merumeru gagirina esau eau awagu tauabina i heguri, i lolo taba we’u lailai ia gadona eai se au, abo se tudobei gabogabo eai.

⁴³Eo ena nimam i hegurim, u tomgabaei; i lolo nimam esega, mauri abo u abi, ena nimam labui masigiri boeana eai ue lage oeagi alaalasina boeana eai nige nosina.

⁴⁴Nei dimona ne motamota nige se mate, eo oeagi nige se oiheboso.

⁴⁵Ena aem i hegurim, u tomgabaei: i lolo aem ie motu abo mauri u abi, ena aem labui masigiri boeana eai se tudobem oeagi nige ie boso boeana eai;

⁴⁶nei dimona ne motamota nige se mate, eo oeagi se oiheboso.

⁴⁷Ena matam i hegurim, u lamohai: i lolo matam esega Eaubada ena basileia eai u lage, matam labui oa abo se gabadobem oeagi nige se boso boeana eai:

⁴⁸nei dimona ne motamota nige se mate, eo oeagi nige se oiheboso.

⁴⁹Gamagarimiu abo se hearitamiu oeagi alaalasina eai.