Markus 9:10-49

¹⁰Ala toꞌu lahele Yesus hala hehelun ndia, de taa lafada hataholi la. Tehuu telu sala latatane aok lae, “Ndia maksud hata, de nae Ana nau ‘nasoda fali neme Ndia mamaten mai’ ndia? Sosoan nae leobee ndia? Talobee ia bae?”

¹¹Boe ma latanen lae, “Mese anggama la lae, ‘Baꞌi Elia musi mai nahahuluk, bei fo Karistus mai.’ Tehuu tungga Ama, na leobee?”

¹²Yesus nataa nae, “Memak tetebes, Baꞌi Elia mai nakahuluk fo sadia dalak fee Karistus, huu Hataholi ndia fo Manetualain tudu mema kana so neme makahulun mai. Tehuu talobee? Ei bei taa bubuluk hata fo ala sula kana nai Manetualain Susula Malalaon, laꞌeneu Hataholi Isi-iisik ndia, hetu? Huu ala sulak memak, lae, dei fo mete ma Ana mai so, na, hataholi la tao lakatotoꞌa kana, losa ala tao lisa Ndia.

¹³Tehuu ei musi pasak neulalau ndiꞌidook baa! Baꞌi Elia ndia memak ana mai so. Tehuu hataholi la tao lakatotoꞌa kana, tungga sila hihiin. Ndia boe nandaa no hata fo baꞌi-baꞌi la sulak mema kana so neme makahulun mai.”

¹⁴Leꞌdoeik Yesus no ana mana tungga katelu nala sila latonggo falik lo ana mana tungga feꞌe nala, boe ma ala lita hataholi noꞌu kala lakabubua. Hataholi la sila ala mai lita Yesus ana mana tungga feꞌe nala lasisimbo bafak lo mese anggama la.

¹⁵Ledoeik hataholi noꞌu kala sila lita Yesus, de, ala nggengge, huu lae hetuk Yesus bei nai letek lain. Boe ma lalai leu latonggo lon.

¹⁶Boe ma Yesus natane sala nae, “Ei masisimbo bafak hata nai ia?”

¹⁷Boe ma hataholi esa ana mai de, nae, “Ama, mamanene dei! Au ua au ana touanang mai, fo Ama tao mahai ndia dei. Ana taa bisa kokolak, huu nitu manggalauk nalan.

¹⁸Mete ma nitu ndia nala kakanak ndia dalek, na ana babala kakanak ia neu dae. Basa ndia, na, kakanak bafan nafufude, ma ana henggu nisin. Boe ma aon nakambii sama leo ai. Au oke Ama ana mana tungga nala fo ala husi heni nitu ndia. Tehuu ala taa bisa hata esa boe.”

¹⁹Namanene leondia boe ma Yesus mboka sala nae, “Wei! Ei ia ana seli maa! Au anoli ei taa-taa so, tehuu ei taa bubuluk neulalau. Ma ei taa mamahele tebe-tebe neu Au! De Au musi nggaleloak neu ei losa fai hida? Mia kakanak ndia neni ia mai!”

²⁰Boe ma ala koꞌo loo kakanak ndia neni Yesus neu. Tehuu ledoeik nitu nita Yesus, boe ma ana bala nabuu kakanak ndia lololi neu dae, losa bafan fufude kala.

²¹Basa boe ma Yesus natane kakanak aman nae, “O anam dadi tao leoiak ia, neme fai hidak mai?” Boe ma aman nataa nae, “Neme kadiꞌi anan mai so.

²²Nitu ndia sangga nae tao nisa kakanak ia dook ia so. Ana tao natuda taa-taa au anang neni haꞌi dale neu, ma nabolon neni oe dale neu. De Ama fali malan dei! Mete ma bisa, na, kasian ai, fo mahai kakanak ia dei.”

²³Yesus nataa nae, “Tehuu hatina de o mae, ‘mete ma bisa’? Memak Au bisa tao ala basa-basan, tehuu sadi hataholi namahele dei!”

²⁴Basa ndia, boe ma toulasik ndia nataa ma hihii namatani nae, “Ama! Memak au amahele so. De fali mala au, fo au namaheheleng boe natea bali!”

²⁵Ledoeik ndia, Yesus nita hataholi noꞌuk mai lakaseseti lai ndia. Basa boe ma Ana palenda nitu ndia nae, “Heeh! Nitu manggalauk! O kalua muma kakanak ndia mai, fo ela namanene ma ana bisa kokolak. O boso maso seluk muni kakanak ia dalek mu bali.”

²⁶Namanene Yesus kokolak nae leondia, boe ma nitu ndia nakau natingga nalan seli. Ana bala nabuu kakanak ndia losa ana leꞌa, bei fo nitu ndia kalua laꞌo elan. Boe ma kakanak ndia ana male leobali sangga maten. Losa hataholi la sila kokolak lae, “Naa! Ana mate so!”

²⁷Tehuu Yesus toꞌu nala kakanak ndia liman, de nafofoꞌan. Boe ma ana foꞌa tutik leo.

²⁸Basa boe ma Yesus no ana mana tungga nala laꞌo ela mamanak ndia de ala leni uma esa dalek leu. Latane Yesus nai ndia lae, “Ama! Huu hata de isinaak, ai taa bisa husi mala nitu ndia?”

²⁹Boe ma Yesus nafada nae, “Mamanene neulalaun! Nitu la memak manggalauk. De metema ei taa hule-haladoi moke tulu-falik neme Manetualain mai, na, ei ta mabeꞌi husi nitu mata leondiak.”

³⁰Basa ndia, boe ma Yesus no ana mana tungga nala laꞌo ela mamanak ndia, de ala leni nusa Galilea leu. Faik ndia, Yesus taa nau hataholi la bubuluk lae Ndia nai ndia so,

³¹huu kada Ana sangga nanoli Ndia ana mana tungga nala. Ana nafada sala, nae, “Taa dook so bali, tehuu ala sangga seꞌo heni Au uu hataholi feꞌek kala. Basa na, ala tao lisa Au, fo Hataholi Isi-isik ia. Memak Au mate, tehuu neu binesan, na, Au asoda fali.”

³²Yesus nafada leondiak, tehuu ana mana tungga nala lakandaan. Ala taa lambalani latane seluk Yesus maksud ndia hata.

³³Basa ndia, boe ma Yesus asa laꞌo losa Kapernaum. Ledoeik ala maso leni uma dale leu, boe ma Yesus natane ana mana tungga nala nae, “Isinaak ei masisimbo bafak hata ndia neme dala laladak?”

³⁴Tehuu taa hambu esa nambalani nataa boe, huu lasisimbo bafak leme dala laladak lae, see neme sila basa sala mai, inahuun nai lain seli, neme sila basa sala mai.

³⁵Basa boe ma Yesus nanggatuuk, de nanoli sala nae, “See nau dadik hataholi inahuuk, na, musi sodan dadi tebe-tebe leo hataholi kadiꞌianak fo ono-lau fee basa hataholi la.”

³⁶Boe ma Yesus koꞌo nala kakanak kadiꞌik esa nai ndia, de Ana fali neni basa sala laladan neu. Boe ma Ana kokolak, nae,

³⁷“See nau tungga Au fo ono-lau hataholi anak sama leo kakanak ia, na, ndia sosoan nae, hataholi ndia boe oo, ono-lau Au. Ma ndia boe oo ono-lau Au Amang fo mana madenu Au, uni daebafok ia mai.”

³⁸Basa ndia, boe ma Yesus ana mana tunggan Yohanis, kalaak nae, “Ama aa! Laꞌi esa, ai mita hataholi esa husi nitu pake Ama naden. De ai kaꞌin, huu ita hataholin taa ndia.”

³⁹Boe ma Yesus nataa nae, “Heeh! Ei boso kaꞌi hataholi ndia. Huu see pake Au nadeng, fo ana tao tanda heran, na, ana taa kokolak naboo Au nadeng ndia.

⁴⁰Mete ma ana taa laban ita, na, sosoan nae ita hataholi ndia boe.

⁴¹Masaneneda neulalau baa! Mete ma hambu hataholi bubuluk ei tungga Karistus, boe ma ana tulu-fali ei, na, neu ko Manetualain taa nafalende heni ndia sosotan. Leomae ana fee ei minu kaꞌda oe hiak nggalaas esa boe, tehuu Manetualain taa nafalende heni ndia.”

⁴²Boe ma Yesus nafada selu kasa bali, nae, “Mete ma hambu hataholi tao nasala kakana anak esa, losak taa namahele Au so bali, na, mata neuk leo baa! Malolenak mbaꞌa batu inahuuk esa neu hataholi ndia lesuhain, fo mabolo henin neni tasi laladan neu.

⁴³Mete ma o tao salak munik o limam, na tete heni limak ndia leo! Huu malolenak o maso muni nusa-sodak dalek muu, muni kada o limam seli, lena heni o muni o liman dua sala, tehuu ala mbia heni o muni haꞌi naraka dalek muu.

⁴⁴Naraka ndia, memak mamana doidosok. Ndia haꞌin taa hambu maten. Ma ulek malai sila kala taa hahae eꞌedok tao kaboo mbuluk.

⁴⁵Mete ma o tao salak munik o eim, na, tete heni eik ndia leo. Huu malolenak o maso muni nusa-sodak dalek muu, mua kada o eim seli, lena heni o muni o eim dua sala, tehuu ala mbia heni o muni haꞌi naraka dalek muu, mua o eim dua sala.

⁴⁶Naraka ndia memak mamana doidosok. Ndia haꞌin taa hambu maten. Ma ulek malai sila kala taa hahae eꞌedok tao kaboo mbuluk.

⁴⁷Mete ma o tao salak munik o matam, na edo henin. Huu malolenak o maso muni nusa-sodak dalek muu, mua kada o matam seli, lena heni o muni o matam dua sala, tehuu ala nggali heni o muni haꞌi naraka muu mua o matam dua sala.

⁴⁸‘Naraka ndia, memak mamana doidosok. Ndia haꞌin taa maten. Ma ulek malai sila kala taa hahae eꞌedok tao kaboo mbuluk.’

⁴⁹Au nanonoling ia, memak belan seli. De see nau tungga Au, na, ana musi nakatataka tungga nakandoo. Sama leo mbaa fo ala mamasin ma ala seꞌin lenik haꞌi, suek mbaa ndia nala dook.