Marko 9:10-49

¹⁰Ma dital mur go ra tinata ma dital tir vargiliane dital, ba ava ra kukurai ra nilaun mulai kan ra minat.

¹¹Ma dital tir ia dari: Dave ra lavur tena tutumu dia biti ba Elias na vut lua?

¹²Ma i tatike ta dital: A dovotina ba Elias na vut lua ma na vamule pa ra lavur magit par; ma dave laka di ga tumu ia ure Natu i ra tutana ba da vakadik ia ma ta mangoro na mangamangana, ma da pait vakuku ia tana?

¹³Ma go iau ve avat ba Elias i ga tar vut, ma dia ga pait ia tana nam parika dia ga mainge, da nam di ga tumu ia ure.

¹⁴Ba dia tadav ra tarai na vartovo, dia gire tadav ra kor na tarai bula dia tur kikil diat, ma dia vartir ma ra umana tena tutumu.

¹⁵Ba ra kor na tarai par dia gire dia kaian muka tana, ma dia vutvut tadav ia, ma dia vage pa ia.

¹⁶Ma i tir diat: Ava go ava vartir tana?

¹⁷Ma tikai ta diat ra tarai i biti tana: Tena Vartovo, iau ga ben natugu, a tutana, up u; a tabaran i bombom i ovai tana;

¹⁸ma ba i ub ia, i vue tar ia ra pia, ma i buabuai ra ngiene, ma i vangvangi ra pal a ngiene ma i palaur bula tana, ma iau ga biti tai kaum tarai na vartovo ba diat a okole vue ma pa i tale diat.

¹⁹Ma i tatike bali diat dari: Avat a taun tarai pa ava nurnur, aivia ra kilakilala ina ki pire vavat? Aivia ra kilakilala ina ungung pa avat? Da ben ia piragu.

²⁰Ma dia ben ia pirana, ina ba i gire a tabaran i ubu vapurpuruan ia muka, i bura ra pia i tapukpuku, ma i buabuai ra ngiene.

²¹Ma i tir tamana dari ba: Papa vingaia go i ubub ia? Ma i biti: Papa amana ba i ga bul boko.

²²Ma mangoro na bung i vue tar ia ta ra iap ma ta ra tava bula upi na doka; ba una pait valar pa ta magit i tana, una mari amir ma una maravut amir.

²³Iesu i biti tana: U iat; da pait ra lavur magit parika tai nina i nurnur.

²⁴Ma tama i ra bul i tangi lulut, ma i biti: Ioi, iau nurnur; una maravut ra niiba tagu upi ra nurnur.

²⁵Ba Iesu i gire ba ra ngala na tarai dia vutvut varurung, i tigal vue ra tabaran, i biti tana: U a tabaran, u bombom ma u vaut, iau vartuluai ba una irop kan ia, ma koko u ovai mulai tana.

²⁶Ba i tar kukula pa, ma ba i tar ubu vapurpuruan pa ia, i irop muka; ma ra bul i da ra minat; ma mangoro dia biti ba i tar Mat.

²⁷Ma Iesu i vatur ra limana, ma i vatur pa ia; ma i tut.

²⁸Ba dia ruk na pal, kana tarai na vartovo dia tir ive dari: Dave avet, ave mama okole vue?

²⁹I biti ta diat: Pa ta magit a mangamangana dari na irop tana, ia kaka ta ra niaring.

³⁰Ma dia vana kan nam ra gunan, dia vana alalu Galilaia, ma pa i mainge ta tikai na nunure.

³¹Tago i tovotovo kana tarai na vartovo dari: Da tul tar Natu i ra tutana ta ra lima i ra tarai, ma diat a doka; ma ba di tar doka, na laun mulai ba i par ta utul a bung.

³²Ma pa dia nunure go ra tinata, ma dia burut upi diat a tir ia.

³³Ma dia pot Kapernaum; ba dia ki na pal, i tir diat ba: Ava nam ava ga vartoto tana na nga?

³⁴Ma dia ki mut uka, tago dia vartoto na nga ba to ia ta diat i ngala.

³⁵Ma i ki ma i oro pa ra vinun ma a ivut, ma i biti ta diat: Ba tikai i mainge pi na lua na murmur uka, na tultul pire vavat parika.

³⁶Ma i vatur ra bul ik, ma i vaki ia livuan ta diat, ma i puak pa mule, ma i biti ta diat:

³⁷Ba tikai i onge ta bul ik dari ta ra iangigu, i onge iau bula; ma ba tikai i onge iau, pa i onge ke iau, i onge nina iat, i ga tulue iau uti.

³⁸Ioanes i tatike tana: Tena Vartovo, ave ga gire tadav tikai i okokole vue ra umana tabaran ma ra iangim, ma ave ga tigal ia, tago pa i murmur dat.

³⁹Iesu i biti: Koko da tigal ia, tago pa ta na pait ra dekdek na magit ta ra iangigu, ma na vatang ta kaina tinata ure iau lulut.

⁴⁰Tago nina ba pa i tur bat dat, i maravut uka dat.

⁴¹Ma nina i tabar avat ma ra la na tava na nimomo, tago avat kai Kristo, a dovot go iau tatike ta vavat, pa na iba upi kana vapuak.

⁴²Ma nina i varara ta tikai ta go ra umana ikikilik dia nurnur tagu, gala na boina ba di kun tar ra ngala na vat na niudu ta ra inoana, ma da vue vadudu ia na ta.

⁴³Ba tika na limam i varara u, una kutu vue; i boina una olo ta ra nilaun a tomo, ma koko da vue u ma ra ivu limam par ura geena ta ra iap ba pa da pun ia.

⁴⁴Kadia kalolo pa na mat i tana, ma pa ta na pun ra iap tana.

⁴⁵Ba tika na kakim i varara u, una kutu vue, i boina una olo ta ra nilaun a tomo, ma koko da vue u ma ra ivu kakim par ura geena.

⁴⁶Kadia kalolo pa na mat i tana, ma pa ta na pun ra iap tana.

⁴⁷Ba tika na kiau na matam i varara u, una luak vue; i boina una olo ta ra varkurai kai God ma ra kopono kiau na matam, ma koko da vue u ma ra ivu kiau na matam par ura geena.

⁴⁸“Kadia kalolo pa na mat i tana, ma pa ta na pun ra iap tana.”

⁴⁹Tago da vamapak ra tarai par tikatikai ma ra iap.