Markus 9:10-49

¹⁰Ekewe chon kaiö ra aleasochisi mine Jesus a allük ngeniir, nge püsin irfengen lefiler ra kapasfengen won ekei kapas o ais, “Met wewen manausefäl seni mäla?”

¹¹Iwe, ra aisini Jesus, “Pwota ekewe Sensen Allük ra apasa, pwe Elias epwe akomwen feito?”

¹²Nge Jesus a pölüeniir, “Mi pwüng pwe Elias epwe akomwen feito, pwe epwe amolätä mettoch meinisin. Nge pwota chök a mak lon ekewe Toropwe mi Pin, pwe Nöün Aramas epwe tolong lon riaföü watte o küna koput?

¹³Nge üpwe ürenikemi pwe Elias a fen feito, nge aramas ra föri ngeni mine ra mochen, usun a fen mak lon ekewe Toropwe mi Pin.”

¹⁴Iwe, lupwen ar liwinto ren ekewe ekoch chon kaiö, ra küna eu mwichen aramas mi chomong ra pwelifeiliir, pwal ekoch Sensen Allük ra anini ngeniir.

¹⁵Lon ewe chök otun, lupwen ewe mwichen aramas mi chomong ra küna Jesus, ra fokun mairü, ra säla ren o kapong ngeni.

¹⁶Iwe, Jesus a aisini nöün kewe chon kaiö, “Met oua aninifengen won me ekewe Sensen Allük?”

¹⁷Iwe, eman mwän me lon ewe mwich a pölüeni, “Sense, üa uwato nei ät reöm, pun a wor eman ngününgau won, pwe esap tongeni kapas.

¹⁸Lupwen ewe ngün a pöchökül me won, a aturala le pwül, iwe, a puropurowu seni lon awan, a asürüngü ngiin o chewararela unusen inisin. Üa tüngor ngeni noumw kewe chon kaiö pwe repwe atowu ewe ngün me won, nge resap tongeni.”

¹⁹Iwe, Jesus a üreniir, “Ämi eu täppin aramas mi lükülükümang. Ifa langatamen fansoun ai üpwe nom remi? Ifa langatamen fansoun ai üpwe engila ngenikemi? Oupwe uwato rei ewe ät.”

²⁰Iwe, ra uwato ewe ät ren Jesus. Nge lupwen ewe ngününgau a küna Jesus, lon ewe chök otun a achecha ewe ät, iwe, a turula le pwül o asokopölafetalei, nge puropur a puropurowu seni lon awan.

²¹Iwe, Jesus a aisini semen ewe ät, “Ifa langatamen fansoun än noumw ei samau?” Ewe sam a pölüeni, “A chök popuetä seni an kükün.

²²Fan chomong ewe ngününgau a sotuni an epwe niela ren an aturalong lon ekkei pwal lon koluk. Kose mochen kopwe tongekem o alisikem, are ka tongeni.”

²³Nge Jesus a pölüeni, “Are en ka tongeni lükülük! Eman mi lükülük a tongeni mettoch meinisin.”

²⁴Lon ewe chök otun semen ewe ät a kökkö fan leüömong, “Üa lükülük! Kopwe alisiei, pwe üsap chüen lükülükümang.”

²⁵Iwe, lupwen Jesus a küna, pwe chomong aramas ra säto rer, a apwüngü ewe ngününgau, “En ngün mi afisätä awemwöch me selingepüng üa allük ngonuk pwe kopwe towu seni ewe ät, nge kosap fokun liwinsefäliti.”

²⁶Iwe, ewe ngününgau a puchörütä, a achechecha ewe ät o a towu seni. Iwe, ewe ät a konola won pwül usun chök eman mi mäla. Iei mine chomong me lein ekewe aramas ra apasa, “A mäla.”

²⁷Nge Jesus a amwöchü pöün ewe ät o a apwätai.

²⁸Mürin än Jesus tolong lon ewe imw, nöün kewe chon kaiö ra aisini Jesus lupwen a emanüla, “Pwota äm aisap tongeni atowu ewe ngününgau?”

²⁹Nge Jesus a pölüeniir, “Esap wor och mettoch ei sokun ngün epwe tongeni süla ren, pwe ren iotek chök.”

³⁰Iwe, Jesus me nöün kewe chon kaiö ra feila seni ewe leni o ra pwerelong lon Kalilea. Nge Jesus esap mochen pwe aramas repwe silei ia a nom ie,

³¹pun a afalafala nöün kewe chon kaiö o a üreniir, “Nöün Aramas epwe tolong le pöün aramas, iwe, repwe niela. Nge mürin ülüngat rän epwe manausefäl.”

³²Nge nöün kewe chon kaiö resap weweiti mine a eäni afalafal, nge ra pwal niuokus ar repwe kapas ais ngeni.

³³Iwe, ra tori Kapernaum. Nge lupwen Jesus a nom le imw, a aisini nöün kewe chon kaiö, “Met oua aninifengen won lupwen sia fetal won al?”

³⁴Nge ir ra chök fanafanala, pun ra aninifengen won al ika iö a lap seniir meinisin.

³⁵Iwe, Jesus a mottiu, a körifengeni nöün kewe engol me ruoman chon kaiö o a üreniir, “Are eman a mochen pwe epwe akom seni meinisin, i epwe kükümwir seniir meinisin, epwe pwal chon angang ngeniir meinisin.”

³⁶Mürin a angei eman semirit o a anomu me mwer, a romi o üreni nöün kewe chon kaiö,

³⁷“Are eman a etiwa eman ekei semirit fän itei, wewen chök nge a pwal etiwaei, nge are eman a etiwaei, esap chök etiwaei, nge a pwal etiwa ewe mi tiniei.”

³⁸Iwe, Johannes a üreni Jesus, “Sense, äm aia küna eman mwän a atowu anün rochopwak fän itom, nge aia üreni pwe epwe ükütiu, pun esap chiechiach.”

³⁹Nge Jesus a üreniir, “Ousap aükätiu an angang. Pun eman mi föri eu manaman fän itei, esap tongeni kapasingau usi me mürin.

⁴⁰Pun iö esap ü ngenikich, i a fitikich.

⁴¹Enlet, üpwe ürenikemi, are eman epwe aünü ngenikemi eu kapen koluk, pokiten oua chon tapwela mürin Kraist, i epwe fokun angei liwinin.”

⁴²“Are eman aramas epwe föri pwe eman ekewe kükün mi lüküei epwe föri tipis, epwe fen öch ngeni ewe aramas, pwe epwe riritä fän üan eföü fau mi föümong o epwe koturutiu le matau.

⁴³Are poumw a atupukelong lon tipis, kopwe pökü. Epwe fen öch ngonuk om kopwe pöüefoch le tolong lon manau esemüch, lap seni om kopwe pöüruofoch le tolong lon hell,

⁴⁴ia ekewe möttö mi äniir resap mäla, nge ewe ekkei mi keniir esap kunula.

⁴⁵Are pecheöm a atupukelong lon tipis, kopwe pökü. Epwe fen öch ngonuk om kopwe pecheefoch le tolong lon manau esemüch, lap seni om kopwe pecheruofoch le tolong lon hell,

⁴⁶ia ekewe möttö mi äniir resap mäla, nge ewe ekkei mi keniir esap kunula.

⁴⁷Are mesom a atupukelong lon tipis, kopwe alusawu. Epwe fen öch ngonuk om kopwe meseeföü le tolong lon manau esemüch, lap seni om kopwe meseruoföü le tolong lon hell,

⁴⁸ia ekewe möttö mi äniir resap mäla, nge ewe ekkei mi keniir esap kunula.

⁴⁹Aramas meinisin repwe limelimöch ren ekkei, usun eu asoren mongö a limelimöch ren salt.