Mareko 9:10-49

¹⁰Wige abra mir dasorda, wige no tabara batagelare nalu agekar lu ikeredi 'eudlam ekiamda'.

¹¹Wige eudige Iesui itmerda, “Naluglam Aotarlegize detauteda Elaiza kikem watatabakiamu?”

¹²Iesude yabi daratagerda, “Agekar Elaiza kikem tabakiamuda ko gair lu wadararsirare. A mipe nalu pemi etagada nako Lera Werem dali muige Zogoziawalige? Mi etageda e asiasi wadigi a abi wadituaklare!

¹³Ka wabi detagreda, Elaiza emetu tabakiamuda, ege legize abim adud tonar ikelare nalu ge wi laglag urder, able mokakalam able orwairorwair pe mimi abra ad detagreda.”

¹⁴MRK 9.14-29 Nade wi takomertidare wader memegle nardarda, wige erdardare au kub lera yabi daramuareta, a wader Aotale memeglekem basaredlare.

¹⁵Ege legize erdarda, wi bazigmuarti a korider abim bamri ko abi watigareda.

¹⁶Iesude tabara memegle nautmerda, “Wa naluglam pewa tabasardeda?”

¹⁷Ege kimiar ge le kub ge dawer abi akaida abi detagri, “Erwerle, ka kara werem marim tigardi e umerkak mir waditaut ableglam abra dimoni abidoge dali.

¹⁸Nade abi dimonide wairser, epe abi obatawerder sepem, epe abra sik tege obapaitlare, e tabara tirig waikupamater a abra gem lid obatrer. Ka mara memegle daramosa ko able dimoni waismerdarda, wi umerkak waikaidarda.”

¹⁹Iesude yabi daratagerda, “Wa owaturkak le uridli! Ka na niainiai yaka wabidoge nawar? Ka na niainiai yaka okasosok wabialam digier? Wa able werem kei karim tigardare.”

²⁰Wige able werem tagareda Iesui ikwarda. Nade able dimonide Iesui erdari, ege able le deskerder kei itimder a kei itimder, a eudi sepge abi, sepge epitrer a sik abra tege bapaitlare.”

²¹Iesude able lera bab itmeri, “E na niainiai able orwairorwair wadawer?” Ege abi ikaidari, “Able kerkerlam nade e kebi werem wadali.

²²Mitkar kerkerge dimonide abi waiker ko abi waipiti e abi obatawerder urem a niem. Ma kerbi omarge; mai umele kerbi upiditidarare?”

²³Iesude eudige abi detagri, “Ma umele iker! Na lera pe owatur daragriwerteda e umele gair lu waiker.”

²⁴Ege keko able wermira bab erer ekri, “Kara owatur ikeredi, epe no kebile ikeredi. Ma kari upinati ya waiakai kara owatur waiakai aule obai!”

²⁵Iesude dasmeri lera kub etamier; ege au kelarkelar dimoni detagri, “Asorkak a mirkaka dimoni, ka mari kelarkelar detagri ma adem teosmer able kebilelam a mage nole ko bakiamu abidoge bau!”

²⁶Ege dimonide sasmir dimri, eudige able kebile aler deskerdi, a adem teosmeda. Gaie le ge urder eudige natkareta, “E eumida!” ableglam able kebile mokakalam dali eudle.

²⁷Ege Iesude able kebilera tag derpeida a abi agisida ege akaida ekeida.

²⁸Keubu, nade Iesu tebteb bakiamuda badari able metage, abi memeglegize titmerda, “Ki naluglam nole ki able dimoni adem ismerdarda?”

²⁹Iesude yabi daratagerda, “No erkepasamide umele able orwairorwair lu adem waismer.”

³⁰MRK 9.30-32 Wi able uteb dikaireta wige nakasir Galilaiage. Iesu nole lagkak dawer umerkak nerut le umele obaida e nade dawer,

³¹ableglam e tabara memegle nerwerlare. Iesu yabi daratagerda, “Able Lera Werem ya waiperare a waigardare able le wanakwarare ya wi abi waipitare. Neis a netat gerger ya obakare e ko ya eudlam wekiam.”

³²Wige nole akmerkak urder e nalu detauter, wige geumge bakerer abi waitmerda.

³³MRK 9.33-37 Wi taba Kapanamge bakarki. Nade wi bakiauda metage barti, ege yabi nautmerdi, “Wa naluglam pewa gabge tabasardeda?”

³⁴Wige nole mir natkareta ableglam nade wi gabge tarakasir wige tabasaredlare nete aukakale dali.

³⁵Iesu akaida emrida a 12 memegle tababim darabgerda. E yabi daratagerda, “Nete laglag kikem wadawer e tababu obakai keubu watadawer gair lege a e wadawer gair lera memegle.”

³⁶Iesude eudige netat kebi omaskir erpeidari a ikaidari eipuge ikeidari taba memeglege. Ege eudige akaidari abi gasu erpeidari a yabi daratagerda,

³⁷“Ese netide karim able netat kebiwerem waseserder pe able kebiomaskir uridli, e kari ko naseseredli a pako able Le ge kari taramarikda.”

³⁸MRK 9.38-41 Zonede abi detagri, “Erwerle, ki kimiar dasmerlare e mari neige dimoni adem iser. Ki abi detagerda, “Ma ge ekwei ma nole able lu ko iker” ableglam e nole merbidoge ikase.”

³⁹Iesude yabi daratagerda, “Wa nole ko abi daisumdarawem e ge wekweiwa able lu akerkak. Na lelut nadgireda kari neige umerkaka waditaut adud mir karim.

⁴⁰Netide Pe Dorge Ikeli Merbi Asaredkak E Merbim Dorge Ikeli.

⁴¹Netide mari gebgeb ni nakwarli ariem ableglam wa Kerisora uridli e ya tabara bodomalam watirpei.

⁴²MRK 9.42-50 E ya aukaka seksek lu waikerider ese netide waditager netat able kebilelam e wit waikai pe abra owatur karidoge dikeredi. E ya audebele waikereder ese idid bakir obamri able le taboge a abi gurem obatimed.

⁴³Ese mari tagide mari wanakai ma wit ikai mage abi adem ismi. E debele ikeredi ma idid ge bau no netat tagtag. Ese mara neis tag wanakereder mai bakiamu Urasamkak.

⁴⁴Pe nade, “Yaba uk umerkak obaum a ur umerkak obasamare.”

⁴⁵Ese mari teteride mari wanakai ma wit ikai mage abi adem ismi. E debele ikeredi ma idid ge bau no netat teterteter. Ese mara neis teter wanakereder mai bakiamu Urasamkak.

⁴⁶Pe nade, “Yaba uk umerkak obaum a ur umerkak obasamare.”

⁴⁷Ese mari ponide mari wanakai ma wit ikai mage abi adem bataured. E debele ikeredi ma Adi Basalaiage bau no netat poniponi. Ese mara neis poni wanakereder mai bakiamu Urasamkak.

⁴⁸Pe nade, “Yaba uk umerkak obaum a ur umerkak obasamare.”

⁴⁹Gair le ya solsol waturder urger watabatitilare.