San Marcos 9:10-49

¹⁰Oyeupeñomi tẽi vɨreco aipo ñehesa yuvɨreco, ahe rumo oporandu-randu oyeupe: “¿Mara oya pĩha aipo, ‘Acuerayevɨra’ ehise?” ehi tẽi yuvɨreco.

¹¹Evocoiyase semimbohe oporandu chupe: —¿Mahera ru Moisés porocuaita rese oporombohe vahe: “Elías rane rumo oura curi” ehi yuvɨreco? —ehi yuvɨreco chupe.

¹²Evocoiyase aipo ehi chupe: —Elías rane ité niha oura opacatu mbahe moingatu ãgua. ¿Mahera aracahendar icuachiaprɨ pɨpe aipo ehi: “Ava Rɨquehɨr oiporarara mbahe, yamotarẽhɨmbrɨ avei secoira” ehi?

¹³Che niha aipo ahe pẽu: Elías rumo ou ité, ava evocoiyase opacatu güemimbotar tẽi oyapo yuvɨreco sese. Ẽgüe ehi opacatu yavɨye aracahendar icuachiapɨrer sese —ehi.

¹⁴Ipare oyevɨ yuvɨreco güemimbohe recosave. Aheve osepia ava rehɨi oyere guasuse yuvɨreco sese, iyavei oime aheve Moisés porocuaita rese oporombohe vahe oiñehepoepɨ-epɨ semimbohe yuvɨreco.

¹⁵Ichui Jesús repiase, opacatu yuvɨnoña yuvɨraso chupe “avɨrave” apo.

¹⁶Evocoiyase ahe oporandu ava eta upe: —¿Mbahe rese vo peporandu-randu peyeupe? —ehi.

¹⁷Ñepei ipãhu pendar omboyevɨ chupe: —Porombohesar, co aru che rahɨr ndeu, vɨreco vahe caruguar oyese, nomoñehengatu ucai vahe yepi.

¹⁸Iyavei que iguatasa rupi co caruguar avɨyeteramo tẽi opocose sese, oitɨ voi ɨvɨve iyavei sendɨrɨyuiyusu, sãitere-tere avei; sese cũritei nipirata iri eté. “Penosemi caruguar ichui” ahe tẽi nde remimbohe eta upe. Ahe rumo ndoicatui eté yuvɨreco —ehi.

¹⁹Jesús omboyevɨ chupe: —¡Too, ndapeyeroya tuprɨ vɨtei eté che rese! ¿Mbovɨ rupi rutei vo aico vɨtera pe pãhuve che ñemosasa pɨpe? Peru evocoi chĩhivahe cheu —ehi.

²⁰Evocoiyase ogüeru yuvɨreco chupe. Osepiase caruguar Jesús, oitɨ uca iri chĩhivahe ɨvɨve. Omboapayere-yere iyavei sendɨrɨyui guasu-guasu.

²¹Sese oporandu tu upe: —¿Mbahese vo na ehi chupe? —ehi. Tu evocoiyase aipo ehi: —Ichĩhivahemi suive ité.

²²Amove co caruguar oitɨ uca tatave, ɨve avei yuca pota uca ãgua yepi. Sese ereicatuse, ore pɨ̃tɨvɨiñomi tẽi catu eve ore paraɨsuerecosave —ehi.

²³Jesús aipo ehi chupe: —¡Mahera, “Ereicatuse” ere cheu! Acoi che rese oyeroya vahe upe opacatu mbahe yaposa —ehi.

²⁴Aipo hese tu, —¡Orovɨroya niha, che pɨ̃tɨvɨi ru eve nde reroya catu ãgua! —ehi pĩrata chupe.

²⁵Osepiase Jesús ava rehɨi, oyemboyase sese, oñehe pĩrata caruguar upe aipo ehi: —Caruguar noñehei vahe, ndayapɨsai vahe, che orocuai, epoi co chĩhivahe sui, ereique iri eme secocuer rese —ehi.

²⁶Caruguar sãse pucu chĩhivahe yuca tuprɨ oso. “Omano ité co chĩhivahe” ehi ambuae ava yuvɨreco.

²⁷Jesús rumo oipopɨsɨ imopuha; evocoiyase chĩhivahe opũha tuprɨ voi eté.

²⁸Ichui oique oɨ pɨpe. Aheve semimbohe ahe aemi oporandu yuvɨreco chupe: —¿Mahera pĩha ndoromose catui eté caruguar ichui? —ehi yuvɨreco.

²⁹Jesús rumo aipo ehi güemimbohe upe: —Yeroquɨ iyavei yecuacu pɨpeño ité niha co nungar caruguar yaicatu imombo —ehi.

³⁰Ichui yuvɨnosepase, yuvɨraso ɨvɨ Galilea rupi. Jesús rumo ndoyemboyecua uca potai eté que ambuae ava upe.

³¹Esepia, güemimbohe güeraño ité ombohe aipo ehi: —Che, Ava Rɨquehɨr, imondoprɨ aicora che amotarẽhɨmbar povrɨve, che yuca aveira yuvɨreco, mbosapɨ arɨ rupi rumo acuerayevɨra —ehi.

³²Semimbohe rumo ndosenducuai eté oyeupe ñehesa yuvɨreco iyavei osɨquɨye chupe porandu ãgua yuvɨreco yepi.

³³Ipare oyepota tecua Capernaum ve yuvɨreco. Yuvɨroiquese oɨ pɨpe, —¿Mbahe rese vo acoi peyeaca-aca peico perɨ rupi? —ehi güemimbohe upe.

³⁴Ahe rumo noñehei tuprɨ yuvɨreco chupe. Esepia, perɨ rupi, “¿Ava pĩha ɨvate catu vahe?” ehi asɨ-asɨ oyeupe yuvɨreco.

³⁵Evocoiyase oguapɨsave, “Periopa” ehi güemimbohe upe, aipo ehi avei: —Oimese pe pãhu pendar oyemboɨvate ai vahe, ahe rumo seco ɨvɨ cotɨ catura opacatu sui ava eta pɨ̃tɨvɨi ãgua —ehi.

³⁶Ipare oipɨsɨ chĩhivahe güemimbohe pãhuve senoha aipo ehi:

³⁷—Acoi ava oipɨsɨ vahe co chĩhivahemi nungar che rer pɨpe sereco, che ité che pɨsɨ yuvɨreco; iyavei acoi ava che pɨsɨ vahe, ndahei che güeraño che pɨsɨ, oipɨsɨ aveira che mbousar —ehi.

³⁸Evocoiyase Juan aipo ehi chupe: —Ore mbohesar, orosepia mbɨa nde rer pɨpe omombo vahe caruguar. Ahe rumo ndoguatai cũritei ore rupi; ore ité ndoroipotai chupe —ehi.

³⁹Jesús rumo, —Aní ẽgüe peye —ehi—. Esepia, ndipoi eté que ambuae oyapo vahe poromondɨisa che rer pɨpe, oicatu vaherã oñehe rai che rese.

⁴⁰Sese ndayande amotarẽhɨi vahe, ahe yande mboyoyasar secoi.

⁴¹Acoi que omondo vahe ɨ vaso pɨpe che rupi pe recosa pɨpe pẽu, evocoi nungar oipɨsɨ itera porerecosa oyeupe nara —ehi.

⁴²“Acoi que ava omboangaipa uca vahe co chĩhivahemi nungar che reroyasar, iyacatu evocoi nungar ñapɨchisa ita mbahe mbocuhisa iyesɨho rese para guasu pɨpe imombo ãgua.

⁴³Sese pe po pe mboangaipa uca vahe peyasɨa ité peyesui. Esepia, avɨye catu peiquera tecove apɨrẽhɨsave ñepei pe po rese, peso rãgüer sui que ñuvɨrío pe po rese tata guasu apɨrẽhɨsave.

⁴⁴Aheve acoi uru nomanoi vahe, tata ndogüei vahe avei.

⁴⁵Pe pɨ pe mboangaipa ucase, peyasɨa avei peyesui. Esepia, avɨye catu ndape pɨndugüei peique tecovesave, que ñuvɨrío pe pɨ rese peique rãgüer sui tata guasu ndopai vahesave.

⁴⁶Aheve acoi uru nomanoi vahe, tata ndogüei vahe avei.

⁴⁷Pe resa avei pe mboangaipa ucase, penose ité peyesui. Esepia, avɨye catu peique ñepei pe resa rese Tũpa mborerecuasave que ñuvɨrío pe resa rese tata guasu apɨrẽhɨsave pe reique rãgüer sui.

⁴⁸Aheve acoi uru nomanoi vahe, tata ndogüei vahe avei.

⁴⁹“Esepia, opacatu ava imoehesara tata nungar pɨpe.