Marku 9:10-49

¹⁰Te dongah olka te a kuem uh tih, “Aka duek rhoek taeng lamkah loh a thoh ham te metlam a om eh?” tila amamih te oelh uh thae.

¹¹Te phoeiah amah te a dawt uh tih, “Balae tih cadaek rhoek loh, 'Elijah te ha pawk lamhma ham a kuek,' a ti uh,” a ti nah.

¹²Te dongah Jesuh loh amih te, “Elijah he lamhma la ha pawk coeng tih boeih a thoh coeng ngawn. Tedae hlang capa muep a patang phoeiah a voeih ham te metlam a daek?

¹³Tedae nangmih taengah ka thui tah Elijah khaw ha pawk coeng tih anih ham a daek pah vanbangla anih te a ngaih bangla boeih a saii uh,” a ti nah.

¹⁴Hnukbang rhoek taengla aka pawk rhoek loh amih taengkah hlangping neh cadaek rhoek neh muep a oelh uh te a hmuh uh.

¹⁵Hlangping boeih loh Jesuh te lawt a hmuh uh hatah a ngaihmang uh. Te dongah anih te a cuk thil uh tih a doe uh.

¹⁶Te dongah amih te, “Amih neh balae na oelh uh thae,” tila a dawt.

¹⁷Te vaengah hlangping lamkah pakhat loh saya, “Mueihla olmueh aka kaem ka capa te nang taengla kang khuen.

¹⁸Anih he a tuuk vaengah tah bung tih a hom phoeiah no a rhueng tih koh. Te te haek ham na hnukbang rhoek te khaw ka dawt dae noeng uh pawh,” a ti nah.

¹⁹Te dongah Jesuh loh amih te a doo tih, “Aw aka tangnahmueh kah cadil, nangmih taengah meyet nim ka om ve, nangmih taengah mevaeng hil nim kan yaknaem ve? Anih te ka taengla hang khuen uh,” a ti nah.

²⁰Te daengah camoe te Jesuh taengla a khuen uh. Tedae Mueihla loh camoe te koe a doek te a hmuh. Te vaengah diklai la bung tih a hom neh bol.

²¹Te vaengah a napa te, “Anih taengah aka thoeng he kum meyet lamkah lae a om coeng?” tila a dawt.

²²Te dongah a napa loh, “A cahni lamkah coeng tih anih poci sak ham hmai khuiah khaw tui khuiah khaw a voeih taitu. Tedae pakhat khaw na saii thai khaming, kaimih soah thinphat la kaimih m'bom mai,” a ti nah.

²³Te dongah Jesuh loh anih te, “Na sai thai atah e te! Aka tangnah ham boeih coeng thai ta,” a ti nah.

²⁴Camoe kah a napa te tlek pang tih, “Ka tangnah, ka hnalvalnah te m'bom mai,” a ti nah.

²⁵Jesuh loh hlangping a khong te a hmuh vaengah, mueihla thae te a ho tih, “Olmueh neh hnapang mueihla Kai loh nang kan tueih. Anih taeng lamkah loh cet lamtah anih khuiah kun voel boeh,” a ti nah.

²⁶Te dongah pang tih muep a suvaih phoeiah cet. Tedae camoe te aka duek bangla a om dongah, “Duek coeng, “tila muep a thui uh.

²⁷Tedae Jesuh loh a kut te a tuuk tih a thoh hatah koe thoo hang.

²⁸Im khuila a kun phoeiah tah a hnukbang rhoek loh, “Kaimih loh balae tih tih anih te ka haek uh thai pawh,” tila amah bueng hloep a dawt uh.

²⁹Te dongah amih te, “He bang he thangthuinah nen pawt atah haek thai mahpawh,” a ti nah.

³⁰Te lamkah loh thoo uh tih Galilee longah van uh dae pakhat khaw ming sak ham ngaih pawh.

³¹A hnukbang rhoek a thuituen vaengah khaw, “Hlang Capa tah hlang kut ah a voeih vetih a ngawn uh ni. Tedae a ngawn uh phoeikah hnin thum ah thoo ni,” a ti nah coeng.

³²Amih loh olthui te a mangvawt uh dae amah dawt ham khaw a rhih uh.

³³Kapernaum te a pha uh tih im ah a om vaengah, “Longpueng ah balae na thui uh?,” tila amih te a dawt.

³⁴Tedae long ah khat neh khat te ulae tanglue tila a thuingong uh dongah a hil a phah uh.

³⁵Te vaengah Ngol tih hlainit te a khue. Amih te khaw, “Khat khat loh lamhma la om ham a ngaih atah hnukkhoem koek neh tueihyoeih koek la om ni,” a ti nah.

³⁶Te phoeiah camoe te a khue tih amih lakli ah a pai sak tih a poem.

³⁷Amih te khaw, “Kai ming neh hebang camoe pakhat khaw aka doe long tah kai ni n'doe. Tedae kai aka doe long tah kai bueng kolla ka tueih te khaw a doe,” a ti nah.

³⁸Johan loh Jesuh taengah, “Boeipa, na ming neh rhaithae aka haek hlang khat te ka hmuh uh. Tedae mamih hnuk ham vai pawt dongah anih te ka paa sak uh,” a ti nah.

³⁹Tedae Jesuh loh, “Anih te paa sak uh boeh. Ka ming neh thaomnah aka tueng sak te a om pawt vaengah koeloe la kai n'thet ve.

⁴⁰Te dongah mamih neh kingkalh la aka om pawt te tah mamih ham ni a om.

⁴¹Khrih kah hut la na om uh dongah ka ming neh tui boengloeng khat nangmih aka tul te tah a thapang te poci loengloeng mahpawh tila nangmih taengah rhep ka thui.

⁴²U long khaw kai aka tangnah camoe rhoek he pakhat khaw a khah atah a rhawn ah laak phaklung a oi tih tuili ah voei koinih anih ham hnothen la lat om coeng.

⁴³Nang khaw na kut loh n'khah atah hlueng mai. Kut panit om tih hmai aka duek pawh hell la caeh lakah hingnah khuiah a ngun la kun te nang ham hnothen la om.

⁴⁴Na kho long khaw nang n'khah atah hlueng mai.

⁴⁵Kho rhoi om tih hell khuila m'voeih lakah a khaem neh hingnah khuila kun te nang hnothen la om.

⁴⁶Na mik long khaw nang n'khah atah koeih mai.

⁴⁷Mik panit om tih hell la m'voeih lakah mikvang neh Khohni ram khuiah kun te nang ham hnothen la om.

⁴⁸Te ah tah amih kah a rhiit khaw duek pawt tih hmai khaw thi pawh.

⁴⁹Rhoepsaep boeih te hmai dongah a baek ni.