Mark 7:27-37

²⁷Doari Jesus ken japoang, pwehng ih, “Kisai kamwinge jeri kan mijoa, johpwa pwung en kihjang kenen jerihkan mwinge peidlahng doahk kan.”

²⁸Liho japoang pwehng ih, “Mehlel Maing, a doahk kan kin pel pwili kang in kenen jeri kan pehn sehpil kan!”

²⁹Jesus ken japoang, pwehng, “Pwa doahroar oamw pajpoang en, alwe in umwoammwo; pwa ngen jausso ne injang ipen nihmw jerpeinno.”

³⁰Liho ken pwurla in umwahu kidalda pwa nah jerpeinno onohn nehn dohiahu; a ngen jausso ne injang ipoa.

³¹Jesus inlahjang Tyre, ih wud ipen Sidon, inlahng Jed in Galilee, kosohla wein Decapolis.

³²Armaj pwi ken ukdohng ih woal pongpong apel jehjoa lallal men, poaki en kihdahng poah pohn ih.

³³Jesus ken ukjang woallo nehn pokonno, ih ken dilimmoang jandin poah nehn pwokin sioa, kioang pilen oawoa in jandin poah, jairki loawoan woallo.

³⁴Jesus ken jardahla nehnloannge, pwahla, “Ephphatha,” ma woahwoahki, “woahjekpijoang!”

³⁵Anjoauwohr pwokin sien woallo woahjekpijoang apel joalin loawoa lapwadekla; ih ken sapda lallal.

³⁶Jesus ken pwehng ihr ohroj en johpwa pwehng emen mehkije. A doahr uhwen lal sihkei ma ih wiahng arai, ioar doahr sihkei in ahr lohkihjili manman oauwe.

³⁷Irai ohroj ma pwili rong wioapoan manman oauwe, arai ken pwuriamweikihla pwahpwahpwa, “Me ohroj ih kin wiahda inenin mwehu! Pwa Jesus kin nimen armaj pongpong kan en rongda wija apel kalallalihda armaj loahsoang kan!”