Mareko 7:27-37

²⁷Âzâcneme Jesuzi ʒiŋuc muwec: “Naru motec jaŋe qanaŋ nâ gapec eniŋte mukicne. Irec jaŋe wemocko nânâ jowac rorâ qâto behe‐jarezo.”

²⁸Mume ŋokaczi dâŋ ʒiŋuc bâtikiecnewec: “Wofuŋ, i manakopac, erâ qâto jaŋe naru motec jaŋere teboonec nânâ huŋgaŋne wahame sifu mac nâeŋgopieŋ.”

²⁹Eme Jesuzi ʒiŋuc âzâcnewec: “Dâŋ iŋuc mukicte mana‐garekopac, rac, demoŋzi otâge behejec.”

³⁰Eme ŋokac e rarâ ficticnao fisirâ honewec: Otâ‐ticne e demoŋzi beheme fofo‐ticnao niniŋkerâ fowec.

³¹Jesu e Tiro haeonec risierâ Sidoŋ hae fotâcnerâ wareku Galilaia riqickopec hae 10 ŋerawec ira fisiwec.

³²Ira fisihame ŋic qepoŋ nâŋguŋ moc erao jowa rarâ meticnezi bâuaocte numucnembiŋ.

³³Numucnepie manarâ ŋic e râricne mocko râeme buc domame memotec‐ticne hazecnao râerâ tâfeckerâ nameŋnao bawec.

³⁴Erâ sambâŋko fime feha nokafe herâ muwec, “Efata”, Kâtedâŋko: Uŋtoc.

³⁵Mume hazecne uŋtowec â nameŋne forisieme dâŋ biaŋne dâŋewec.

³⁶Eme Jesu e biŋe i mi mufuaniŋte mic muac ejarewec. Erâ ejare‐bipieme jaŋe ʒoɋac erâ muromackembiŋ.

³⁷Jaŋe warecke sâqorerâ ʒiŋuc mumbiŋ: “Wiac sasawa bame biaŋke‐fâreekac, wiac gâcne bahuc qepoŋ jaŋere hazec wâc bâuŋtoekac â nâŋguŋ jaŋe dâŋ bâfua‐jareekac.”