San Marcos 7:27-37

²⁷Jesús rumo aipo ehi chupe: —Tahɨr judío rane toipɨsɨ mbahe yuvɨreco. Esepia, naporai yarocua pan tahɨr sui cave tohu imondo ãgua —ehi.

²⁸Co cuña aipo ehi: —Supi eté, che Yar, cave avei rumo ohuño ité pan rahɨcuer ovɨapi vahe tahɨr mesavrɨ pendar —ehi.

²⁹Aipo ihese, aipo ehi: —Avɨye ité nde ñehe. Eyevɨ eso. Caruguar osẽ nde membrɨ sui —ehi chupe.

³⁰Co cuña oyepotase güẽtave, osepia omembrɨ supave; yɨpɨve rumo osẽ caruguar ichui.

³¹Jesús oyevɨ oso Tiro ɨvɨ sui. Ipare osasa Sidón rupi oso, ambuae tecua eta Decápolis ɨvɨ rupi avei. Ichui oyepota ɨpa Galilea ve.

³²Aheve mbɨa ndayapɨsai, iñehe ɨpɨtɨ-pɨtɨ vahe rerasosar: “Emondomi tẽi nde po iharɨve” ehi yuvɨreco chupe.

³³Ichui Jesús vɨraso coi cotɨmi ava sui. Aheve ocuã omonde yapɨsa pɨpe. Ipare omondo güendɨ ñapecu rese.

³⁴Ipare omahe ɨva rese, ipɨ̃tuhe pucu aipo ehi: “¡Efata!” ehi (‘timboisa’ ohesave aipo ehi).

³⁵Ahe pɨpeve voi yapɨsa tuprɨ, oñehe tuprɨ avei.

³⁶“Ndapemombehui chira ambuae upe” ehi ahe mbɨa upe. Ahe rumo oicua ucaño ité ambuae ava upe yuvɨreco.

³⁷Evocoiyase ava oyembovɨha guasusave, aipo ehi yuvɨreco: “Avɨye ité rumo mbahe sembiapo. ¡Esepia, ndayapɨsai vahe omboapɨsa, iñehe ɨpɨtɨ-pɨtɨ vahe avei omoñehengatu tuprɨ!” ehi yuvɨreco.