Maakakuṉu 7:27-37

²⁷Yiitjulu yara yalatji watjaṉu, “Wiya kuka pipirrikuṉu mantjira papa tjuṯaku yungkunytjaku, pipirriku tjanampa.” Yalatji Yiitjulu minyma palula watjaṉu, “Ngayulu Tjuwu walytja tjuṯaku, pipirri nguwanpa tjuṯaku kutju, mamu payira wantirriyalpayi, wiyaṉa nyurrangarrimpa, papa tjuṯaku nguwanpa Tjuwuwiya tjuṯaku, mamu payira wantirriyalpayi.”

²⁸Minyma paluru watjaṉu, “Yuwa kuliṉiṉanta. Wangka kutjupa ngaatjaṉanta watjaṉi. Papa tjuṯangku ngalkuṉi tiipulangka yunngu, pipirri tjuṯangku ngalkura waṉingutja.” Yalatji Minyma paluru Yiitjunya watjaṉu, “Ngayuluṉanta papa nguwanpangku ngarala nyanganyi, kukaku nguwanpa, nyuntu ngangkaritjarrangku ngayuku yuṉṯalpa palyantjaku. Ngayuku yuṉṯalpangka mamu payira wantirriyala!, ngangkari tiṉatjarrangku.”

²⁹Yiitjulu watjaṉu, “Nyuntu papa nguwanpangku ngarala nyangangi, ngayulu nyuntupa yuṉṯalpa palyantjaku. Yalatji ngayuluṉanta nyuntupa wangka kuliṉi. Palulanguru nyuntupa yuṉṯalpangka mamu paluru kuwarri wantikatiku.”

³⁰Minyma paluru ngurrakutu yankula nyangu palumpa yuṉṯalpa palyalpi mamuwiya ngarrinyingka.

³¹Palulanguru Yiitjunya ngurra Taayanya wantirra yuru Kaliliyilakutu rayitpayiki yanu, manta Tjayitanalawana, manta Tikapulitjalawanaṯarra.

³²Palulanguru Yiitjulakutuya katingu wati wangkawiya. Tjapiṉuya pampura palyantjaku.

³³Wati palunya Yiitjulu mara witira katingu yaṉangu tjuṯangka tjayiṯingka. Ngaratjunkula marangku pina kutjarra pampuṉu. Marangku tjaḻinypangka wiṯatjunkula Yiitjulu pampuṉu tjaḻinypa palumpa, wati palunya.

³⁴Yiitjulu yirra nyakula wati palula aḻṯururringkula watjaṉu, “Ipapatja.” Wangka walytja watjaṉu yalatji, “Alytjurarriwa!”

³⁵Palulanguru pina alytjurarringkula tjaa wangkatjarrarringu, palyalpi paluru wangkangu.

³⁶Palyarringanyingka yaṉangu tjuṯangku nyakula ngarala waṉingu. Yiitjulu tjananya aṉangu tjuṯangka marrkuṉu wiya ankula tjakultjunkunytjaku. Tjana kulira wantirra tjakultjurinangi, aṉangu kutjupa tjuṯawana.

³⁷Yaṉangu kutjupa tjuṯangkuya tjakulpa kulira yunypangku watjaṉingi, “Yilta, Yiitjulu tjananya pampura kanaṉi ngangkari tiṉatjarrangku. Pina pati tjuṯa, wangkawiya tjuṯaṯarra palyarinkupayi.”