Maka 7:27-37

²⁷Ba olaṉa la ia Zisu sa barikaleqe, “Lopu leana pude vagia sa ginani tadi na koburu, meke oki lania koari na siki, ba maqu poni kekenui tu sari na koburu,” gua si Asa.

²⁸“Hinokaramu Baṉara, ba sari na siki pa kauru tevolo ba hoke henai tugo sari na umumu ginani pu hoke va hoqai rina koburu,” olaṉa gua sa barikaleqe.

²⁹Ke zama se Zisu koasa, “Sina gua asa sa mua inolaṉa, ke mamu pule la pa mua vetu. Sa tomate kaleana si ele taluarae tu koasa tumu vineki,” gua si Asa.

³⁰Pule la si asa pa nana vetu, meke dogoria sa sa tuna korapa eko nana pa nana teqe. Ele luara ia tu sa tomate kaleana si asa.

³¹Taluarae se Zisu koari na popoa pa Taea, meke ene pa korapa Saedoni, meke gore la pa Kopi Qaleli, meke la koasa pinaqaha popoa Dikapolisi.

³²Vasina si turaṉa mae nia ri kaiqa tie koe Zisu si keke tie sapu nuli, meke lopu boka zama valeana, meke tepa ososo nia rini se Zisu pude va opo nia limana meke salaṉia, gua.

³³Ke turaṉa vata kalea Zisu sa tie, seu koasa vinarigara tie, meke va nuquru ni kakarutuna Sa sari na taliṉana. Beto si va boboso nia loro Sa sa kakarutuna, meke tiqua Sa sa meana sa tie.

³⁴Meke eṉa sage la pa Maṉauru se Zisu, meke siṉo maṉini, meke zama la koasa tie, “Epipata,” sa ginuana si Mu tukele! gua.

³⁵Koasa totoso tugo asa si boka avavosae sa tie, meke sa meana si ta rupaha, meke podalae zama va bakala si asa.

³⁶Meke tozi ni Zisu sari na tie pude lopu vivinei nia pa tie gua sapu ta evaṉa, ba totoso tozi pilipule ni Sa pude di lopu tozia gua, si la urahae valeana nia tu rini sa inavosona.

³⁷Meke magasa hola sari doduru tie, “Doduru tiṉitoṉa sapu taveti sa tie hie, si tavete valeana betoi Sa. Asa sapu nuli si va avavosae ia Sa, meke sapu poka si zama,” gua si arini.