Mak 6:4-14

⁴O Iesu i watungi tandet lena, “Di ser ru a poropet una kum se tamon, ikut det ut una nun a tamon, a kum kukunu ma det kai una nun a rumu ka det ru i.”

⁵O Iesu ke pam lar pas lako susut na utna na ukisin tiro iai, ikut i ubek aru lamano una pak na misait, ra i ulangolango pas det.

⁶I kisin, uni ka det nurnur uni. Numur o Iesu i wan nanan una kum tamon, ra i ususer a taro.

⁷I kabo pas a noino ma aru nat na ususer, ra i tulu ru det aruru, ma i pitar a dekdek tandet sur det in lakro ru a kum laulau na nion.

⁸I watungi tandet lena, “Gong mot los tu utna una numot a inawan, mot in losi kut in nubuku. Gong mot los lako utna na inangon, gong tu rat ma gong mot silapo tu mani una numot a kum malu.

⁹Mot in pas aru su, ikut gong mot los tar tin namalu na kelkeles.

¹⁰Ra mot in nanpat tiro un tu rumu, mot in kis ut tiro iai tuk una bung ra mot in nan gusun a tamon ra.

¹¹Ra a taro tagun tu tamon ka det in gas pas mot, ma ka det in longoro anumot a wasiso, ra mot in nan gusun a tamon ra, mot in tang ru a kubus gusun a kikimot. Mot in tang ru a kubus sur a ukinalong na utumarong torom det.”

¹²Ra det wan ma det warawai torom a taro, sur det in nukpukus.

¹³Ma det lakro ru a susut na laulau na nion, ma det talus a susut na misait nama wel, ma det ulangolango pas det.

¹⁴O king Erod i longoro a wasiso un o Iesu, uni a taro rop det sa tasmani. Ara taro det watungi uni lena, “A musano ra, i o Jon a Tene Baptaiso, i sa laun melet gusun a minat. I mo ra, i pam a kum utna na ukisin.”