Maluko 6:4-14

⁴Yesu kawalongela, “Mtula ndagu kotegelezigwa kila hanhu, lakini hategelezigwa ukayake na kwa ndugu zake, na kwa wanhu wa lukolo lwake mwenyego.”

⁵Yesu hatendile unzonza wowose, ila kawekila makono watamu kidogo na kawahonya.

⁶Yesu kakanganya ng'hani kwavija wanhu wakala waduhu kutamanila. Abaho Yesu kachola mna ivijiji vili behi, na kasonga kuwafundiza wanhu.

⁷Kawakema wanahina longo na wabili, kawatuma wabili wabili, na kawagwaa udahi wa kulava vinyamkela.

⁸Kawalongela, “Sekemusole kinhu chochose, ila mkongoja wiiyeka. Sekemusole gate hebu mkoba hebu sente mkibindo.

⁹Valeni vilatu, lakini sekemusole kiwalo kiyagwe.

¹⁰Hanhu hohose honda mubokeligwe, kaleni aho mbaka vonda musegele.

¹¹Mwahavika kudibuga jojose na wanhu wa aho wahalema kuwabokela hebu kuwategeleza, segeleni na kung'huseni matimbwisi geli mmagulu genu muladi iwe kilaguso kamba wawatendela nzambi.”

¹²Avo wasegela na kuwapetela wanhu waleke nzambi zao.

¹³Wawalava vinyamkela wengi na kuwabakaza mavuta wanhu wengi wakalile watamu na kuwahonya.

¹⁴Mndewa Helode kahulika mbuli azo zose, kwavija twaga da Yesu dikala dijuwike kila hanhu. Wanhu wayagwe wakala wolonga, “Yohana Mbatizaji kazilibuka kulawa kwa wafile, lekaavo kana udahi wa kutenda unzonza.”