Mak 6

1

2

3

4

5

6

7

8

9

10

11

12

13

14

15

16

¹Urik Jisas kuyanga oson or halaha ol orin tiyandari ma ondo nga kotontlo orhik limu ira.

²Am Sabat wolok si narik Judama lotu undari akak li layi mashi Wasilakahin ormu ewesawera. Mashin or sawerik ma musha mendek li misihi li lishnyafaha limu mbara, �Ma roto mashi toso mbeek or lar? Hishiyarinda orhi oson lawe orin har? Mberemhi nombok mbele mbele ma undahi ambu ondo er nga or undu?� Karem li mbaha orin limu wapkava hishira.

³Uhu limu mbara, �Ma roto akan unda ma ri. Mariahi jikisi ria. Jimatama orhi tol lindu te, Jems, Josep, Judas, Saimon karem. Jikaha orhi tol nir nga lindu te. Hako mberemhi mashi tos ter or sawendua?� Karem li mbaha orin limu kumaifara.

⁴Karem li mbarik Jisas mu mbara, �Profet ondo yanga yanga amber hom hi lihin hauowenda lir. Hako kotontlo lihi nga mahasanje jikanoka lihi nga mbeek lirin rupshinda ambu lir.�

⁵Erem si nari osik Jisas mbeek kotontlo orhi orok mbele las ma undahi ambu ondon mushak uri ambu ri, wahau. Hako ma ol kavamisindari laptonom or mbarik jivik nari lir.

⁶Mashi os or saweri oson li misindiyari ambu osik wavu musha mushak ormu hishira. Uhu yanga yangak or yaha mashi Avui Wasilakahin ormu laha saweyara.

⁷Jisas ma 12-pela ondon or usharik li rarik frijipmba frijipmbak or mbashirik limu ira. Uhu kwambu orhin lirin or hashirik avak wasimalengamba os man tolondari ondon hi orhik li mbru ermbekurik or mbashirik limu ira.

⁸Uhu lirin normu saukawera, �Jir avak kombe nom ji toloho, kowe os ji falenda nom nga kumba ari er nga ji falehe tapas ji ika. Hako akwa, ya, kowe lal nga ji laha iwa hala.

¹⁰Os ji ihi kuyanga lasik ji talawa, aka os ji i liwa orokop ji liyaha jivai ika.

¹¹Hako os mashi os ji sawewan li turaha jirin armek li u nahi ambu, yanga oson ji halaha kumba jeren ji narka lafakaha ji ika. Ushinak lir avak li hishihi li mba, �Nir angop mbele kava las ni uwa nir,� karem li mbaka.�

¹²Karem or mbarik ma ol orin tiyandari ma ondo li ihi mashin limu sawera karem, �Avak kavakava os ji undan ji heyehe ji mba, �Kas karem a uri kavan a uri sir.� Karem ji mbaha sunguwavu jihin ji tormbleka!�

¹³Karem li mbaha wasimalengamba ol man tolondari ondon li mbru ermberik tulu iri lir. Uhu ma ol kavamisindarin wel ukuk li ngoroho li tarik jivik nari lir.

¹⁴Ma amber mbele mbele ol Jisas uri ondo nom li mbarik king Herot oto mashi os li mbari oson er nga misiri ri. Ma lal Jisasin karem mbari lir, �Wa Jon man fak tolofalendari ma oto indiyok usahari or mo? Uhu kwambu nga nor naha mbele mbele lerawun landar?�

¹⁵Hako lal olmu mbara, �Wahau, or profet Elaijak nakwa ri.� Hako lal olmu mbara, �Or profet mas lerawu Avui Wasilakahin landari ma ondo hom nandari lar oria,� karem limu mbara.

¹⁶Hako Herot mashi os Jisasin li mbari mashi oson or misihi normu mbara, �Ma orto Jon hulaima nokopman fak tolofalendari ma ri. Jekapnashi orhin angop a koroshirik hari ri. Hako ter ormu indiyok usahakwak nakwa ria,� karem ormu mbara.

¹⁷Herot os mas Jonin or mandingormeri nombo karem, Herot maha orhi Filiphi nokove oson ormu masnalara. Nokove oso hi sihi Herodias osira. Ushirik Jon taha ormu mbara, �Mir maha mihi Filip or liwak mi heyeshihi nokove orhi oson mi masnalawa kas tolowa ambu sir.� Karem or mbarik Herodias oso wavu sihi kavak nari sir. Ushirik Herot heyehe sirin or hokovikmbaha ma lal or mbashirik li ihi Jonin li toloho kuvu kwambuk li ishi laha krawu akak li eweshirik ormu lira.

¹⁹Hako nokove oso Jonin er si wapkava hishihi orin si mandingormekmbaha hishiri sir. Hako sir mbeek orin mandingormendahik nari ambu sir. Mberem ushirik?

²⁰Herot Jonin ajendari ri. Angop or heyendari ri, Jon ma jivi misokome Avui Wasilakahik ma worna mak nandari ri. Uhu Herot mashi Jonhin misikurik nandari ri. Mashi orhin or misiri wolo wavu musha mendek hishindari ri.

²¹Hako Herodias Jonin er si wapkava hishihi nombo las si eweri karem. Herot nijava orhi os orin si wari wolo oson indiyok or hishihi hiyawu laka las ormu ura. Uhu ma ol orin jelyandari ma nga ma ol maifuk mbarik awun li undari ma nga malakama ol provins Galilik fehendari nga or usharik limu talandirsara.

²²Uhu li lihi arik Herodias jikisnokopji sihi oso si taha si mblarik Herot nga ma ol er nga li liri ondo nga er limu rupshi mendera. Urik Herot nokopminyongo oson or sawehe ormu mbara, �Nyi mblawa jivi mendek osmu nanduwa. Uwosik mbele las nyi lakmbaha nyi hishiwa avak nyirin a hakwa nira.�

²³Uhu mainkwambu las or sawehe ormu mbara, �Omendingak amu sawenduwa, os mbele las nyi lakwak nyi siliwa avak a hakwa nira. Os nyi mba, misambi anhin nindik a tlehe yokon nyirin a ha, karem nyi mba nahi, avak erem a ukwa nira.�

²⁴Karem or mbarik nokopminyongo oso si layihi nijava sihin simu silira, �Mamai, mbele menden avak a mbanak or haku?� Karem si mbarik simu sawera, �Indiyok layi sawenak Jon hulaima nokopman fak tolofalenda ma oto masiji orhin or haka.�

²⁵Urik nokopminyongo oso si layi Herotin simu sawera, os nijava sihi si mbari hom. �Ana rupshiwa karem, Jon or man fak tolofalenda ma masiji orhin bainatik koroho hambiyak mi ewehe lahara anin haka.�

²⁶Karem si mbarik Herot sunguwavu orhi kavak er nari sir. Hako or angop mainkwambu las or mbari osik os or mbari oson mbeek or halakurik nari ambu sir. Os erem or u nahi, ma ol or nga ari ondo avak li heyenak or humblaraku, karem or hishihi os si mbari hom uri ri.

²⁷Uhu awun undari ma orhi lar or mbashirik krawu akak or layihi Jonhi jekapnashin or koroho

²⁸ma masiji oson hambiyak or ewehe nokopminyongo osonjik ormu laharara. Urik sir nga mu nijava sihin hara.

²⁹Urik Jonin tiyandari ma ondo mbele mbele Herot Jonin or uri mashi oson li misihi li taha maninimba Jonhin li laha ihi limu wakor owera.

³⁰Urik aposel ondo indiyok Jisasik li raha mbele mbele os li undarin orin limu sawera.

³¹Urik Jisas nga li lirik ma musha mendek limu terei tererara. Urik li akmbaha li uri, wahau. Ma mor tirsaha terei tererari kom. Urik Jisas mu mbara, �Wa, ka ni i yanga lasik ni i nivai limasika.�

³²Karem or mbaha botik li lawuhu lirtonom yanga os ma ngashi ambu mishi orok limu ira.

³³Li irik ma mushak li sishi heyerik olmu ira. Urik orok fehendari ma ondo masmas nombokop olmu shirinyambar ira, yanga os Jisas ikurik or iri yanga orok li ikmbahan.

³⁴Urik Jisas yanga orok or taha botin or halaha misambik or takaha ma ondon or heyehe lirnjik ormu holo mendera. Mberem ushirik? Or heyeri lir sipsip ol ma ngashi ambu hom olmu naha sira. Urik orok or sihi mashin lirin ormu sawera.

³⁵Mashin or sawehe am si homirik ol orin tiyandari ma ondo li taha limu mbara, �Am homir te, yanga toso ma ngashi ambu re.

³⁶Tondon mbashinak yanga yangak li ihi akwa lal li frungawuhu li awa.�

³⁷Karem li mbarik ormu mbara, �Wa, jihinjik akwan ji hanak li aka.� Urik olmu mbara, �Mberem ni ukwa ambu re. Ya mbele mendek akwan ni frungawuhu ni hanak li aku?�

³⁸Karem li mbarik ormu silira, �Jir akwa lal nga nandaj? Kolok ji i heye!� Karem or mbarik li i heyeri, akwa mushak nari ambu lir. Lir bret tostava yeje hom nga foome frijip nom nga olmu wara.

³⁹Urik ormu mbara, �Wa ambehoma, avak ma ondon mbashinak lihi lihik misambik li lika.�

⁴⁰Urik ma ondo amber misambik limu raka lira. Lal 100-ik li lirik, lal 50-k karem limu lira.

⁴¹Urik Jisas bret ondo nga foome ovro nga nor tolo lalawuhu Avui orhin armesarmek ormu mbara. Ushihi bretin or toltavaha ma orin tiyandari ondon or harik olmu ma ondon hara. Ushihi foome nga li humasishirik ma ondo olmu ara.

⁴²Urik ma ondo amber akwan er li aha limu krehera.

⁴³Urik akwa sumbuyambun er li lahara tirsaha serkawu 12-pelak li wolorik hojeri lir.

⁴⁴Hako ma ol orok lihi ari ma ondo 5,000-ik nari lira.

⁴⁵Urik Jisas ma ol orin tiyandari ma ondon ormu mbara, �Jir botik ji lawuhu masmas fa mambu kasauyok kuyanga Betsaidak ji maifuhu inak a ra. Ana lihi ma rondon a mbashinak li inak amu randu.�

⁴⁶Ma ondon am or mbashirik li irik ortonom Avui orhin or sawekurik telembak ormu lawura.

⁴⁷Telembak or lawurik am simu homira. Urik bot os li iri oso am si ihi fa nindik simu nara. Hako Jisas ortonom ormu fa mambuk sira.

⁴⁸Uhu or heyerik suwa si rasarik bot oson li laha li ikmbaha li uri osmu kava ura. Urik olmu lerawu mendek ura. Uhu am harakurik nar te. Urik Jisas fa heyek or eseihi lirin or tikrikmbaha ormu ura.

⁴⁹Urik orin tiyandari ma ondo orin li heyeri ormu fa heyek esehe ira. Li heyehe limu mbara, �Wasi lar ori te!� Karem li mbaha limu ajera.

⁵⁰Li ajerik Jisas kolomalok ormu mbara, �Ji ajewa hala. An mu randu te!�

⁵¹Karem or mbaha botik or layi lir nga nakrem ormu lira. Urik kolok suwa mendek er simu nara. Urik limu lishnya mendera.

⁵²Jisas akwan or harik li ari oso angop li heyeri sir. Hako lir mbeek os or urin yariri ambu lir. Wavu lihi angop fendele menderi lir.

⁵³Jisas nga ol orin tiyandari ondo nga leukun li mbuhu yanga Genesaretik limu lawura.

⁵⁴Li lawuhu sirik kolok ma ol yanga orok fehendari Jisasin limu heilara.

⁵⁵Uhu os or tarin kolomalok yanga yangak li mainharik ma mushak ma ol kavamisindarin Jisasik limu laharara, or mbanak jivik li nakmbahan.

⁵⁶Uhu yanga os or iri mishik ol kavamisindarin nombo sumbuk li eweshirik limu wara. Urik Jisas irik limu silira, �Mi halanak kowe mihi kas ni toloho jivik ni naka.� Erem li mbaha kowe orhi nom li toloho jivik limu nara.