Markus 6

1

2

3

4

5

6

7

8

9

10

11

12

13

14

15

16

¹A ta nekabalin ni Hesus ta iten a nagtatugut kid na ituldu na kiden, te umange kid ta lugar na en hapa la.

²A sangaw ta araw na agimmang a umange kid nakigimung ta kapilya, a nangituldu hapa i Hesus ta addu na tolay. A pake nepagpaka-lat da hapa, te kalugaran da haman, a papa-nun na makkamu mangituldu, a yen ta nagimpopohut kid na ta pagpaka-lat da tentu. “Inya hud ya nangalapan na ta kumanin na bida?” kun na takday. “A anu hud ya ikayat na uhohugan?” kunna hapa na takday. “A anu kawagan na ta itta ya pakapangwa na?” kunna para na takday.

³A gafu ta kalugaran da ikid na kagitta da en napanglaw a aweda kinurug, a nedadula da. “Bakkan hud ta anak la na kalapintero ikid ni Mariya en nga kagitta tam napanglaw? Yaga kagitta tam hapa ya kabagis na kiden Santiago, ikid ni Hose, ikid ni Simon, ikid ni Hudas, ikid na wāgi na kiden nga babay nga magyan tekitam sin,” kunda.

⁴Ammi ya uhohug ni Hesus tekid a “Kakurugan ta madayawan ya paguhohugan na Namaratu ta ngamin kiden lugar ammi fwera la ta lugar na en hapa la ikid na kahulun na kiden ta bali na,” kunna.

⁵A pake nepagpaka-lat na hapa ya kawan na pangurug da tentu, a yen ta assang la ya nepaita na ta pakapangwa na tekid, te assang la ya pinagmappya na ta magtakit nga sini-ged na ta kamat na. A sangaw sinaned na ya kadwan kiden lugar na babali petta mangituldu ta tolay kiden.

⁷A sangaw pinagammung ni Hesus ya mafulu duwa kiden ituldu na, a pinasinapan na kid ta pakapangwa na, petta itta ya mabalin da nga magpatugut ta anitu na seanitu kiden, a sinagduwa na kid nga ange mangipadangag.

⁸“Awemuy ihulun ya gamgamak muy, fwera la ta sarukud muy ikid na pagsapatos muy. A awemuy hapa magbalun ta kanan muy ikid na pirak muy ikid na tali na barawasi muy.

¹⁰A maski am inya sangaw ya magpadulot tekamuy ta bali da a magyan kam ten abat ta magtugut kam.

¹¹A am awan pulus ta magpadulot tekamuy ikid na magdangag ta uhohug muy a pagtugutān muy kid mantu, a azin muy ya lafu na agyan da ta takki muy kiden,” kunna tekid.

¹²A nagtatugut kid na nga ange mangipadangag, a nepadangag da ta magbabawi mina ya tolay kiden ta pagliwat da.

¹³A addu hapa ya pinatugut da nga anitu ta seanitu kiden, a addu hapa na magtatākit ya linugudan da ta denu a nagmappya kid.

¹⁴A sangaw nadamag ni Ari en Herud ya ngamin kiden tarabaku ni Hesus, te sigida bibidan na tolay kiden ya ngagan na, a lavlavunan da am inya ya katolay na. “Intu hala i Hwanen nga nangzigut ta tolay kiden, a yen ta itta ya pakapangwa na, te natolay hala ta pasi na en,” kun na kadwan.

¹⁵Ammi ya uray kadwan a “Intu hala ya aglavunen Eliyas, te nagtoli hala ta lutakin,” kunda. A ta kadwan para a “Kakurugan ta aglavun ta kuman na aglavun kiden ta palungu araw,” kunda.

¹⁶Ammi ta nepakadamag ni Herud tentu a “Intu malat i Hwanen nga pinaputulan ku ta kwa en sina, a natolay hala,” kunna.

¹⁷A kunna ten ya nebar na te ta katolay para la ni Hwan a nangadallaw i Herud, te ginubatan na i Herodias nga atawa na kabagis na en Felipe. A yen ta natotoli i Hwan tentu petta ihuya na ya tinarabaku na en. “Nakaliwat kan ta Namaratu ewan te ginubatam haman ya atawa na kabagis men,” kunna te Herud. A yen ta masikan hapa ya pangikatupag ni Herodias te Hwan, a ikayat na ta napapasi mina. Ammi awan ta nabalin na, te nagtalaw i Herud nga mangpapasi tentu, te yaga amu na ta mappya na tolay na Namaratu nga awan ta liwat. A yen ta kengan ni Herud ya angat na, a nepebalud na la gafu ta atawa na en. A kanayun nagpatotoli ta agyan na kabaludan na en petta dangagan na ya bida na, ammi napopoyung hala ya nonot ni Herud gafu ta bida ni Hwan tentu.

²¹A sangaw ta nekabalud para la ni Hwan a dumatang ya araw na panadamdaman ni Herud ta araw na nekeanak na en, a namadday hapa ta pagpamakan na ta opisyales na kiden ikid na suddalu na kiden pase naba-nang kiden tolay nga taga Galileya.

²²A ye-yen hapa na araw ya pakagāsāt na babbayen petta papapasi na i Hwan, te umange nagsala ya anak na en nga balatang ta atubang ni Heruden ikid na sangaili na kiden, a pake natalakan kid ta pagsala na. A ya uhohug ni Herud tentu a, “Maski am anu ya ikayat mu, Aboy, a adangam la teyak te iatad ku hala teko.

²³A pagasingan ta Dyos am awek iatad teko ya ngamin adangam teyak maski abat ta gadwa na ngamin pagariyan ku,” kunna.

²⁴A nagtugut la bit ya balatangen, te enna pinohutan te hina na en am anu mina ya adangan na. A ya uhohug na hina na en tentu a “Maski intu la adangam ya ulu ni Hwan en,” kunna tentu.

²⁵A alistu mantu nagtoli ya balatangen ta agyan na ari en, a “Iatad mu mantu teyak ya ulu ni Hwan en, te pedatang mun ta isin nga melātuk,” kunna.

²⁶A pake nagdamdam hapa ya ari en ta inadang na en, ammi awena ikayat ilogot ya balatangen gafu ta kari na en tentu, yaga amat na hapa ta sangaili na kiden.

²⁷A dinob na mantu ya suddalu en naggwardya petta enna papasin i Hwan, yaga nebar na ta idatang na hapa ya ulu na en. Enna mantu pinutulan ta agyan na agbaludanen,

²⁸a magananwan la a nedatang nan ya ulu na en nga nelātuk, a negawat da ta balatangen, otturu negawat na hapa te hina na en.

²⁹A ta nepakadamag na ituldu kiden ni Hwan ta pangpapasi da tentu a enda inalap ya bari na en, kapye da netanam.

³⁰A sangaw ta pagtoli na turin kiden ni Hesus nga dinob na ange mangipadangag, a binida da tentu ya ngamin tinarabaku da ikid na netuldu da.

³¹A gafu ta kanayun timahud ya addu na tolay tekid a aweda matagop ya mangan, a “Mappya ta limillik kitam bit ta isin petta ik-ikitam la bit, te magibannag kitam,” kun ni Hesus ta turin na kiden.

³²A naglalugan kid mantu ta barangay, te ange kid mina ta awan ta totolay ta dammang na alugen.

³³Ammi kadulayan na te neitan na kid na kadwan kiden tolay ta nepagtugut da en. A gafu ta amu da kid a enda kid inakkawan ta lehut na alugen, a naghahulun hapa tekid ya addu na tolay nga taga ili kiden nga tinaliban da. A naunnanan da ig Hesus ta datangan da en.

³⁴A ta datang nig Hesus a dana ittan hala ten ya tolay kiden nga nagapag tentu. A ta nepakaita ni Hesus ta kaddu da a timalin hapa ya allak na tekid, te kimongkong kid ta kuman na awan ta magtaron tekid. A namegafu ha nangituldu tekid ta addu.

³⁵A ta furab a nagburung ya ituldu na kiden ta tolay kiden, a enda nebar te Hesus, “Mappya, Afu, ta patugutam ya tolay kidin, petta e kid gumatang ta pamuhab da ta babali kidewan, te furab na a awan haman ta pangalapan ta isin,” kunda.

³⁷“A ikamuy na mina ya mangatad ta kanan da,” kunna hapa tekid. “A had mantu ya pangalapan mi ta awan bababang na pirak, petta igatang mi ta ipakan mi tekid?” kunda hapa.

³⁸“A emmuy mantu itan am piga ya binalun na tolay kiden,” kunna ha tekid, a umange kid. A ta pagtoli dan a “Intu la itta sin ya lima na pan ikid na dwahukal na ikan,” kunda hapa.

³⁹“A pagammungan muy mantu ya tolay kiden, a pagtuttudan muy kid ta kaddat kidina,” kunna ha tekid.

⁴⁰A gafu ta kumanen a gituttudan kid nga naammungan ta taglimafulu ikid na tagmagatut,

⁴¹a inalap ni Hesus ya lima kiden na pan ikid na dwahukal na ikan, kapye na tumangad makimallak. A sangaw ginadgadwa na ya pan kiden ikid na ikan kiden, kapye na kid negawat ta ituldu na kiden petta ikid ya mangisaned ta tolay kiden.

⁴²A sa nagkakan kid abat ta nabattug kid.

⁴³A tekid na nabalin nagkakan a pinannu da ya mafulu duwa na la-ba ta huna na tolay kiden.

⁴⁴A ya kaddu na nagkakan kiden a limaribu kid na lālāki fwera ta bābāy ikid na anak.

⁴⁵A tekiden nabalin a pinapolu ni Hesus ya ituldu na kiden ta barangay, petta mapolu kid ta dammang ta ili na Betsayda, te mapozan la bit petta patugutan na ya tolay kiden.

⁴⁶A tentun nakapatugut tekid a gimon hapa tatakday ta bagetay petta makimallak.

⁴⁷A sangaw ta hiklam a nakatangngan ya barangay na ituldu na kiden ta alugen, a tatakday la i Hesus ta bagetayen.

⁴⁸Ammi naita na ta nazigatan kid nagtagwan, te atubangan na kid hapa na paddad. A tentu nagkarawan a umange i Hesus tekid nga nagpapa-yat ta danumen. A taliban na kid mina,

⁴⁹ammi ta nepakaita da tentu nga magpapa-yat ta danum en a pahig da ta datay, a kumahkahaw kid na,

⁵⁰te sa ikid nga nakaita tentu a gisatalaw kid na. Ammi alistu hapa i Hesus nga nagayag tekid, “Awemuy la magtalaw te iyakin yan,” kunna.

⁵¹A tentu en hapa nakipaglugan tekid a ka-ma la nagimmang na ya paddaden, a pake masikan ya pagpaka-lat da tentu.

⁵²Te maski am naita dan ya pagpakaddu na ta pan kiden a aweda para la naawatan ya pakapangwa na, te aweda netug ta nonot da.

⁵³A ta nepakadakit dan a itta kid na ta lutak na Genesaret, a negon da ya barangay da en.

⁵⁴A tekiden nakadagut ta barangayen a alistu nalasin na kid na lumugar kiden.

⁵⁵A nagbabilag na ya tolay kiden ta babali kiden, te enda inalap ya ngamin kiden nagtatākit, a nedatang da kid giiddan ta dapan da kiden ta nagyanan ni Hesus.

⁵⁶A maski had sin na ili ikid na lugar ya umeyan na a enda nekahad tentu ya nagtatākit kiden, a maski netabnak da kid la ta tātangngan na dapun kiden petta maita na kid. A nakimemallak kid ta si-gedan da la ya gayadan na barawasi na en. A sa nagmappya hapa ya ngamin kiden nakasi-ged tentu.