1Wakathi Yinsa aari osaruwaavo nnyupa yoosifwiwamo, nakhiyoni awe mmote khumuuza yoori: “Mwaaliimu nkoona! Maweni mawulweene toono na manyupa ooshapweyisana toono!”
2Yinsa khunjipu yoori: “Woona manyupa mawulumawulu apa? Khalinlawa liwe wiiya vatulu wa liwe nzaaya lihinttelaaye opwechiwa.”
3Yinsa aarettiye eekhaliye vamwaako Oluveera omaasho wa nyuupa yoosifwiwamo, Pheeturu, Yaakhumpa, Yaahaya na Antere khumuuzela othetekele yoori:
4“Onuuze, wakathi-ni enttelaaye orettikhana vitthu zaya epo, na enttela wiiyavo alama-ni yoothoonyeza yoori zooshi zasaleela orettikhana?”
5Yinsa khuwooza yoori: “Phoole yoori mwihihatiwe ti hatha ntthu.
6Maana awaatta anta khwa nzina laka alupaka yoori: ‘Miiyo ki Al-Masiihu!’ na aniwaahata atthu awaatta.
7Amana mwisiila viittha ama hapari za viittha, mwihoove maana epo ena zoorettikhana, ila nalelo kinttela wiiya mwiisho.
8Khapila moote enlawa yoomanane khapila kiina, na ofwalume onlawa woomanane ofwalume nkina. Zinlawa zeeyevo visikinyaatthi khwa phantte zoofwarikhana na jala. Epo zaya yaazo ya vitthu za olwaaza.
9Mweeyo mwiiyane phoole, maana mwinlawa mwenkheleliwe wa anamaphuka na mwinlawa mwajaphiwe mmasinakooka, na mwilawaniwe wa misatoro na wa afwalume, mwaasa wa miiyo, yoori mwiiye mashaahiti.
10Ila enihithajiya olaleyiwa hapari zooshapweya khapula khwa khapila zooshi.
11Amana mwithuuliwa olawa ofukiwa na ophukiwa, mwihishukulikhe etthu yoolupa, ila ethiito mwinttelaaye winkhiwa wakathi aya otthuupo mwilupe ethiito, maana khahiyo mweeyo mwinttakhulaaye, ila Rooho Ttakatthiifu.
12Ttwi mmote onlawa anleve ttwiiye yoori ooliwe, na paapa onleva mwanawe. Aana anlawa awaazukuluwele apapa zaya awoole.
13Atthu ooshi anttela owiinani mwaasa wa miiyo. Ila otule anttelaaye ovilela mpakha mwiisho, ontta wuusurukha.
14Amana moona okufuru wa woopisa wa pala nhali woohifwayi wiiyamo (ansomaaye ti emweeleye), aphano apale anttelaaye wiiya Yudeya atthirele omwaako.
15Otule anttelaaye wiiya vatulu wa nyuupa ahiishukhevo yoori alawe owawe, wala ahivire othuula etthu ya nnyupa mwawe.
16Otule aniiyaaye ntthuttu ahirutele onti yoori athuule juupa yawe.
17Ootakhaliwa aakha apale anttelaaye osikaniwa ari awiimittha ama eettaka waamwisa!
18Mwinvekele Nluku yoori vitthu zaya epo ehirettikhane mwiita.
19Maana, siikhu zaya epo onttela wiiyavo ohoowa ohineeyekevo thanku Nluku ompe olumwenku, na khunteela opuwa nkina nkhama opo.
20Eriwaka Nluku khaafupheyisiye siikhu zaya epo, khaavo aari weettelaaye wiiya haayi, ila mwaasa wa apale awathawuliyeeyo, afupheyisa siikhu zaya epo.
21Aphano, amana ntthu awuuzani yoori: ‘Al-Masiihu otu ariiye apha!’ ama ‘Moone, otule ari okhule!’ mwihikhupali.
22Maana anlawa apuwe Al-Masiihu oojipanka na manapiyu oojipanka anttelaaye othoonyeza alama na vitthu zootikinisa yoori kusapi awahi owaattettekha ananthawuliwa.
23Mweeyo mwiiyane phoole! Miiyo kiniwuuzani zooshi epo zihinarettikhane.
24Ila siikhu zaya epo, paata ya pala eto ya ohoowa, njuwa linttela oriipa na mweezi onttela olikha waara.
25Matthottowa akhwe pinkuuni na kuvu ziriiye pinkuuni zinttela osakhinyeya.
26Aphano, mwinttela omoona Mwaana wa Pinaatamu mmawiku na owahi nwulweene na siifwa.
27Ye onttela oruma malayikha awe khwa phantte nne zooshi za nkerekhere wa olumwenku mpakha nkerekhere ya pinkuuni yoori awaakusanye ananthawuliwa awe.
28“Mwijinozele nlikaniso wa nfikeera. Amana virapi zaya zinyoowela na mathapa khwaaza ophutuwela enthoonyeza yoori mwiita ontta waattamela.
29Etthiipo theenya mweeyo, amana moona vitthu epo zeettaka orettikhana, mwijuwe yoori ye ori kharipu ya va milako.
30Miiyo kiniwuuzani khweele yoori khapila eti kinvira vitthu epi zihirettikhaneeni.
31Pinku na vathi zooshi zinteela ovira, ila mattakhuzi aka khanviraru.
32Ila monkoni wa siikhu ama wakathi khina anjuwaaye; wala malayikha pinkuuni wala Mwaana, woohiiyi Paapa.
33Phoole, mwiiye woojeekesela, maana khamwinjuwa ofiya wa wakathi aya opo.
34Eri nkhama ntthu anlikhaaye nyuupa yawe khuretta safwari ya peetiwene; ila ahinalawe, khuwaalikhela ofwalume, akarumeya awe wakhula mmote sharuthi yawe, khunruma namweekesela yoori asale aweekeselaka.
35Tiito, mwijeekesele, maana mweeyo khamwinjuwa wakathi mweenyewe nyuupa anttelaaye oruti; enttela wiiya njuwa looveva, osikhu layili, lifwajiri ama supu.
36Amana ye ata woohileezi, ti ahiwaasikane eettaka olala.
37Epile kiniwuuzaanini, kiniwuuzani mooshi: ‘Mwijeekesele!’”
