Luka 9:16-37

¹⁶poroŋ memoc â opâ qowi jajahec rorâ sambâŋko fime fehame jambuŋkewec. Jambuŋkerâ poroŋ bazurâ motec jareme jaŋe bârâwiŋnerâ ŋic jarembiŋ.

¹⁷Eme jaŋe mâmâc sasawa nâ gapec efârembiŋ. Eme tiwâne ŋerawec, i ropie hurâ sasac 12 fusewec.

¹⁸Juku Jesu e motecfâc‐ticne jaŋehec buc juhuc nunumu gie bawec. Eku wio‐jarerâ muwec: “Ŋic jaŋe nore mo mueŋgopieŋ?”

¹⁹Wio‐jareme ʒiŋuc âzâcnembiŋ: “Gacne jaŋe Johane Miti Opâ fufuŋke mugareeŋgopieŋ, gâcne jaŋe Elia mugareeŋgopieŋ, â gâcne jaŋe porofete mimiŋne moczi ɋârewec jukac, iŋuc mugareeŋgopieŋ.”

²⁰Mupie jaŋacne indiŋ‐joparâ muwec, “Â ŋoŋe ine nore mo mueŋgopieŋ?” Eme Petorozi ʒiŋuc muwec: “Go Anuturaonec Kristo jâmbâŋ.”

²¹Mume ŋic moc mi mufua‐jareniŋte mic muac sanaŋne ejarewec.

²²Erâ ʒiŋuc ʒuhuckerâ jazawec: “Ŋic Fâri Wâtuŋnezi juku ʒâic serereŋ bocjaha manaocmu. Soŋaŋ â taha bapa micne â miti qaqazu jaŋe e kiarao qikiŋnepie qame hâmorâ ʒoaŋ jahec â moc eha fahareocmu.”

²³Jesu e ŋic mâmâc sâko‐jeŋic ʒiŋuc jazawec: “Ŋic moczi no bâjâpecnuzo murâ maŋ sahac‐ticnere dâŋ râpeckerâ maripoŋ‐ticne ʒoaŋne ʒoaŋne hâporâ bâjâpecnuzejec.

²⁴Moc e juju‐ticne sakareme sifuckecneocmu â moc e nore erâ qikiŋneme fuacneocmu.

²⁵Moc e mâreŋte wiac sasawa hure‐fâreku kinduŋ bânduŋ bajuhame juju‐ticne kihâmome sipirickeme wemo wiac fârine focneocmu?

²⁶Moc e no nahacnere me miti‐nanere maname mimi gaŋgaŋnehec eocmu, ine Ŋic Fâri Wâtuŋnezi juku Mamac‐ticne â tiri aŋelo jaŋere huririzi uucne erao riŋkehame sambâŋ sambâŋ tatamac‐ticnehec fisirâ ŋic iŋucnere iŋuc jaha maname mimi gaŋgaŋnehec eocmu.

²⁷No ine jâmbomac ŋazape mananiŋ: Domaŋgopieŋ ʒi jaŋeraonec gâcne hâmoc mi bâfuahapie Anuture Wofuŋ qâreŋ fua taniŋkeme honenʒoŋgopieŋ.”

²⁸Jesu e dâŋ i murâ juhame ʒoaŋ gie bapa 8 tarame numuocte Petoro â Johane â Jakobo rocjopame tikio fembiŋ.

²⁹Ferâ numuhame ʒâŋe mai‐ticne hawarine fuŋmoc ewec. Ehame ŋaqi‐ticne tamaerâ ɋaɋac taeŋne jâmbâŋ ewec.

³⁰Eme mi ŋic jajahec fuarâ ehec dâŋ muc manac enʒepieŋ i! Ŋic ʒâŋe‐jekic Mose â Elia.

³¹Jahe sambâŋ tatamac‐jekichec fisirâ Jesu Jerusalem haeo mâreŋko juju‐ticne jutararâ raocmu irec dâŋ mumbiŋ.

³²Muhapie Petoro â âgo jahec‐ticne jaŋe guŋte mâretec ejare‐bipieme ʒâŋe fitâcnerâ Jesu huriri qâreŋ‐ticnehec â ŋic jahec ehec domapire honec‐jopambiŋ.

³³Eme jahe razo epire Petorozi Jezu ʒiŋuc âzâcnewec: “Qaqazu, sowine ʒira juŋgopeneŋ. Irec manatec boze jahec â moc banaŋ, gore moc, Mosere moc â Eliare moc.” E dâŋ mi mana tarahuc iŋuc muwec.

³⁴Muhame karorac moczi waharâ sâoc‐jopawec. Sâoc‐joparâ foŋjopame motec jaŋe me kike fâfâc ehuc domambiŋ.

³⁵Eme karorac maŋko dâŋ ʒiŋuc fuawec: “Keci joroc Ŋokâ‐nane, ŋoŋe dâŋticne mananʒepieŋ.”

³⁶Eme dâŋ mana manahuc ʒâŋe firâ Jesu buc domame honembiŋ. Eme motec jaŋe wiac honembiŋ i dameŋ ira ŋic mi jajaza mâc maŋkerâ jumbiŋ.

³⁷Hae fureme tikionec wahapie ŋic guru sâkozi ehec bâbâfuac embiŋ.