Luk 9:16-37

¹⁶Tat angetka beret 5 aka söra yahöt mi memba suepnöŋ ui öŋgöiga kötuetköyök. Kötuetköba beret mindipköba gwarekurupŋi eŋgiiga ambazip kirip dop mendeŋda sutŋine alget.

¹⁷Sutŋine algetka körekmakörek nemba nem timbireŋ aket. Nene kitipŋi kitipŋi mosötkeri, mi gwarek yeŋön qezakögetka sakap 12 miaŋgöreŋ geba kokolak qeyök. Mewö.

¹⁸Nalö kunöŋ Jisösnöŋ nanŋök gölme kungen köuluköiga gwarekurupŋan yambuk malgetka qesim eŋgiba kewö jiyök, “Ambazipnöŋ nöŋgöra denöwö jimakze? Ni niŋia akzal?”

¹⁹Jiiga meleŋda kewö jiget, “Tosatŋan ‘Gi Jon O-melun azia akzan,’ jimakzemö, tosatŋan ‘Gi Elaija akzan,’ jimakze aka tosatŋan toroqeba kewö jimakze, ‘Gi kezapqetok azi walŋi yeŋgöreŋök kunŋan kömupnöhök wahöta maljan.’”

²⁰Mewö jigetka kewö qesim eŋgiyök, “Aka nanŋinak nöŋgöra denöwö jize? Ni niŋia akzal?” Qesim eŋgiiga Pitönöŋ meleŋda jii mörök, “Gi Anutugöreŋ Amötqeqe Toŋi Kraist akzan.” Mewö.

²¹Mewö jiiga könaŋi aukŋe jiget kunŋan mötpepuköra soŋgo köhöikŋi al eŋgiyök. Mewö.

²²Jisösnöŋ jiyök, “Suep gölmegö azi ölŋan mönö sihimbölö gwötpuk mötma. Kantrigö jitŋememe, jike nup galöm aka Köna keugö böhi yeŋön mönö andö qeba qegetka kömuma. Kömumba wehön karöbut aiga kömupnöhök wahötma.” Mewö.

²³Jisösnöŋ ambazip pakpak yeŋgöra keu kewö jii mötket, “Kunŋan nöŋgö andöne nuataŋgöba kamamgö mötzawi, yaŋön mönö nanŋi urusileŋaŋgö sihim kömbönaŋi bölöŋi andö qeiga sisitŋi megetka sihimbölö mi bisimakŋa. Mi maripomnöŋ kömumawaŋgö dop mökösöŋda ni nuataŋgöba kama.

²⁴“Kunŋan malmalŋi nanŋaŋgöra aŋgön köla nanŋi imbi-imbi maljawi, yaŋön mönö malmalŋi ölŋi jöhöi sohoma. Sohomapmö, kunŋan gölmegö malmalŋi nöŋgöra aka köleŋda tököm niŋgimawi, yaŋön mönö malmal ölŋaŋgö könaŋi miwikŋaiba köhöiba malma.

²⁵“Kunŋan gölmeŋi gölmeŋi mieŋgö öröyuaiŋi pakpak köl öröiga buŋaŋi an teköiga uruŋaŋgö malmalŋi mem sohoba silebile mala kömuiga Anutunöŋ keuŋi jim teköiga könöp sianöŋ geba uŋaŋan ayuhuiga qahö dop kölma. Sukinapŋi miaŋön mönö urusösöŋgai qahö ak waŋgima. Qahöpmahöp!

²⁶“Kunŋan nöŋgö qetni aka Buŋa keuni memba eta aljawi, i Suep gölmegö azi ölŋan mewöyök ehöröŋ kölma. Yaŋön könaŋgep Suep garata töröŋi yembuk ki etketka yeŋgö, nanŋaŋgö aka Iwiŋaŋgö asakmararaŋini eka aurume. Nalö miaŋgöreŋ azi me ambi mewöŋi mönö ehöröŋ köl waŋgima.

²⁷Nöŋön keu ölŋi kun kewö jibi mötme: Kiaŋgöreŋ kinjei, eŋgö sutŋineyök tosatŋan Anutugö bemtohoŋan asuhumawi, mi ek kutume. Jebuk mala kömupkö sihimbölöŋi qahö mötketka asuhum tiŋgiriga mi ekŋe.” Mewö.

²⁸Keu mi jiiga wehön 8:kö dop teköiga Jisösnöŋ Pitö, Jon aka Jeims eŋguaŋgita kunduŋe öŋgöba Anutu köuluköyök.

²⁹Köuluköiga miaŋgöreŋ jemesoholŋaŋgö kaisoŋgolomŋan letota tandökŋi murutŋi ahök. Malukuŋan tuat lalamŋi aka kölköl-bilikbilikŋambuk asariyök.

³⁰Miaŋgöreŋök eketka azi yahötŋan asuhuba Jisösbuk keu keu jiget. Mi Moses aka Elaija.

³¹Asakmararaŋ uruŋe asuhuba Jisösbuk keu kewö eraum mötket, “Anutunöŋ Jisös sihimbölö möta kömumapkö melaiiga eta zilaŋ Jerusalem sitinöŋ aniga areŋ miaŋön ölŋambuk ak teköma.”

³²Mewö eraum mötketmö, Pitönöŋ alayahötŋi yetpuk jeŋinan lömböriiga gaun ahöget. Ahögetmö, gaunöhök imbiŋini möta jeŋini uba Jisösgö asakmararaŋi aka azi yahöt yambuk kinohori, mi eŋgeket.

³³Eŋgeketka kinda Jisös mosötpitkö ahotka Pitönöŋ Jisösgöra jiyök, “Ketaŋamnini, neŋön kiaŋgöreŋ uru ölöwak mötzin. Miaŋgöra neŋön ölöp koum karöbut qebin: Göhö kun, Mosesgö kun aka Elaijagö kun.” Pitönöŋ mewö jiyökmö, nanŋi keuŋaŋgö könaŋi mi qahö möt kutuyök.

³⁴Mewö jiba kiniga unuŋunuŋ kunöŋ eta aumŋan esuhum eŋgiiga kousu uruŋe mala awöwöliba jönömŋini unduyök.

³⁵Jönömŋini undui kingetka kousu uruŋeyök qet kun kewö eriga mötket, “Azi ki mi nani nahöna. I ambazip amöt qem eŋgimamgöra möwölöhöm waŋgial. Mönö yaŋgö keuŋi möta malme.”

³⁶Qet miaŋön eri möta gwarek yeŋön miaŋgöreŋök uba Jisösnöŋ nanŋök kini eket. Kunduŋe yuai ekeri, miaŋgö buzupŋi mi nalö miaŋgöreŋ kude jiba keu bök malgetka kunŋan kun qahö mörök. Mewö.

³⁷Ahöba wahötketka Jisösnöŋ gwarekurupŋi karöbut yembuk kunduŋeyök eta sörökŋe ambazip kambulelembe eŋgeget.