LUKU 9:16-37

¹⁶Ben à burɛdi mɛ̀n sↄↄro kↄ̃n kpↄ̀ mɛ̀n plaaa pìnↄ sɛ̀ à a wɛ́ɛ sɛ̀ musu à aubarika dàn. Ben à lìlikↄ̃rɛ à kpà a ìbanↄa, aↄ̃ↄ kpàatɛtɛ gbɛ̃nↄnɛ.

¹⁷Aↄ̃ pↄ́ blè wà kã̀ ń píngi, ben wà à kpaaa kɛ̀ gↄ̃̀nↄ sɛ̀ɛ gbíi kuri awɛɛplaaa pà.

¹⁸Zĩkea kɛ̀ Yesu e adua kɛɛ ado, à ìbanↄ mↄ̀ wà à lè, ben à ń lá à bè: Dén gbɛ̃nↄ è be má dɛ à ũu?

¹⁹Aↄ̃ wèàla wà bè: Gbɛ̃kenↄ è be Yaaya Batisikɛrimɛ, gbɛ̃kenↄ è be Ilia, gbɛ̃kenↄ è be dↄ annabi yãanↄ doke bé à fɛ̀ɛ.

²⁰Ben à ń lá à bè: Apinↄ sↄ̃, dén eè be má dɛ a ũu? Pita wèàla à bè: Luda gbɛ̃ Mɛsayan n ũ.

²¹Ben à gìńnɛ aↄ̃ton yã pì o gbɛ̃ke maro.

²²Ben à bè dↄ: Séde Gbɛ̃ntee Nɛ́ wɛ́ɛtãmma e maamaa, gbɛ̃nsinↄ kↄ̃n sa'orikinↄ kↄ̃n ludayãdannɛrinↄ é gízi, weé à dɛ, à gurↄ aagↄ̃dee zĩ eé fɛɛ.

²³Ben à bèńnɛ ń píngi: Tó gbɛ̃ yezi à kɛ ma ìba ũ, séde à gí a zĩnda wɛ̃̀ndizi, àgↄ̃ a líkpangbãroo sɛɛ lán guu e dↄↄ nà àgↄ̃ tɛ́omazi.

²⁴Gbɛ̃ kɛ̀ yezi àgↄ̃ a wɛ̃̀ndi kũna é korazi. Gbɛ̃ kɛ̀ gì a wɛ̃̀ndizi ma yãnzi sↄ̃, adee égↄ̃ wɛ̃̀ndi vĩ.

²⁵Tó gbɛ̃ gↄ̃̀ anduna vĩ píngi, tó à a zĩnda kpà à gɛ̃ɛ ũ à kòra a wɛ̃̀ndizi, bↄ́ àren à vĩi?

²⁶Tó gbɛ̃ mapi kↄ̃n ma yão wí dɛ̀, Gbɛ̃ntee Nɛ́ é adee wí dɛ gurↄↄ kɛ̀ eé su a gakui guu kↄ̃n a De gakuio kↄ̃n a malaikanↄ gakuio.

²⁷Yãpuraan mɛ́ɛ ooare, gbɛ̃kenↄ kú gura kɛ̀ aↄ̃é garo ai aↄ̃ kí kɛ̀ Ludaa kà e.

²⁸Yã pì ona gbɛra à kà azuma do taka, ben à Pita kↄ̃n Yohanao kↄ̃n Yemisio sɛ̀ à dìńyo kpiiia lɛ à adua kɛ.

²⁹Kɛ̀ èe adua kɛɛ, à uu lìɛ à pↄ́kãsãanↄ kɛ̀ pú fénfen.

³⁰Kãndo gↄ̃ↄn plaaanↄↄ kúo, Musa kↄ̃n Iliao, aↄ̃ↄe yã kↄ̃n Yesuo.

³¹Aↄ̃ bↄ̀ wà mↄ̀ńzi gakui guu, aↄ̃ↄe anduna kɛ̀ eé tó zaa Yerusalɛmu yã ooo.

³²Ii Pita kↄ̃n a gbɛ̃nↄo sɛ̀. Kɛ̀ aↄ̃ vù, aↄ̃ Yesu gakui è kↄ̃n gↄ̃ↄn plaaa kɛ̀ aↄ̃ↄ zɛna à saɛnↄ.

³³Kɛ̀ gↄ̃ↄn plaaa pìnↄↄ e kɛ̃ɛ Yesua, Pita bènɛ: Dii, à maa kɛ̀ wá kú kɛ̀. Wà kutaa dↄ mɛ̀n aagↄ̃, n pↄ́ mɛ̀n do, Musa pↄ́ mɛ̀n do, Ilia pↄ́ mɛ̀n do. À dↄ̃ yã kɛ̀ ée ooro.

³⁴Kɛ̀ èe oo lɛ, ludambɛ luguu pìta à dàńla. Kɛ̀ aↄ̃ↄ kú à guu, vĩa ń kũ,

³⁵ben aↄ̃ kòto mà à guu à bè: Ma Nɛ́ kɛ̀ ma à sɛ̀n yɛ̀. À à yã ma.

³⁶Kòto pì mana gbɛra aↄ̃ↄ è Yesu gↄ̃̀ gwe ado. Aↄ̃ ń lɛ́ kũ̀ aↄ̃ↄe yã kɛ̀ aↄ̃ↄ è o gbɛ̃ke ma gurↄↄ mↄ̀aro.

³⁷Kɛ̀ guu dↄ̀, aↄ̃ pìta kpiii pì musu, ben gbɛ̃nↄ mↄ̀ da Yesulɛ pari.