Luka 4:2-24

²E'ea, mada 40 zamaḡano Sataniꞌa Iesu tuhune nuriro. E'e madaḡano ani ogomu 'ahoga mene aro, eꞌanoꞌo mada ḡonagano ani vinine runiro.

³Ebu Satani'a Iesu niro, raena'a, “Ḡaꞌe Badi'a ubuga ro'idene, hadi ꞌadi neadu ḡihune beredio noꞌi!”

⁴Iesu'a naenaenina'a, “Mene! Buka Zaḡoḡano raenaꞌa, 'Vaze'e beredio da'o mene ḡabode radi'uma. Rehano vine ogomuḡano zuni radiꞌuma.'”

⁵Ebu Satani'a Iesu tutunadu hitaga haba'a itadu zogone vaze'a ibitohauꞌeteꞌe haba'a boroboro niduꞌa ihoniro.

⁶Ebu aniꞌa nina'a, “Eḡeꞌa ḡaꞌe haba boroboro deꞌe ibito ha'uma gigi'aḡa zu manohuga nidu'a ḡani'uma. Aꞌe eḡe enoga ḡauḡa 'ahine, eḡe'a urateꞌeteꞌe vaze hau tauḡoga zuni idaḡa daꞌo.

⁷E'ano'o ḡa e mazao kuraune, de'e nidu'a ḡae ḡaniꞌuma!”

⁸Ebu Iesu'a naenaenina'a, “Mene! Buka Zaḡoḡano raenaꞌa, 'Zuhiꞌa Boro ḡae Badi'a mazao da'o kurano hano'i, zu ane gau daꞌo haḡaoꞌi!'”

⁹Ebu Satani'a zamahanadu Ierusalema habaꞌa onamiro. Ebu kuru neḡa hitaga huneo ohonadu niro, raenaꞌa, “Ḡa Badi'a ubuga ro'idene adaꞌono'o rafato'i!

¹⁰Mazaḡa Buka Zaḡoḡano raenaꞌa, 'Badi'aꞌa dugu'oga veize aneruḡa tuḡuziꞌuma.

¹¹Ze'a ꞌevoreze hina mae ḡihi'i'uma ꞌahine, ḡae odaꞌe hadio mene tutuhaꞌuma.'”

¹²Rehano Iesu'a naenaeniro. “Mene! Buka Zaḡoḡano raenaꞌa, 'Zuhiꞌa Boro ḡae Badi'a ago tuhuno'i!'”

¹³Ebu Sataniꞌe Iesu tuhune hauḡirotene, mada manoḡa 'ahoganobu'u bare tuhuniꞌuma radu mode iḡuniro.

¹⁴Iesuꞌe Vine Zaḡoḡa gigi'aḡani'a iri'avonadu bare Galilea habaꞌa onamiro. Ebu ane hariꞌe haba nidu'a zamaḡano bororaro.

¹⁵Aniꞌa nuꞌonuꞌo neḡano ihozido ebu zeḡe nidu'aꞌe ani niguniro.

¹⁶Ebu Iesuꞌe Nazareta neḡa onamiro. Eꞌe Neḡaꞌe ane'a bororarote'e habaꞌa. Bana Madaḡano ane'a iḡaiḡa haḡainute teige, nuꞌonuꞌo neḡano diuḡi onamiro. Ebu Buka Zaḡoḡa meꞌodoga radu iḡune edaro.

¹⁷Iḡune edarotene kuru neḡa ḡianeꞌeteꞌe vazeḡaniꞌa Isaia perovetaꞌa mirihiroteꞌe bukaḡa mae haro. Ebu aniꞌa vavaꞌadu meꞌodiꞌuma habaꞌa horoniro. Aꞌe ꞌahige rae mirihiro.

¹⁸“Zuhiꞌa Boro Vigaꞌe eḡe rana reiro. Zahara azaḡa mazao hari manoḡa haramoga veize aniꞌa eḡe ohotiro. Ebu Sauꞌaniꞌa batuziroteꞌe azaḡa fuhiꞌe ahetiꞌuma, ubuma kuru azaḡaniꞌa ehamaꞌuma zu aduḡaniꞌa ḡahiziroteꞌe azaḡaꞌe ahete modiꞌuma', rae furenoga veize, Badiꞌaꞌa eḡe tuḡuhiro.

¹⁹Ebu zuni Zuhiꞌa Boroꞌa ane vaze ḡabozeꞌeteꞌe madaḡa momeo furenoga radu tuḡuhiro.”

²⁰Iesuꞌa buka meꞌode hauḡirotene buka ꞌuadu mae haroteꞌe vazeḡa bare haro ebu ehoriro. Nuꞌonuꞌo neḡa zamaḡano vaze niduꞌa ani ḡiaḡianiro.

²¹Ebu Iesuꞌa ḡadaheni ziro, raenaꞌa, “Zaꞌa egateꞌe Buka Zaḡoḡano ḡoeꞌa eꞌe ꞌai izidi ꞌada hudaneha.”

²²Zeḡe niduꞌa ani mae ḡihine ḡoeriro zu ani hebeonoꞌo buaudoteꞌe ḡoeꞌa manoḡa egadu zaguzagaro. Rehano, ze raenaꞌa, “Aniꞌe Iosefa ubuga! Emeꞌe ani ḡoere mene igiꞌuma.”

²³Ebu Iesuꞌa ziro. “E edeḡa zaꞌe eḡe mazao ḡoere ꞌahi raꞌohe, raenaꞌa, 'Gohe vazeḡa, ibite ḡaeꞌa ugiḡo fainoꞌi, ebu vaze ꞌahoga ugi fainoꞌi!' Ebu raenaꞌa, 'Iesu, ḡa Kaperanauma neḡano haḡai gigiꞌa haḡairoteꞌe teige, ḡae haba ꞌadao zuni haḡaoꞌi! ꞌOugine, emeḡeꞌa ḡae ḡoereꞌe mae ḡihiniꞌuma.'

²⁴E hube hune ziꞌohe. Zaeꞌa eḡe ḡoere mene mae ḡihineꞌeteꞌe teige, peroveta azaḡa zuni zeḡe habao vazeꞌa mene mae ḡihizeꞌohe.