San Lucas 4:2-24

²Ruy guzuguaany cuarent dxi ne guxin ax güegaany bɨndxab prueb laany. Xíteete quɨt xi bquiintiny irate dxiqui, chiyru bldiaanny.

³Chiy raipy bɨndxab laany: —Belati guldípacu noo Lliin Dios, gunabee gac guiaré guechtily.

⁴Jesús cuaibny: —Lo xquiits Dios rnii: “Gati púrzi pur guechtilti ibány bniety sino que néza pur xtiidx Dios.”

⁵Chiy güené bɨndxab laany yaa quia tuby dany ax horqui bliuungui laany irate de naciony xte lo guɨchliu

⁶ax raipy bɨndxab laany: —Nare inɨɨdxa liú guelrnabeeré ne de guelnazaac ni nuu lo de nacionquɨ te pur xtena nádeni. Ne nare sdeedani elquɨ ni icaaza.

⁷Belati sullibiu luaa ne itoo nare, irateni gac xtenu.

⁸Per Jesús cuaibny: —Lo xquiits Dios rnii: “Bto tubyzi Xtadu Dios ne tubyzi lony baany sirvɨ.”

⁹Chi gudeedqui, chiy güené bɨndxab laany guɨdx Jerusalén ax biepnéngui laany quia yudoroo xte Jerusalén, raipiy laany: —Belati guldípacu noo Lliin Dios, biab desde ruuc axtquɨ niguét

¹⁰te pur lo xquiits Dios rnii: Dios sxiaaldny de ánglɨ xtenny par icualodeny liú.

¹¹Sldiasdeny liú cun naadeny par quɨt gunna guia de niiu.

¹²Jesús cuaibny: —Ziyza rnii lo xquiits Dios: “Quɨt gúntiu prueb Xtadu Dios.”

¹³Ziy xquel guc, chi quɨtru bdxialti bɨndxab xa xquel gúnbɨ prueb Jesús, ax gubicáb rut zuguaany. Canuutisbɨ xi dxi chaleeru gúnbɨ pruebny.

¹⁴Jesús biecquiny nez Galilea quesentiand napny guelrnabee xte Spíritu Sant ne iduibte de nezqui zaaiby xtiidxny.

¹⁵Rseedny de bniety láani de yudoo irate de nezqui, ne iratedeb rniideb diidx zaac pur laany.

¹⁶Chiy Jesús güeny Nazaret guɨdx rut guroony. Ne dxi ni rzilaaz de bniety ax biiuny láani yudoo zec ni guc xmodny, chiy guzuldíny par biildyny lo xquiits Dios.

¹⁷Bdeeddeb laany librɨ xte profet Isaías. Ne chi bxalny láani librɨqui, bdxialny tuby lat rut rnii:

¹⁸Spírit xte Xtadnɨ Dios zuguané nare te pur abanldeeny quiaa par iniia de didxzaac xte Dios lo de bniety ni ná prob. Abxiaaldny nare par gacnía de bniety ni nuu nalas, par quixtiia lo de bniety xa xquel ldádeb, laadeb ni rnabee duld lodeb, par ixala de bslo de bniety ciagu ne par gacnía de bniety ni cadeed guelzii.

¹⁹Ne par quixtiia dec abdzɨny dxi ni arbez Xtadnɨ Dios par gunldeeny quia de ni quíily laany.

²⁰Chiyru bchii Jesús lo librɨqui ax bdeedny librɨqui bniety ni racné láani yudooqui ax guriny. Ne irate de ni nuu láani yudooqui güelaaru bguiaadeb laany,

²¹chiy laany guzulo caninény laadeb, guniiny: —Andxigacré aguzub zec ni rnii lo xquiits Dios ni abindiagtɨ.

²²Iratedeb guniideb de diidx zaac pur Jesús, ne quesentiand rdxalodeb pur de diidx zaac ni rniiny ax guzulo rnabdidxsaadeb: —¿Ta gati laabɨy llingaan Gusé?

²³Jesús raipny laadeb: —Nare nánpaca dec laat teru iniit nare diidx ni rnii: “Doctor, baany rmɨdy lagac liú”, ne sniizactɨ nare: “Ni bindiagnɨ baaniu guɨdx Capernaum, baanza ziy ladxu.”

²⁴Ziyza raipy Jesús laadeb: —Nare rguixtiia lot nic tuby profet quɨt rcaaztideb laab ladxbɨ.