Lukasarini 4:2-24

²mang 40 maats taarangiya. Marizpa taarangu, nda pakchiyam katungarangiya. Yashing' kizpur yacharangiya. Marizamun tsipamaam zandku,

³Yashingsha: ¿Kamapa Apanlleesha Wipish pangaam tinachsha? Patumbchee pangaam tinangi katungpish, mang táyaru,

⁴Isussha: Ndambaree. ¿Antaatiya tputs katungtsimunamari taarashish urutamash payutareeja? watam Apari táranlluwa, mang, tárangiya Isusu.

⁵Táyaru, Yashing' machip íwar Isusoo machtayaru, tsapurunasee ichinguru yámandarangiya; yaktaa ichinguru yámandarangiya, manga.

⁶Yámandayaru, Yashingsha: ¿Kurik wanipa parangsha? Kizpur kurakaam kinapish panachinllpa. Nuwamari ishinkina. Zandkuri, tputseem panachima.

⁷Itaru, shiyma nuwaa Apanlleem ínangandama. Ashkachush, yuwaa yámandarangi anoo ashpari panachinllpa, mang, tárangiya Yashingu.

⁸Isussha: Watsta, ¿Tamaree ashchee? Watam Apari kuk atuwa: Apanlleetsimari Taarashipani ungirtangtsa. Anootsimari kuk payukus taangtsa, Apari, táranguwa. ¿Tamaree Apareetsi kuk kapeetchi? mang, tárangiya Isusu.

⁹Táyaru, Yashingsha Irusarinap Isusoo machtarangiya. Apanllimun pangu wazingarimun tunaringarangiya. Tunaringayaru, Yashingsha: Apanlleesha Wipish; tspusangi, tárangiya.

¹⁰Mazinangcha; Watam Apanllsha waana wasundururee siyaa ksutamaam zangankuwa. Yaptaa naakis ambtaa wasundurursha uru siyaa ksutchiya.

¹¹Uwpat siyaa pazurangpaz ashtachiya, nda siy patumbchimun pazis tpuu ashimaama, Apanll átcha. Natu yachangi; ¿tamacheezish? mang, tárangiya Yashingu.

¹²Isussha: Ndambari, Ngutis, Apanllee tamasingarus, ¿Tamaree Apanll iyaa istach? tárintspa, Apari watam táranlluwa, mang tárangiya Isusu.

¹³Táyaru, Yashing' xapooyaru, natumasam Isusoo kasarangiya, manga.

¹⁴Itaru, Isus waptam musap Galileyap kanapurangiya. Yuwaa Yashing' Isusoo yacharangu anoo kamaneena. Isus waptam kanapurangu, Waparimun Wani kizpur taarangiya. Zari zapan taarangu, Isusoo kuk amb kung tzapanirangana.

¹⁵Isus Utaáshuchish shaniyshini tayaspatarangu, minush zari minupsha tayaspatat, minush zari minupsha tayaspatat ashirangu, tputssha ichinguru kis mazinaranganaya. ¿Tamaru tayaspatak? tárangana, manga.

¹⁶Yusurshat zapish yaktap Násaretap Isus mang kanapurangu; yuwashtam kanungarangu anshutam kanapuru kusarangiya. Uru Isus sápatush zari Utaáshuchish shaniyshini pshturangiya. Apanllee kuk natstapi átu chiyzat ashirangiya, manga.

¹⁷Tputssha Isáysarineetsi wirkari yáyaru, Isusoomsha natstamaam panarangiya. Isáysarini zitamin Apanllee kuk kamanimapanimuncha. Ashiri Isussha Isáysarinee wirkari yáyaru, ipursayaru, ipusanand napeeru, mang natstarangiya. Natstaku tárangiya; Isáysarini yandaku, tárangiya;

¹⁸Apanll Taarashipan wani nuwash wizpur taachiya. Apap nuwaa ipuseeru, wipunasheemsha ínarangiya. Nuwaa kamachtaku, Yuw kiyung kachiykana anoo istashini, tárangiya. Pukireem nuwaa kuki kamanishini. Putamawaa tputs yanpushini. Tumanshishush wantsush taakana, anoo tashitungangcha. Yuw kiyung kachiykana an nimun kiyung kachiyachtazinllinaja, Apanll átanda, tángcha.

¹⁹Na musápa Apap iyaa istamaam kuschiya. Iyaa musásiritam izuuru tapachindachiya; tárangiya Isáysarini; Isáysarinshini wirkari natstaku, tárangiya Isusu.

²⁰Natstayaru, yusur kirakaa turimarangu, tputseemsha kirakaa panayaru, tayaspatamaam kuxinarangiya. Tputs ichinguru Isusoo nappataranll ashirangana.

²¹Isussha mang tayaspatarangiya. Mazinangtsa siya; tárangu, Natstayanlli anoo nat in nuwaana tatsamchima; tayaspataku ántar ashirangiya.

²²Tputssha: ¿Tamaru tayaspataka? tárangu. Tsiyatssis wanasirimish mazinayani. Itaru, waanaatsi mangupa atiya, watam Osiyarini wipawa.

²³Itaru, Isussha: Siy nuwaa tpazamaam, Doctoroo, shaanaatsi yarangi, nuwaa táchpasa. Mishat, siysa nuwaa: ¿Mayaamsha yaanpatatanasha niyraksha? ¿Mayaamsha nllitaritap tsap Kapárnáwap xiyksha? siy táchpasa nuwaatsi.

²⁴Itaru, nuwsha siyaa: Watam tayaspatampanee uru waanshutaa watsapun nda mazinamaam zandkanawa táchintspa, tárangiya Isusu.