Lukas 4:2-24

²pe didibri tesi En fotenti dei langa. A heri pisten dati Yesus no ben nyan noti, so baka den fotenti dei angri bigin kiri En.

³Ne didibri taigi En taki: “Efu Yu na a Manpikin fu Gado, taigi a ston disi fu a tron brede.”

⁴Ma Yesus piki en taki: “A skrifi taki: Wan sma no sa libi fu brede wawan.”

⁵Dan didibri tyari Yesus go na wan hei presi. Ini a pingi fu wan ai a sori En ala den kondre fu grontapu.

⁶Didibri taigi En taki: “Mi o gi Yu ala a makti fu den kondre disi nanga a gudu di den abi. Na mi kisi a makti disi, èn mi e gi en na suma mi wani.

⁷Mi o gi Yu ala den sani disi, efu Yu anbegi mi.”

⁸Ma Yesus piki en taki: “A skrifi taki: Yu mus anbegi Masra yu Gado, èn na En wawan yu mus dini.”

⁹Baka dati didibri tyari Yesus go na Yerusalem, dan a poti En tnapu na a lantyi fu a daki fu a mamakerki fu den Dyu. A taigi En taki: “Efu Yu na a Manpikin fu Gado, trowe Yusrefi go na gron.

¹⁰Bika a skrifi taki: Gado sa seni den engel fu En fu kibri Yu.

¹¹Moro fara: Den sa tyari Yu na tapu den anu, fu Yu no stotu Yu futu na wan ston.”

¹²Ma Yesus piki en taki: “A skrifi owktu taki: Yu no mus tesi Masra yu Gado.”

¹³Di didibri kba tesi Yesus, a gwe fu luru wan tra okasi.

¹⁴Di Yesus drai go baka na Galilea, A ben furu nanga a krakti fu a Yeye. Ini a heri kontren drape den sma ben e taki fu En.

¹⁵A ben e gi leri na ini den kerki fu den, èn ala sma ben e gi En bigi nen.

¹⁶Dan Yesus go na Nasaret pe A ben kweki. Soleki fa A ben gwenti fu du tapu a sabadei, A go na a Dyukerki. A opo tnapu fu leisi

¹⁷dan den gi En a buku san a profeiti Yesaya ben skrifi. Di A opo a buku, A leisi a pisi pe skrifi taki:

¹⁸A Yeye fu Masra de na mi tapu, bika A poti mi fu tyari Bun Nyunsu gi den pôtiwan. A seni Mi fu taigi den sma di feyanti poti na strafu, tak' den o lusu. A seni mi fu meki breniman si baka, fu puru sma na ini katibo,

¹⁹èn fu taki tak' a ten doro fu Masra sori En bunfasi.

²⁰Dan Yesus tapu a buku, A gi en na a man di e wroko ini a Dyukerki, dan A go sidon. Ala den sma ini a kerki ben e luku En.

²¹Dan Yesus taigi den taki: “Tide a pisi disi fu a Santa Buku san un yere, kon tru.”

²²Ala den sma ben lobi fa A taki, èn den ben ferwondru fa A ben taki so moi. Dan den taki: “Tan, a no a boi fu Yosef?”

²³Yesus piki den taki: “Mi sabi tak' un o koti a odo gi Mi taki: ‘Datra, dresi yusrefi! Un yere san Yu du ini Kafarnaum. We, du den srefi sani dyaso ini Yu eigi foto.’

²⁴Fu tru Mi e taigi un taki: Den sma fu wan foto no e teki san den eigi profeiti e taki.