Luka 4:2-24

²i ki tana a ivat na vinun na bung, ma Satan i valavalam ia. Pa i en ta magit ta nam ra lavur bung; ma ba dia tar par, i mulmulum muka.

³Ma Satan i tatike tana: Ba u natu i God, una kure go ra vat upi na gem.

⁴Iesu i biti tana: Di ga tumu ia ba: “A tarai pa dia laun ta ra kinanang na gem uka.”

⁵Ma i agure urama, i ve tar tana ra lavur kiki na varkurai ta ra rakarakan a gunagunan parika ta ra ik a ngungu pakana bung uka.

⁶Ma Satan i tatike tana: Ina tabar iu ma go ra varkurai parika ma ra minamar bula tana, tago di ga tul tar ia tagu, ma ina tabar nina me ba iau mainge.

⁷Ona una lotu tagu, kaum parika.

⁸Iesu i biti tana: Di ga tumu ia: “Una lotu tadav ra Luluai kaum God, ma una torom tana ka.”

⁹Ma i agure urama Ierusalem, ma i vaki ia liu ta ra bur na pal na vartabar, ma i biti tana: Ba u natu i God, una pil ba mamati;

¹⁰tago di ga tumu ia: “Na tul tar kana umana angelo tam, diat a balaure u.

¹¹Ma go bula: “Diat a puak vatur u ma ra lima i diat, kan una tuke ra kaum ta ra vat.”

¹²Iesu i tatike tana: Di ga tatike: “Koko una valar ra tuluai kaum God.”

¹³Ba Satan i tar valam ia ma ra lavur varilam parika i vana papa kan ia.

¹⁴Iesu i talil ma ra dekdek i ra Tulungen urama Galilaia, ma i rarang vanavana ta ra lavur gunagunan.

¹⁵Ma i vartovo ta kadia lavur pal na lotu, ma diat par dia pite pa ia.

¹⁶Ma i pot Nasaret, nam i ga tavua tana; i ruk ta ra pal na lotu ta ra Bung Sabat, da kana mangamangana iat, ma i tur upi na luluk.

¹⁷Ma di tul tar tana ra buk kai ra propet Iesaia. Ma i pelegi ra buk, ma i na tadav ra pakana di ga tumu ia tana dari:

¹⁸“A Tulungea i ra Luluai i ki tagu, Tago i tar tap iau upi ina varve ra bo na varvai tadav ra lavur luveana; I tar tulue iau upi ina varvai dari: Da papa vue diat di ga banubat diat, Ma ra lavur pula diat a nana mulai; Upi ina pala vue diat dia dala,

¹⁹Ma upi ina varvai ure ra e na varvalaun kai ra Luluai.”

²⁰Ma i paum ra buk, i tul tar ia mulai tai ra tultul, ma i ki ra pia, ma ra tarai par ta ra pal na lotu dia bobobe.

²¹Ma i tatike ta diat: Gori di tar pait ot pa go ra tutumu ta ra talinga i vavat.

²²Ma dia mulaot par tana, ma dia kaian ta ra ko na tinata i tatike; ma dia titir ure ba: Go laka natu i Iosep?

²³Ma i tatike ta diat: Kan avat a tatike go ra tinata valavalar tagu: Tena valagar, una valagar iu mulai; nam par ave valongore ba u ga pait ia arama Kapernaum, una pait ia bula ati ta kaum gunan iat.

²⁴Ma i biti: A dovot go iau tatike ta vavat: Pa ta propet ba di ru ia ta kana gunan.