Lucangundru 4:2-24

²Kutjieli nina pira mara kulno ja ditji marapratjana wontjananto. Ja Nulu tanangupini ditjini panila tajina wonti; ja tana matja mudana, Nau mauali nganana wonti.

³Ja kutji nunkangu jatana wonti: “Jidni Godaia Ngatamura ngananani, nunkangupini mardani jatamai, nau bukarinanto.”

⁴Jesujeli kalabana wonti ja nunkangu jatana wonti: “Dakanala parai: Wata windri bukandru kana tepiriai, a-ai, Godaia jaura pratjanandru.”

⁵Ja kutjieli nina mardawonpa miria taralkana wonti, ja nunkangu nurujeli mitaia kaparaia warupotuja milila wondrana wonti.

⁶Ja kutji nunkangu jatana wonti: “Jinkangu ngato tanamipini ngurula pratjana ja tanani pirnaia jinkila nganai; ngangau ngakangu naupini matja jinkina, ja nunkangu ngani jertapateriai jinkila, ngato ninaia jinkila nganai.

⁷Jidni ngakangu pantjaterkana ngarinani, jenia pratjana jinkani nganala nganai.”

⁸Ja Jesujeli kalabana wonti ja nunkangu jatana wonti: “Ngakangu ngadaia nganamai, Satanajai! Ngangau dakanala parai: Jidni Godani Kaparani jinkanani ngatjiamai, ja windri nunkangu wodatarana jidni ngamamai.”

⁹Ja nulu nina Jerusalemia wapalkana wonti ja Godaia punga wutjuni terkibana wonti ja nunkangu jatana wonti: “Jidni Godaia Ngatamura ngananani, ninkidandru ngarinalu kulkungamai!

¹⁰Ngangau dakanala parai: Nulu angelani nunkanani jinkangundru jirijiribala nganai jidnana ngumu ngamalkala;

¹¹Ja tanali jidna marali ngamalkala nganai, wata jidni tidna mardali dakaterinanto.”

¹²Ja Jesujeli kalabana wonti ja nunkangu jatana wonti; “Jaura jatai: Goda, Kapara jinkani wata wontjamai!”

¹³Ja kutjieli wontjana pratjana matja mudana, nau nunkangundru kutingana wonti miljaru pilkielu.

¹⁴Ja Jesus Jaolali ngurungurujeli tikana wonti Galilaiaia, ja pinti nunkangundru karitjinawontiwontikana wonti mita marapuni karakara.

¹⁵Ja Nulu ngujangujara jinkina wonti jaura pungani tananani, ja tanali pratjanali nina jurakokana wonti.

¹⁶Ja Nau Nazaretani wokarana wonti, woderi Nau pirnarinala; ja Nau Godaia ditjini jaura pungani wirina wonti worderu milingeru, ja terkakana wonti warapala.

¹⁷Ja tanali nunkangu Jesaiani jaura jinkina wonti, ja Nulu nina matja pirakana, Nulu mankamankana wonti nina piri, woderi dakanala paranani:

¹⁸“Kaparaia Jaola ngakangu nganai, jendrania Nulia ngana wiribana wonti ngantjani jaura wangiwangini kaukaubala; ja Nulia ngana jinpana wonti ngara ngaurongauro murlali ngankala ja kanjangarini kurakana kaukaubala, ja butjuni nakaldra najina ngankala; ja tanana tapanto kurakana dadala,

¹⁹Kaparaia kilpawoldra murlali kaukaubala.”

²⁰Ja Nulu jaura matja punmana, ja milini nakaldra jinkina, Nau ngamana ngarina wonti; ja pratjana, jaura pungani ngamana, nina ngurutalpana najina wonti.

²¹Nau wonina wonti tanangu jatala: “Karari jenia jaura jurangu talpani morlalu pantjina warai.”

²²Ja tanali pratjanali nunkangundru tinkari ngankana wonti ja ngaruparana wonti murlaia jaurandru, jenia nunkani manandru dunkana wonti, ja jatana wonti: “Wata naupini Josephani ngatamura nganai?”

²³Ja Nau tanangu jatana wonti: “Morlalu jura ngakangu jenia jeribaka jaura jatala nganai: “Kunkiai, munta tepi ngankateriau! Pirnaia marapu ngaiani ngarana warai Kapernaum ngurani matja pantjina, ngankau jenia bakana ninkida jinkani ngaperaia ngurani!”

²⁴Nau jatana wonti: “Morlalu ngani jurangu jatai: Wata Propheta kulno kamaneli nganai ngaperaia ngurani.