Luk 4:2-24

²Kare la uedangene Satan tatanono tar toueitir hangaulur marein. Tar mamang binakalikinin, Iesu ahik mata ein me niein, doh tar binaka ke la kapa per mareininin, inggono ke gogontieh.

³Doh Satan ke kula tatanono pare, “Ge para tuna God nomana ingga, o mene toro palaua rone maro uapalihin o bereit!”

⁴Bo Iesu puk ke kula tatanono pare, “No uelhire God o nibolo pare, ‘A tamat ahik pahe tua to puk re ein pe toro bereit.’”

⁵Doh Satan ke keipingua poluk taro tatanono tar siusana ger i ranantiehe, kare la ualasira toro mamang nitoialikane i kot tar sisikinalikir binak.

⁶Kare kula poluk Satan tatanono pare, “Inggo u turung heir totomua tar nitampopokohong kauek, doha mamang uiniatorong toro nitoianin, ge ginina pe a niheir totoguo, doh inggo u banoto tar heir taninina me tamata geru marang heirin.

⁷Temaeit geto hatup uahiua, karo lotu totoguo, ginina uakapa tun a turung noumua.”

⁸Bo Iesu puk ke mene hahaua pare, “No uelhire God o nibolo pare, ‘Loutu tar Tamata Noman, ger God a noumua, karo kalekinale kompe tatanon.’”

⁹Song ke uoum keip poluk Satan tang Iesu i Jerusalem, kare la guata tatanon, maeit re la tur i rana tar butur ger i ranantiehe tar kukunar uamang lotu ger dedeil. Kare kulono tang Iesu pare, “Ge para tuna God nomana ingga, siaka uahiuakoane!

¹⁰Roon o nibolo tono buk God pare, ‘Inggon e turung ualatoho uatuha totomua tosno anggelou tar kaueke uaia tun totomua.

¹¹Gisina ra turung kabe kai totomua tar limas, te mara hikia paho uabir tar kekeim mo palau.’”

¹²Bo Iesu puk ke kula tatanono pare, “No uelhire God o kula pono pare, ‘Ahik paho uedanga tar Tamata Nomana ger God a noumua.’”

¹³Tar binaka ke uedanga uakapa Satan tar mamang uedangalikinine, inggono ke hiliu tatanon e tuka me giameher binaka uaia.

¹⁴Iesu ke uoun tun tena nitampopokohor Iabena Dedeil ke tapokis pe i Galili, doho tamatang toro pang uaninin ka siokor uolo ueliate tatanon.

¹⁵Doh inggono ke menmene ualasira to iuma tonosio umang lotur Ju, doho tamata ka siokor uatakai tatanon.

¹⁶Tar binaka ke la Iesu i Nasaret tar uan geke hua kai toin, doh tar Mareining Pepe Uah, inggono ke haiala iuma tenas umang lotur Ju, e uakeluk tompe tena niguata tar Mareining Pepe Uah, kare la tur kai tar timana tono uelhire God.

¹⁷Doh inggono ka heirin toro bolobol o niligun gero nang Aisaia ger propet, inggono ke luaka tang roon, kare tuparangua tar butur ka boloin pare,

¹⁸“Na Iabena Dedeilir Tamata Noman e uangoul teil totoguo, teeit ke uamatoto peono totoguo tar me uelhire tauete tono Uelhire Uaiaono tasir tamatasisir tiome. Inggono ke ualatueha totoguo tar me uelhire tauete pare, o tamatasis ra uangoul tar umang uih ra turung uamaluanais, doho kut ra turung banga poluk, doho tamatasis gera uangoul keip tar niduh, e turung mamaolois, kara uah,

¹⁹doh tar uahire tauete pono tar binaka re ualasira tor Tamata Nomana tena nimalar, kare uelkarus tosno tamat.”

²⁰Song ke ligun tapokis Iesu toro bolobol, kare heir tapokis tang roono tar tamatang kalekinale tar umang lotu, kare tabil. Doho tamata uakapa tunusine iuma tar umang lotu ra siokor uakeis uanono kompe tatanon.

²¹Song ke uakekenono tar mene tasisina pare, “Daan kung longoro manasoum toro uelhire, roono ko kotpokoso manas o man.”

²²Doho tamatasine ka longoro tar menenine ke mene pe inggono ka siokor uairana tun tatanon, kara lutara tar inete uaianine ke menmenegion. Doh gisina ka ueluelmenengua pare, “Inggeig i ueliate pare, inggonene ter tuna Josep. Hape maene re banotono tar mene tauete tar uelhirenine.”

²³Kare kula Iesu tasisina pare, “Inggoum here mu turung kula totoguo tar puhung kulene ra uelaten siounin pare, ‘Dokta, ingga deh pako guata uauia katongo baka uoumuia! Guata to ponane tenang pang uan i Nasaret tar niguata geking longorogieim geko guatguata togia i Kaperneam.’

²⁴Bo inggo puk gine ru hire tamiuoum toro man, ‘Ahik me propet ra uiainane tena uan katong.’”