Lukas 4:2-24

²A hanitu i tonia vonga na parava i ravulu va. Na tahuna iea, e Isu i peremu a maki ni kani, lakea i vitolo.

³Lakea a hanitu i takia, i ta maea, “Ge ioe a Tuna Vure, o takia a kedo iea ge mapulo ge manga a bret.”

⁴Pali e Isu i koli, i ta maea, “A ngava ni here puru na Hinere i maea: ‘A bakovi i uka ma ge mahuri na maki ni kani kunana.’”

⁵Muri a hanitu i tulia ru sike na lolo. I vakasiri malaviriri ia vona a maka tanga lobo na malala.

⁶Lakea a hanitu i takia e Isu, i ta maea, “Bara habi lobo vomu a maka tanga nga turana bagetua ne ria, a vuhuna a maka tanga nga ni habi lobo nau, lakea iau bara habi na viri a ngarua.

⁷Ioe bara o vasileki nau, bara habi vomu a maka tanga nga.”

⁸Pali e Isu i koli, i ta maea, “A ngava ni here puru na Hinere i maea, ‘O kavurikea e Bakovi Dagi, a Vure vomu, o ramai kunana ia.’”

⁹Muri a hanitu i tuli tabua e Isu, i vakapesi langea na mapana roho na Vure o Ierusalem, i takia, “Ge ioe a Tuna Vure, o to raga koea,

¹⁰a vuhuna a ngava ni here puru na Hinere i maea, ‘A Vure bara i rudu e huriki a agelo vona, ri valai ri matakari ioe, ri tagari ioe.

¹¹Ri gi bole rike ioe na limane ria, ma ge padi a vahamu a kedo.’”

¹²Pali e Isu i koli, i ta maea, “A ngava ni here puru na Hinere i maea, ‘Naha ni tonia e Bakovi Dagi, a Vure vomu.’”

¹³Na tahuna a hanitu i toni loboa e Isu na nitoni legelege lae, muri i vano, ge dava, ge toni tabua muri ma.

¹⁴Muri e Isu i hamule lakea o Galili turana nitora na Hanu Kiripiripi. I rere lae a velengana.

¹⁵I vara ria pololilo na maka roho na vaponga, lakea e huriki ri longoa, ri kavurikea.

¹⁶Muri i lakea o Nasaret, na tanga i koru rike vona. Na Parava Nimalo, i lakea na roho na vaponga, i manga a naro i rata vakaroro. I pesi rike i gi.

¹⁷Lakea ni habi vona a puhu na hinere ne Isaia a propet. I vevea, i puruvisia a tabekena tara, i gia, i ta maea,

¹⁸“A Hanune Bakovi Dagi i made turagu, a vuhuna i vulaki iau ga vakalongo a Velenga Kamumu ne huriki a matasia. I rudu iau ga vakalongo e huriki ni ru dili na bavi, ne ria ri gi matukapaga. I rudu iau ga vakamatapara e huriki a kepa. I rudu iau ga rata e huriki ni rata hale, ri gi matukapaga.

¹⁹I rudu iau ga pukatala a ngava ne huriki vona a parava i bele pali, ne Bakovi Dagi ge korimule e huriki a ngate vona.”

²⁰E Isu i gi lobo pali, muri i pilua a puhu na hinere, i habi mulea na vora, i made puru. E huriki lobo na roho na vaponga ri vido vona na tahuna i taki ria.

²¹I ta maea, “A tabekena Hinere nga i bele muholi mona, na tahuna mu longo iau a gia.”

²²E huriki lobo ri kavurikea, ri turutu vona a maka ngava kamumu i taki. Ri vanana, “Ra bakovi iea, e tune Iosep kunana?”

²³Lakea e Isu i taki ria i ta maea, “Muholi hateka, muri ma bara mu takia nau tara ngava hosi i nangi maea: ‘Ioe a bakovi ni korimule e huriki, o korimule ioe ke!’ Muri bara mu ta maea, ‘Mi longo ioe o rata a maka nivakasiri o Kapernaum. Pali ngane o rata koea na tanga vomu a maka maki nga.’

²⁴“A taki muholi mua, a propet, e huriki a bakovi a ngatavine na tanga vona i uka ma ri matakilalea.