Luk 4:2-24

²En out enek, Temat sak vis Iesu avong hanumau elu (40). En avong keil enek, Iesu rokaniantei, sakini en keite ten avong enek, amai kati houlu.

³Ven koanek, Temat sak visi vit, “Munak kovi Natin Ahi anatin, kimeng kat ahat ekek vahiles vamai vahi veret am.”

⁴Ka Iesu vit kesi mini vit, “!Vuo! Nirmumontei ven Tus Votut viteni vit, ‘Meatin romoultei en anien enges.’”

⁵Evus, Temat mulamun Iesu vina nesa en mari hou tai ka, en avong tas, rie lat kantri vasi keil ten out netan mini.

⁶Ka sak visi vit, “Keihoen ten out vasi keil enek asani mul en hek. Ka inau nakilea nisani min meatin sa koa ek vati masani mini. Sakini, nakilea nilinguk kihi asuv houlu kovalosil kati ka tounah keil koa mul ien hehi onom.

⁷Munak kiha netan minau enges, nisan tounah vasi keil enek minuk.”

⁸Ka Iesu vit kesi mini vit, “Inau nirmumontei veni Tus Votut viteni vit, ‘!Miheha netan min Iahova koa vi Ahi onami ka mihelong kat kei enges!’”

⁹Evus, Temat kur Iesu va en out Serusalem, ka lingi mulomal en out tai nesa mok en hoi Eim Votut onen Ahi. En out enek, Temat viteni mini vit, “Munak kovi Natin Ahi anatin, kihut kihita netan vahotini keke Ahi ro ral minuk,

¹⁰veni Tus Votut viteni vit, ‘Ahi hemeng kat angelo keil onen avating koe revi keik.’

¹¹ka ‘Keil ihati latuk hehina nesa en he, hesakini kirmusavoitei en alom en ahat tai.’”

¹²Ka Iesu vit kesi mini vit, “!Vuo! Nirmumontei, veni Tus Votut viteni mun vit, ‘Minasak vistei Iahova koa vi Ahi onami keke mivahotini kei mul ral min kami.’”

¹³Navong Temat sak vis Iesu en sise vasi keil, lokoveini va rokol avong sav koa heles ahho tai keke vasak vis risi.

¹⁴Navong Iesu lokovein out volvol, va ris en provins ten out Kaleli, ka keihoen onen Ninin Votut mai vilelau eni. Longlongien usili karahit out vasi keil koa mul vesesal en out enek.

¹⁵Kei va en eim tahihiseien onen Siu keil ka visein meatin keil ien. Ka meatin vasi keil koa along usili avati lat isen.

¹⁶Iesu mual rokol taon ten out Nasaret, out koa kei moul ien. En Sabat, va en eim tahihiseien suval koa lises mumoni. Ka navong mulomal vahuli Tus Votut onen Ahi,

¹⁷keil asani mini tus koa tisien onen provet Aesea mul ien. Kei vue, votin out koa selusien enek mul ien ka vuli vit,

¹⁸“Ninin Votut onen Iahova mai sienau, veni rie lat nau mahitehiten more longlongien min koakeil tounah one tovuol. Kei sila nau mahiteni min koakeil amul en eim takeih, akilea avasital rani. Ka min koakeil mete var, ilele ris, min koakeil amul en hen mesav keil, imaluv iha.

¹⁹Kei sila nau mahitehiteni keke Iahova rie lat avong koanek vasan kataunien min meatin keil onen.”

²⁰Navong vuli evus, Iesu koteh kat tus, san risi min meatin takataunien, ka rondan keke vahisein meatin keil. Navong meten meatin vasi keil en eim enek va kati,

²¹viteni min keil vit, “Tus Votut onen Ahi koa milonge navuli min kami, kosa etin, selusien keil teni mai vi anatin.”

²²Navong meatin keil along mormore hihiseien keil koa sani min keil, keil vasi amutimanin ka avati lati en selusien one. Ka evus, tei en keil amundem maeni avit, “Ei, kei vi natin Siosep etin.”

²³Iesu viteni min keil vit, “Nakilea keke mihehiteni minau selusien matu koa vit, ‘Dokta, kisak revi onom keil helamu,’ veni emi vati keke num en out enek, en meteimal kati onak, tounah vasi keil koa milonge namumoni en meteimal ten out Kapaniam keke mihekur anatin enau.

²⁴Ka naviteni anatin min kami, provet tovuol veah koa onen keil avakur revi en meteimal kati onen.