Luka 4:15-41

¹⁵Eme ira mitificne ficne miti jazame muac baafec ecne‐fârembiŋ.

¹⁶Juraku sosoka hae‐ticne Nazarete ira iŋuc jaha fisirâ sabata hombaŋko mitificko fewec. E hombaŋ sâc iŋuc ejujec. Ferâ miti wose‐jareocte fahareme

¹⁷porofete Jesaja ere papia râcnembiŋ. Râcnepie qaratierâ dâŋ ʒiŋuc fowec i bâfuawec:

¹⁸“Wofuŋte Mârozi norao waharâ rua‐narehuc gie ʒiŋuc munarewec: Ŋic hujukicne Biŋebiaŋ jazazo, kâpâcwâru bacjopakicne firuec‐jopazo, ʒâŋe tiŋtuŋ ʒâŋe fifi bacjopazo, keke suec suec ejarekicne hefârec‐jopazo,

¹⁹â Wofuŋte dameŋ biaŋ maickekac irec biŋedâŋ muzo.”

²⁰Dâŋ iŋuc woserâ papia bazurâ kiŋaŋŋic râcnerâ waha ŋewec. Ŋehame ŋic mitificko ŋembiŋ jaŋe mâmâc sasawa erao ʒâŋe fifârembiŋ.

²¹Eme dâŋ ʒiŋuc fuŋkerâ jazawec: “Mitidâŋ wosepe manaŋgopieŋ i miŋecgac fârine fuakac.”

²²Mume jaŋe qâtâc herâ dâŋticne manapie aŋac ʒizine eme wareckerâ mumbiŋ: “Hâc, e Josefere ŋokâ i!”

²³Eme eki ʒiŋuc jazawec: “Ŋoŋe nore dâŋ suŋsuŋne qahuc ʒiŋuc mecne mueŋgopieŋ: Dokta go fuŋnege bataniŋkec, Kafanaum haeo gie batec biŋene manaeŋgopeneŋ, ijaha ʒira mame sâko haegao batec honenaŋ me!”

²⁴Iŋuc murâ muwec: “No jâmbomac ŋazape: Porofere moc e jahacne haefuŋko âgo sâcne mi ecneeŋgopieŋ.

²⁵Erâ jâmbomac ŋazape: Elia juhame ʒoaŋ sâko jara jahec â moc â mosa 6 qakume roroc fuarâ mâreŋ sâckerâ fowec. Eme dameŋ ira Israe mâreŋko hozec bocjaha juipiehapie

²⁶Anutuzi Elia Zarefati haeo Sidoŋ mâreŋko qâpuc hozec moc juwec erao soreme rawec.

²⁷Erâ porofete Elisa juwec dameŋ ira Israe mâreŋko wic sanaŋheczi bocjaha jumbiŋ. Eme jaŋeraonec moczi mi fâsâehame Naemaŋ Siria mâreŋkonec e mocjahazi fâsâewec.”

²⁸Iŋuc muhuc jazame mitificko ŋembiŋ jaŋe dâŋ i mana gâpârerâ

²⁹faharerâ hae râpeo tuŋke hurâ hae‐jeŋic ŋewec tiki irec tapinao jowa ferâ hârâc mecko bararâ ira behepie huocte muhapie

³⁰eki ŋondeŋ‐jeŋicko fosiroŋnerâ rawec.

³¹Eme raku Galilaia mâreŋko hae moc ʒâŋene Kafanaum ira fisirâ sabata hombaŋko miti jaza qazuc ewec.

³²Eme e runezi miti muŋɋârâŋkehuc mume jaŋe manapie bu ââkecnehec ewec.

³³Eme mitificko ŋic demoŋ repicnehec moc ŋewec. E Jesu honerâ kâcɋene owackehuc muwec:

³⁴“Jei, Jesu Nazarete rune, go nâŋere jujuo wemocte warekomec? Go sipiric‐nâpocmurâ warekomec me? No ʒâŋitacgukopac, go Anuture Tiriŋic.”

³⁵Iŋuc mume Jesuzi dâŋ mucnerâ muwec, “Go niniŋkerâ ŋickonec wefu rac.” Mume demoŋzi ŋic âtetuŋkeme ŋicŋondeŋko hurâ qaha wefu rawec. Ehuc ŋic e ine qa qâpuriŋ mi ecnewec.

³⁶Eme jaŋe bipic‐jeŋic tarame nazaŋ gazaŋ erâ mumbiŋ: “Hâc, dâŋ keci weniŋucne? E tâpiri sâkoheczi demoŋ dâŋ jazame wefurâ wiseeŋgopieŋ!”

³⁷Eme biŋe‐ticne hae rârec rârec rafârewec.

³⁸Jesu e mitifickonec waharâ Simoŋte ficko fewec. Ira Simoŋ safeŋ‐ticne huc ʒocnehec bame fowec. Eme ere erâ Jesu âzâcnembiŋ.

³⁹Eme eki fowecko raʒirâ erao daperâ huc dâŋ mucneme behewec. Eme ŋokac e biac faherâ nânâ rike gumec ejarewec.

⁴⁰Ʒoaŋ ŋetarame ŋic jaŋe âgofâc‐jeŋic huc ʒâichec Jesurao bacjopa warepie qizec‐jeŋicko meticne râerâ huc ʒâic bâniniŋke‐jarewec.

⁴¹Erâ demoŋ jâpe‐jareme ŋicmaŋkonec wefurâ owa kâcɋene ehuc ʒiŋuc mumbiŋ: “Go Anuture Ŋokâ.” Jaŋe fuŋne‐ticne ʒiŋuc manambiŋ, e Kristo. Eme i mujaŋgeŋkenʒipiŋte mu hezuc ejarewec.