15 Eme ira mitificne ficne miti jazame muac baafec ecne‐fârembiŋ.
16 Juraku sosoka hae‐ticne Nazarete ira iŋuc jaha fisirâ sabata hombaŋko mitificko fewec. E hombaŋ sâc iŋuc ejujec. Ferâ miti wose‐jareocte fahareme
17 porofete Jesaja ere papia râcnembiŋ. Râcnepie qaratierâ dâŋ ʒiŋuc fowec i bâfuawec:
18 “Wofuŋte Mârozi norao waharâ rua‐narehuc gie ʒiŋuc munarewec: Ŋic hujukicne Biŋebiaŋ jazazo, kâpâcwâru bacjopakicne firuec‐jopazo, ʒâŋe tiŋtuŋ ʒâŋe fifi bacjopazo, keke suec suec ejarekicne hefârec‐jopazo,
19 â Wofuŋte dameŋ biaŋ maickekac irec biŋedâŋ muzo.”
20 Dâŋ iŋuc woserâ papia bazurâ kiŋaŋŋic râcnerâ waha ŋewec. Ŋehame ŋic mitificko ŋembiŋ jaŋe mâmâc sasawa erao ʒâŋe fifârembiŋ.
21 Eme dâŋ ʒiŋuc fuŋkerâ jazawec: “Mitidâŋ wosepe manaŋgopieŋ i miŋecgac fârine fuakac.”
22 Mume jaŋe qâtâc herâ dâŋticne manapie aŋac ʒizine eme wareckerâ mumbiŋ: “Hâc, e Josefere ŋokâ i!”
23 Eme eki ʒiŋuc jazawec: “Ŋoŋe nore dâŋ suŋsuŋne qahuc ʒiŋuc mecne mueŋgopieŋ: Dokta go fuŋnege bataniŋkec, Kafanaum haeo gie batec biŋene manaeŋgopeneŋ, ijaha ʒira mame sâko haegao batec honenaŋ me!”
24 Iŋuc murâ muwec: “No jâmbomac ŋazape: Porofere moc e jahacne haefuŋko âgo sâcne mi ecneeŋgopieŋ.
25 Erâ jâmbomac ŋazape: Elia juhame ʒoaŋ sâko jara jahec â moc â mosa 6 qakume roroc fuarâ mâreŋ sâckerâ fowec. Eme dameŋ ira Israe mâreŋko hozec bocjaha juipiehapie
26 Anutuzi Elia Zarefati haeo Sidoŋ mâreŋko qâpuc hozec moc juwec erao soreme rawec.
27 Erâ porofete Elisa juwec dameŋ ira Israe mâreŋko wic sanaŋheczi bocjaha jumbiŋ. Eme jaŋeraonec moczi mi fâsâehame Naemaŋ Siria mâreŋkonec e mocjahazi fâsâewec.”
28 Iŋuc muhuc jazame mitificko ŋembiŋ jaŋe dâŋ i mana gâpârerâ
29 faharerâ hae râpeo tuŋke hurâ hae‐jeŋic ŋewec tiki irec tapinao jowa ferâ hârâc mecko bararâ ira behepie huocte muhapie
30 eki ŋondeŋ‐jeŋicko fosiroŋnerâ rawec.
31 Eme raku Galilaia mâreŋko hae moc ʒâŋene Kafanaum ira fisirâ sabata hombaŋko miti jaza qazuc ewec.
32 Eme e runezi miti muŋɋârâŋkehuc mume jaŋe manapie bu ââkecnehec ewec.
33 Eme mitificko ŋic demoŋ repicnehec moc ŋewec. E Jesu honerâ kâcɋene owackehuc muwec:
34 “Jei, Jesu Nazarete rune, go nâŋere jujuo wemocte warekomec? Go sipiric‐nâpocmurâ warekomec me? No ʒâŋitacgukopac, go Anuture Tiriŋic.”
35 Iŋuc mume Jesuzi dâŋ mucnerâ muwec, “Go niniŋkerâ ŋickonec wefu rac.” Mume demoŋzi ŋic âtetuŋkeme ŋicŋondeŋko hurâ qaha wefu rawec. Ehuc ŋic e ine qa qâpuriŋ mi ecnewec.
36 Eme jaŋe bipic‐jeŋic tarame nazaŋ gazaŋ erâ mumbiŋ: “Hâc, dâŋ keci weniŋucne? E tâpiri sâkoheczi demoŋ dâŋ jazame wefurâ wiseeŋgopieŋ!”
37 Eme biŋe‐ticne hae rârec rârec rafârewec.
38 Jesu e mitifickonec waharâ Simoŋte ficko fewec. Ira Simoŋ safeŋ‐ticne huc ʒocnehec bame fowec. Eme ere erâ Jesu âzâcnembiŋ.
39 Eme eki fowecko raʒirâ erao daperâ huc dâŋ mucneme behewec. Eme ŋokac e biac faherâ nânâ rike gumec ejarewec.
40 Ʒoaŋ ŋetarame ŋic jaŋe âgofâc‐jeŋic huc ʒâichec Jesurao bacjopa warepie qizec‐jeŋicko meticne râerâ huc ʒâic bâniniŋke‐jarewec.
41 Erâ demoŋ jâpe‐jareme ŋicmaŋkonec wefurâ owa kâcɋene ehuc ʒiŋuc mumbiŋ: “Go Anuture Ŋokâ.” Jaŋe fuŋne‐ticne ʒiŋuc manambiŋ, e Kristo. Eme i mujaŋgeŋkenʒipiŋte mu hezuc ejarewec.
