San Lucas 4:15-41

¹⁵Rseedny de bniety láani de yudoo irate de nezqui, ne iratedeb rniideb diidx zaac pur laany.

¹⁶Chiy Jesús güeny Nazaret guɨdx rut guroony. Ne dxi ni rzilaaz de bniety ax biiuny láani yudoo zec ni guc xmodny, chiy guzuldíny par biildyny lo xquiits Dios.

¹⁷Bdeeddeb laany librɨ xte profet Isaías. Ne chi bxalny láani librɨqui, bdxialny tuby lat rut rnii:

¹⁸Spírit xte Xtadnɨ Dios zuguané nare te pur abanldeeny quiaa par iniia de didxzaac xte Dios lo de bniety ni ná prob. Abxiaaldny nare par gacnía de bniety ni nuu nalas, par quixtiia lo de bniety xa xquel ldádeb, laadeb ni rnabee duld lodeb, par ixala de bslo de bniety ciagu ne par gacnía de bniety ni cadeed guelzii.

¹⁹Ne par quixtiia dec abdzɨny dxi ni arbez Xtadnɨ Dios par gunldeeny quia de ni quíily laany.

²⁰Chiyru bchii Jesús lo librɨqui ax bdeedny librɨqui bniety ni racné láani yudooqui ax guriny. Ne irate de ni nuu láani yudooqui güelaaru bguiaadeb laany,

²¹chiy laany guzulo caninény laadeb, guniiny: —Andxigacré aguzub zec ni rnii lo xquiits Dios ni abindiagtɨ.

²²Iratedeb guniideb de diidx zaac pur Jesús, ne quesentiand rdxalodeb pur de diidx zaac ni rniiny ax guzulo rnabdidxsaadeb: —¿Ta gati laabɨy llingaan Gusé?

²³Jesús raipny laadeb: —Nare nánpaca dec laat teru iniit nare diidx ni rnii: “Doctor, baany rmɨdy lagac liú”, ne sniizactɨ nare: “Ni bindiagnɨ baaniu guɨdx Capernaum, baanza ziy ladxu.”

²⁴Ziyza raipy Jesús laadeb: —Nare rguixtiia lot nic tuby profet quɨt rcaaztideb laab ladxbɨ.

²⁵¿Ta quɨt renelaaztɨ chi guu profet Elías? Gulalqui zieny gunaa viud guu lo naciony Israel chi quɨt biabti nisguia chon iz iruld ne iduibte nezqui guu gubiny.

²⁶Per Elíasqui quɨt bxiaaldti Dios laab par gacnéb tuby viud ni rbez Israel sino que par tuby viud ni gulez guɨdx Sarepta, ni ná gax guɨdx Sidón.

²⁷Ziyza guu zieny bniety Israel ni guc guelguidx ni lá lepra chi beed profet Eliseu, per nic tubydeb quɨt bsiactib sino que laab bsiacbɨ Naamán tuby bɨnzít ni zá nez Siria.

²⁸Chi bindiagdeb de diidxré, irate de ni nuu láani yudoo quesentiand bdxiichdeb.

²⁹As güesuldídeb par guléedeb Jesús láani guɨdxqui ne quia tuby dany ná guɨdxqui. Chiy güenédeb laany ruxchu guɨdxqui par nizáalddeb laany desdɨ ruy.

³⁰Per Jesús gudeedny glaydeb ax zégacny.

³¹Chiyru zé Jesús Capernaum tuby guɨdx xte Galilea. Ruy, dxi ni rzilaaz bniety, laany bseedny laadeb.

³²Quesentiand rdxalodeb xquel ni rliuuny laadeb te pur rninény laadeb cun guelrnabee.

³³Láani yudooqui nuu tuby bniety nguiu ni nuu tuby bɨndxab láani lazdooni ax gurɨxtiab:

³⁴—Bsaanbiu dunnɨ, Jesús de Nazaret. ¿Xínii riutébiu cun dunnɨ? ¿Ta zéedbiu par initlobiu dunnɨ? Nare rumbiia laabiu, ne nánna dec laabiu nábiu Bniety sant xte Dios.

³⁵Jesús byaynény bɨndxabqui guniiny: —¡Dxichgaruu, bdiia láani bnietquɨ! Chiy bɨndxabqui bzáaldiy bnietqui nez lo iratedeb ax bdiiangui láani bnietqui sin quɨt xi niactib.

³⁶Iratedeb bdxibdeb ne bdxalozadeb ax guzulo raipdeb saadeb: —¿Xi de diidxquɨ? ¡Bnietré napbɨ guelrnaberoo ne rnabeeb de bɨndxab par rdiiadeb láani bniety!

³⁷Ne iduibte de nezqui rueedeb diidx pur Jesús.

³⁸Chiyru güesú Jesús bdiiany laniudoo zény liz Simóny. Xnansuegrɨ Simóny racxúb quesentiand nuub xliaa, ax gudiindeb lo Jesús pur laab.

³⁹Jesús guzurlony ax gunabeeny ibicá xliaaqui ax gubicá xliaaqui. Hóracqui güeste bnietqui ax guzulo bíub laadeb.

⁴⁰Chi bieezy gubidx, irate de bniety ni racxú de xfamilni, güenédeb de bniety ni ráp iralote guelguidx lo Jesús ax bzubnaany quia cad tubydeb ziy xquel bsiacny laadeb.

⁴¹Zieny bniety racxú, nuudeb bdiiaza bɨndxab láani lazdoodeb rbɨxtiadengui: —Laabiu nábiu Lliin Dios. Per Jesús gudildnény de bɨndxabqui ne quɨt bsaantiny niniidengui te pur de niy nándengui dec laany nány Crist.