Luku 4:15-41

¹⁵Ipikana꞉ma꞉ Koda꞉na꞉ pi hotu haemeke damanu pa꞉ta꞉ pua꞉tiki pea wanda꞉hali pa꞉ta꞉ pi wala꞉tiki pomieke handaata꞉ mo wanda꞉hali paeyaoma꞉ ipika꞉ biki mea miniliatiki pimikime.

¹⁶Kutupa Yesu ipika꞉ daeyeke da Na꞉sa꞉tete da pa꞉ta꞉ pua ipika꞉ pu hayeke tupa꞉ Diu wanda꞉halina꞉ hoto pitu haemeke natena꞉ Koda꞉na꞉ pi hotu haemeke da pa꞉ta꞉ peekeme. Kutupa ipikana꞉ma꞉ mo Baibolo buka yata꞉puluekema꞉ yeke tiao hayekeme.

¹⁷Hali ma꞉nda꞉ma꞉ mo Koda꞉na꞉ potopede hali Aisayama꞉ wape pu wieke buka Yesu pa꞉ta꞉ haleekeme. Kota꞉ Yesuma꞉ mo buka lombaata꞉ handa꞉tiki pua pi ma꞉nda꞉ dupa laeyekeeki handa꞉ witolo hata꞉ yata꞉peekeme.

¹⁸I̱ma꞉ natehali wanda꞉hali pa꞉ta꞉manu mo Pi Seliapomanu laanoyeke mo I̱ mea haena꞉ la꞉la꞉ Tekehalima꞉ ipika꞉ Sipitidi I̱ yaapo hala꞉me. Ipikana꞉ma꞉ I̱ tapaala꞉ ekita꞉ mo dipula pila꞉ wanda꞉hali ikita꞉ ka꞉la꞉pa꞉ tapao halememe lono make mo leke holupiki wanda꞉hali ikita꞉ ika꞉ leke manuma꞉ paa handilimikie laa lonoyeke tapaala꞉me. Kutupa make mo ika꞉ ka꞉nda꞉ manuma꞉ kone tekepa꞉ta꞉ hoeyaapeke ya꞉la꞉ wanda꞉hali ka꞉la꞉pa꞉ tapawano make

¹⁹wanda꞉hali wotu pa꞉ta꞉ta꞉ Tekehalima꞉ ipika꞉ wanda꞉hali tamba꞉ mulu pa꞉la꞉ nate a꞉pa hala꞉me laa lono yeke I̱ tapaala꞉me laa leekeeki yata꞉peekeme.

²⁰Yesuma꞉ mo buka yata꞉paata꞉ amba꞉ bukamanu handeteke hayeke hali pa꞉ta꞉ paa hala꞉ moneao pitiniaeyekeme. Kota꞉ mo Koda꞉na꞉ pi hotu haemeke da pa꞉ta꞉ pitimiki wanda꞉hali paeyao sikima꞉ Yesu handolo hata꞉ yola꞉ pambemekeme.

²¹Kota꞉ Yesuma꞉ iki pa꞉ta꞉ pi alo hata꞉ alota꞉ Do yata꞉pa kua꞉ hande Baibolo pita꞉ ikana꞉ma꞉ opitolo hamena꞉ kone ota꞉ ame do kone yaya꞉me leekeme.

²²Ipika꞉ leeke pi manuma꞉ tende pieke handaa iki paeyao siki leke opa penkiliputia pominolo hata꞉ make haleke lomba mo ikana꞉ma꞉ ipikina꞉ do pi lemekeme. Ipikita꞉ Diosepena꞉ eiyeke dia꞉yekea laa ika꞉ ika꞉ kone lota꞉ pu alu alu pimikime.

²³Koto lemeke handaa Yesuma꞉ mo wanda꞉hali pa꞉ta꞉ alota꞉ Ota꞉ loa꞉me laa Ikana꞉ma꞉ I̱ pa꞉ta꞉ make mo wanda꞉halima꞉ amba꞉ loma꞉ loma꞉ pa꞉la꞉me pi siki ma꞉nda꞉ dupa lelimikie. Dokeda halio. Naka꞉ yenita꞉ naka꞉ kone mea epeapeke lelimikie. Kutupa pi ma꞉nda꞉ make I̱ pa꞉ta꞉ dupa lelimikie. Hau ma꞉nda꞉ ma꞉nda꞉ mo Kapeneami teke da nane hata꞉ pi hande hau manuta꞉ nikana꞉ma꞉ amba꞉ opuma꞉me. Kota꞉ do naka꞉ ota꞉ teke da pa꞉ta꞉ make kutupiki homeke haumanu kone pie laa lelimikie laata꞉

²⁴Yesuma꞉ iki pa꞉ta꞉ alota꞉ I̱ma꞉ iki pa꞉ta꞉ alome. Koda꞉na꞉ pi wala꞉la꞉ potopede hali ipika꞉ teke wanda꞉halima꞉ ipiki hone wotu na wilimikie.

²⁵Opua꞉pe. I̱ma꞉ iki pa꞉ta꞉ ota꞉ pi alome. Mo Elaidia hayeke dina꞉ta꞉ kineke wanda꞉ sunuta꞉ wotu aneke hapu mo Isulai da yu pa꞉ta꞉ haemekeme. Koto natena꞉ bapi tepona꞉ sumba꞉ yunki mindiki hata꞉ lako ota꞉ na a꞉paata꞉ da yu paeyao pa꞉ta꞉ tea꞉ma꞉ homa꞉la꞉eki wotu aneke hapu epeekeme.

²⁶Kutu piekepate Koda꞉ma꞉ Elaidiata꞉ Isulai da yu pa꞉ta꞉ hayeke wanda꞉hali ma꞉nda꞉ pa꞉ta꞉ na tapaeyekepate ipikita꞉ mo Saidoni da yu tukiki pa꞉ta꞉ hayeke teke da Sa꞉tepa꞉di hayeke kineke wanda꞉ homeke pa꞉ta꞉ tapaeyekeme.

²⁷Kutupa make Koda꞉na꞉ pi la꞉ mea halo hayeke hali Elaisa hayeke dina꞉ta꞉ kindi yeni homo haemeke wanda꞉hali wotu anekema꞉ mo Isulai da yu pa꞉ta꞉ haemekepate Koda꞉ma꞉ koto wanda꞉halita꞉ ota꞉ ma꞉nda꞉ hondo na mea epeaeyekepate pa Sitia da yu pa꞉ta꞉ hayeke hali Neimana꞉ homeke mea epeaeyekeme leekeme.

²⁸Mo Koda꞉na꞉ pi hotu haemeke da pa꞉ta꞉ pitimiki wanda꞉halima꞉ koto pi leekeeki opua ikana꞉ma꞉ mineke tieke wotu pankemekeme.

²⁹Kutupa ikana꞉ma꞉ tiao Yesu minaa ika꞉ teke da mina꞉pa꞉lao hama nane yolaa pemekeme. Mo ika꞉ teke data꞉ pote elina꞉ hayekeeki yaalo Yesu mo pote elina꞉ hatuku pua oni paeleke alena꞉ poneke wato lopaaluekema꞉ hatuku pemekeme.

³⁰Kutu pimikipate Yesuta꞉ mo wanda꞉hali anka꞉lopuna꞉ pa꞉ta꞉ kone pa pa꞉nka꞉pa peekeme.

³¹Kutupa Yesuta꞉ mo Ka꞉lili da yu pa꞉ta꞉ hayeke teke da Kapeneami nane peekeme. Puaata꞉ mo hoto pitu haemeke natena꞉ wanda꞉hali pa꞉ta꞉ pi waleekeme.

³²Mo wanda꞉halima꞉ta꞉ Yesuma꞉ waleekeeki opuaata꞉ leke opo handake wimikime. Pa ekipeke. Ipikana꞉ma꞉ biki ula꞉ halima꞉ wala꞉la꞉ tupa꞉ waleeke handaa pimikime.

³³Mo pi hotu haemeke da pa꞉ta꞉ta꞉ hoke temoko pitieke hali ma꞉nda꞉ hayekeme. Koto halima꞉ Yesu handaata꞉ ipiki pa꞉ta꞉ wi aneke hapu la alota꞉

³⁴Ae. Yesu Na꞉sa꞉tete da halio. Nakana꞉ma꞉ta꞉ niki ame̱le̱ eki puluekema꞉ a꞉pa pipa꞉ laata꞉ Neke epele ekita꞉ niki paeyao mea hoeyaaluekema꞉ a꞉pa pipe. Neketa꞉ I̱ma꞉ hone witolome. Neketa꞉ Koda꞉ma꞉ tapaeya꞉ yako piki hali ya꞉ka꞉ta꞉me leekeme.

³⁵Koto ekina꞉ Yesuma꞉ mo hoke temoko pa꞉ta꞉ tandapiki pi alo hata꞉ alota꞉ Neketa꞉ koto hali ota꞉ mina꞉pa꞉lao naka꞉ pi na leke a̱i̱ hosiki ya꞉la꞉na꞉ kone yopue leekeme. Koto pi leekeeki opua mo hoke temokoma꞉ mo wanda꞉halina꞉ leke taapuna꞉ mo hali mea wato lopao yopusiki hama nane opolu baeyekepate mo halina꞉ loke ma꞉nda꞉ na mea hoeyaeyekeme.

³⁶Koto eki handaata꞉ wanda꞉hali paeyao sikima꞉ penkilipa꞉tia pomua ika꞉ ika꞉ kone pi la alu alu pitolo hata꞉ alota꞉ Dota꞉ ekipiki pimanu ala꞉pe laata꞉ Do halita꞉ you hali ma꞉nda꞉ma꞉ leke nono pita꞉la꞉ tupa꞉ mo hoke temokomanu pa꞉ta꞉ dupi dupi aleke handaa hama ipulimime lemekeme.

³⁷Koto ekina꞉ta꞉ wanda꞉hali manuma꞉ Yesuma꞉ pieke ekimanu handaata꞉ da yu ma꞉nda꞉ ma꞉nda꞉ pa꞉ta꞉manu kendetia pomimikime.

³⁸Yesu mo Koda꞉na꞉ pi hotu haemeke da mina꞉pa꞉laota꞉ Saimonona꞉ da pa꞉ta꞉ peekeme. Saimonona꞉ meiyeke wanda꞉ta꞉ titipu yeni tiekema꞉ homa꞉pa wieke handaa ikana꞉ma꞉ Yesu pa꞉ta꞉ mo wanda꞉na꞉ yeni hayeke tupa꞉ la halemekeme.

³⁹Kota꞉ ipiki pua mo wanda꞉ homa꞉pa wieke alena꞉ pa꞉ta꞉liki nane pua tiao hata꞉ mo hande titipu yeni hayeke ekima꞉ mo wanda꞉ mina꞉pa꞉laena꞉ tanda piki pi leekeme. Kutupiki pi leeke handaata꞉ mo yenima꞉ mo wanda꞉ mina꞉pa꞉lao tandela꞉pa yapeeke handaata꞉ koto kone mo wanda꞉ma꞉ tiao hata꞉ mo tapakena꞉ ne wamo peayekeme.

⁴⁰Nate amba꞉ pambeeke hoki naneta꞉ wanda꞉halima꞉ ika꞉ yankeke sunu ane mone yeni manuma꞉ homa꞉pa wia꞉tiki pimiki yeke handaa Yesu teke pa꞉ta꞉ mea epemeke handaa ipikana꞉ma꞉ ipika꞉ kiki iki manda wia꞉tiki pieke handaa paeyao mea epeatiki piekeme.

⁴¹Kutupata꞉ mo hoke temoko manuma꞉ wanda꞉hali aneke tukiki pa꞉ta꞉ pita e̱ la꞉tiki yopulu hata꞉ alota꞉ Neketa꞉ Koda꞉na꞉ eiyekee lemekeme. Yesuma꞉ mo hoke temoko manuma꞉ pi ma꞉nda꞉ laama꞉na꞉ pi taka꞉lake leekeme. Pa ekipeke. Ika꞉ hone wimikipate ipikita꞉ hande Mesaya yeke handaa pimikime.