LUKA 12:6-35

⁶Kodi munthu ambagulisa lini ajolo axanu na konto ziwiri basi? Na tenepo palibe na m'bodzi yekha omwe Mulungu ambamuyebwa.

⁷Napo tsisi lentse la mumsolo mwanuli, Mulungu adaliwerenga kale. Lekani kugopa, thangwe imwepo mun'funika kwene-kwene kuposa ajolowo.

⁸Ndipo Jezu adalewa pomwe kuti: Ule omwe an'dibvuma pakati pawanthu, na Mwana wa Munthu an'dzamubvumambo pakati paanjo wa Mulungu.

⁹Tsono ule omwe an'dilamba pakati pawanthu, ndipo Mwana wa Munthu an'dzamulambambo pakati paanjo wa Mulungu.

¹⁰Ule omwe an'tukwana Mwana wa Munthu, Mulungu an'dzamulekera bza kuipa bzace. Tsono ule omwe an'nyoza Mzimu Wakucena, Mulungu an'dzamulekera lini.

¹¹Ndipo akadzakutengani acidzayenda namwe kunyumba zakupembera, ayai kuna atongi na kumphambvu za umangi, dzalekeni kukhala na thupo kuti mun'dzatawira ciani ayai mun'dzalewa ciani.

¹²Nakuti Mzimu Wakucena un'dzakupfundzisani panthawe imweyo kuti mun'dzalewa ciani.

¹³Munthu mwinango pantithipo adakuwa kuti: “Misiri, uzani m'bale wanguyu kuti tigawane utaka bwa babathu.”

¹⁴Ndipo Jezu adamutawira kuti: “Nandi iwe! Kodi mbani adandipasa basa la kutonga na kugawira wanthu utaka?”

¹⁵Ndipo iye adawawuza pomwe kuti: Khalani na cheru kuti muleke kucita m'tima loko-loko na cinthu, nakuti moyo wa munthu ulibe basa na kuwanda kwa bzinthu bzacebzo.

¹⁶Na tenepo iye adawatsikira pomwe matere aciti: “Pakhana munda wa munthu m'bodzi nyakudala omwe udakosa bzakudya bzizinji kwene-kwene.

¹⁷Ndipo iye adakumbuka mumtima mwace kuti: 'kodi ine-pano phoso limweri ndini likoya kuponi?

¹⁸Ndipo iye adalewa kuti: 'Ndin'dzapfudza magwangwa yanguya ndicidzamanga yanango makulu ndipo ndicidzakoya m'mwemo phosolo na bzinthu bzangu bzinango.

¹⁹Pamwepo ine ndin'dzalewa na mumtima kuti: 'Moyo wangu una bzinthu bzentse bzomwe un'funa bza magole mazinji, tsapano derekha, udye, umwe, udakondwa.'

²⁰Tsono Mulungu adamuwuza kuti: 'Nandi dzengawe! Usiku buno unifa iwepo. Kodi apa mbani an'sala na bzinthu bzomwe udakoyabzi?'

²¹Na tenepo, bzidakhala ninga munthu nyamingululi omwe ana cuma cizinji kwene-kwene, tsono alibe kupasa Mulungu cinthu.

²²Na tenepo Jezu adawacenjeza ateweri wace kuti: “Lekani kukhala na thupo mumtima kuti mun'dzadyanyi ayai kuti mun'dzabvalanyi nthupi mwanumu.

²³Nakuti moyo ngukulu kuposa cakudya, na thupimbo lina basa kuposa cakubvala.

²⁴Ndipo onani akhungubwe. Iwo ambalima lini, ambabvuna lini, alibe magota ayai magwangwa. Ndipoi Mulungu ambawadyesa basi. Tsono imwepo mun'funika kwene-kwene kuposa mbalamezo!

²⁵Kodi mbani angakhale nathupo na moyo wace ndipo angakwanise kubzithumizira pomwe ntsiku ibobzi?

²⁶Na tenepo penu imwe mun'kwanisa lini kucita bzinthu kang'onobzi, thangwe ranyi muna thupo na bzinthu bzinango?

²⁷Tsono onani maluwa momwe yambakulira! Ndipo iyo yambaphata lini basa ayai kusona bzakubvala. Napo Salomau na mbiri yentse yomwe akhanayo, akhalibe bzakubvala bzakugaka bwino kuposa maluwayo.

²⁸Ninga momwe Mulungu ambabvazikira mausuwa ya mthengo, yomwe yambamera ninga lero mangwana yacipsa na moto. Napo imwepombo ndimwe wanthu wakusaya cikhulupiropa, kodi iye angakwanise lini kukubvazikanimbo?

²⁹Na tenepo lekani kukhala na thupo kuti mun'dzadyanyi ayai kuti kun'dzamwanyi.

³⁰Thangwe wanthu wa mudziko, ndiwo ambafunisisa bzentsenebzi. Tsono Babanu an'dziwa kale kuti imwepo mun'bzifuna.

³¹Tomani mwanyang'ana umambo bwa Mulungu. Ndipo bzinthu bzinangobzo Iye an'dzakupasani.

³²Nandi tubzifuwo tuwangu, lekani mantha! Nakuti Babanu an'funa kukupasani umambo bwace.

³³Na tenepo gulisani bzinthu bzanu, mupase anyakusauka. Ndipo sonani mabudu yomwe yan'sakala lini. Nakuti cuma ca kudzulu cimbamala lini, komweko kulibe mbava, ayai manthedza kuti yangajete.

³⁴Nakuti pale pomwe pana cuma canu na mtima wanu uli pamwepombo.

³⁵Ndipo kondzekerani kuti muphate basa. Mibvuniko yanu ikhali idagaka.