Luuka 12:6-35

⁶Anyannyi athaanu attiitthi-attiitthi khanuuzanyisiwa sinku piiri? Ila apo aya khaavo mmote Nnyizinku aninsahawaaye.

⁷Hatha na nyuuli za mmwishwa mwenu zooshi pi za waalakiwa. Mwihoove, mweeyo mwinaaye fwayita zayita anyannyi apo a waatta.”

⁸Yinsa khuri: “Miiyo kiniwuuzani yoori: otule antukhurwaaye vakatthi wa atthu yoori namalottela aka, Mwaana wa Pinaatamu onteela otukhuru vakatthi wa malayikha a Nnyizinku.

⁹Ila otule ankikatthalaaye vakatthi wa atthu, na-ye onteela okatthaliwa vakatthi wa malayikha a Nnyizinku.

¹⁰Wooshi otule anintarawaaye Mwaana wa Pinaatamu onswaamihiwa, ila otule ankufurwelaaye Rooho Ttakatthiifu khanswaamihiwa.

¹¹Amana mwithuuliwa olawa ophukiwa nnyupa woosifwiwamo Nnyizinku ama wa afwalume, mwihiiyane shaakha khwa nanna mwinttelaaye ojaakisa ama etthu mwinttelaaye olupa.

¹²Wakathi otthuupo Rooho Ttakatthiifu entta wuuthoonyezani etthu yoolupa.”

¹³Mwinyi mmote wa khuntti etile khunvekela Yinsa araka: “Mwanliimu, omuuze ttwiiyaku akaawanyele maali epile alikhiyeeyo papeetthu.”

¹⁴Yinsa khunjipu araka: “Weyo, paani akirettiye wiiya namaphuka enu wala namwaawanya wa maali zenu?”

¹⁵Khuwooza yoori: “Phoole na omaashokopho wooshi wa vitthu, mwaasa yoori ohaayi wa pinaatamu khunlipa na vitthu epile ampatthaazo za waatta.”

¹⁶Yinsa khulupa nlikaniso araka: “Aarivo mwinyi mmote wa thaajiri aaruweriyeeyo channu.

¹⁷Ye khusala awaza toono: ‘Kirette-ni? Akina vahali wootthaavo peewu zaka epi.’

¹⁸Khulupa yoori: ‘Aa, kajuwa etthu yooretta. Kintta opwecha matthala apa mattiitthi kijeke mawulu-mawulu yoori kittheemo peewu zaka na vitthu zaka zooshi epile kiriinaazo.

¹⁹Nawiisha, kuuze nafusi yaka yoori: onaaye peewu na vitthu za waatta zintoshelezaaye nyaakha za waatta; ovumule, oje, onywe na opuhe.’

²⁰Ila Nnyizinku khumuuza yoori: ‘Nlolo! Osikhu otthuupu ontta ofwa. Maali zawo paani anttelaaye osalana?’”

²¹Yinsa khumarisela araka: “Ntthu oto ori nkhama atthu apale anlipanaaye maali zaya ila khuhiiyi mathaajiri mmakhono wa Nnyizinku.”

²²Aphano Yinsa khuwooza anakhiyoni awe araka: “Ti eto kiniwuuzaanini yoori: mwihiiyane shaakha na ohaayi enu, wala etthu mwinttelaaye oja ama etthu mwinttelaaye owala.

²³Maana ohaayi ona fwayita khuluyeene zayita etthu-yoojiwa na mwiili ona fwayita khuluyeene zayita kuwo.

²⁴Mwiwoone anakhuku; khanzala wala khanuurula hatha ntthala khana loopwehavo vitthu-zoojiwa zaya, ila Nnyizinku oniwenkha etthu-yoojiwa. Mweeyo mwinaaye fwayita khuluyeene zayita anyannyi apo!

²⁵Paani vakatthi venu anwahaaye weekezela mansha awe hatha nkhama eetta oshukulikhela?

²⁶Mweeyo khamwinwahi oshintta vitthu ttiitthi-ttiitthi, khi mwinshukulikhela toovi kinoko zaya?

²⁷Moone nanna anwulaazo maluwa oshapweya ntthuttu, khankhola khaazi wala khanvaasha kuwo, ila kiniwuuzani yoori: Seleyimaana aari thaajiri nwulweene, ila khawaleeni kuwo zooripelela nkhama maluwa atthaapo.

²⁸Nnyizinku onwalisa nyaani ziriiye ntthuttu leelo meesho zeettelaka olukula, sapiseni mweeyo atthu a amini ttiitthiiru khatepeeni wuuwalisani?

²⁹Mwihishukulikhele etthu mwinttelaaye oja ama onywa.

³⁰Atthu apale ahininjuwaaye Nnyizinku pa yo anshukulikhelaaye vitthu epo, ila mweeyo Papeenu onjuwa yoori enuuhithajiyani vitthu epo.

³¹Mweekese khapula Ofwalume wa Nnyizinku, vitthu zaya epo mwintta weekezeliwa.”

³²Yinsa khulupa theenya araka: “Mwihoove mweeyo mwiiyiye nkhama khuntti ttiitthiiru ya pwittipwitthi, maana Papeenu ti ye atakhiye owinkhani Ofwalume awe.

³³Muuzanyize zooshi mwiriinaazo nzurukhu aya mwiwenkhe asikhini, mwijaattalelele mifukho zihinvaruwaaye, toowo mwinthokorela maali pinkuuni zihiniishaawo, okhu ahimfiyaawo nantarawu wala maweephe yoori aharipu.

³⁴Maana attaapho eniiyaavo maali zawo rooho yawo eniiya attaapho.”

³⁵Yinsa khuvira alupaka yoori: “Mwiiye anamarumeyela oojeekesela na khantteya zenu ziri zookhoziwa.