LUKU 12:6-35 - Luda yã takada kↄ̃n Bokobaru yão

LUKU 12:6-35

Click on verse(s) to share them!

⁶Wè sãtɛ̃ mɛ̀n sↄↄro yá kↄbↄ plaaroo? Mↄde aↄ̃ ke yã è sã Ludanlo.

⁷Baa a mìkãnↄ, à à lɛ́ dↄ̃. Àton vĩa kɛro, a bɛ̀ɛ dɛ sãtɛ̃ pariinↄla.

⁸Mɛ́ɛ ooare, gbɛ̃ kɛ̀ zɛ̀mao gbɛ̃nↄ aɛ, Gbɛ̃ntee Nɛ́ é zɛo Luda malaikanↄ aɛ.

⁹Gbɛ̃ kɛ̀ lɛ́ sɛ̀mazi gbɛ̃nↄ aɛ sↄ̃, mɛ́ lɛ́ sɛ́zi Luda malaikanↄ aɛ.

¹⁰Tó gbɛ̃ Gbɛ̃ntee Nɛ́ zaa bò, Luda é kɛ̃nɛ. Mↄde tó gbɛ̃ Luda Nini tↄ́ zaaa sì, eé kɛ̃nɛro.

¹¹Tó wèe gaaao yãkpaɛkɛkiia aduakɛkpɛn ke kínanↄ kↄ̃n gbãadeenↄ aɛ, àton a zĩnda bↄna ke yã kɛ̀ é o damu kɛro,

¹²zaakɛ Luda Nini bé eé yã kɛ̀ dɛ à oo daare zĩ beeea.

¹³Zà guu gbɛ̃ke bè Yesunɛ: Dannɛri, ǹ o ma vĩ̀inɛ à ma baka kpáma wa túbi guu.

¹⁴Ben à wèàla à bè: Ma gbɛ̃, dé bé à ma diɛ a yãkpaɛkɛri ke a yãgↄ̃gↄ̃ri ũu?

¹⁵Ben à bè gbɛ̃nↄnɛ: Àgↄ̃ a zĩnda kũna dↄ̃. À làakari kɛ pↄ́ píngi aĩapãsĩkɛnazi, zaakɛ auziki nɛ́ gbɛ̃ntee wɛ̃̀ndinlo, baa tó à fↄ̃̀ àgↄ̃ dikↄ̃a dia.

¹⁶Ben à yã lɛ̀kↄ̃zińnɛ à bè: Ɔↄdee bé à kuu à buraa blɛɛ kɛ̀nɛ maamaa,

¹⁷ben à laasuu lɛ̀ à bè: Bↄ́n mɛ́ kɛɛ? Má blɛwɛɛkakii vĩro.

¹⁸Ben à bè: Pↄ́ kɛ̀ mɛ́ kɛɛn yɛ̀: Mɛ́ ma pↄ́kaɛkiinↄ gboro, mɛ́ à bítanↄ bo, mɛ́ ma blɛwɛɛ kán píngi kↄ̃n ma auzikinↄ.

¹⁹Mɛ́ be ma zĩndanɛ: Gbɛ̃, n gĩakɛ ń pↄ́ maaa vĩ bíta kɛ̀ eé kányo wɛ̃̀ ũgbangba? Ǹ kámma bo ǹ pↄ́ ble ǹ í mi ǹ pↄnnaa kɛ.

²⁰Ben Luda bènɛ: Yↄ̃nkↄ, gwãavĩa mɛ́ n wɛ̃̀ndi gbekamma. Soru kɛ̀ ń kɛ̀ é gↄ̃ dé pↄ́ ũmɛ?

²¹Lɛmɛ gbɛ̃ kɛ̀ auziki tↄ̃̀kↄ̃azi, mↄde à dɛ ↄↄdee ũ Luda kiiaro yã dɛ lɛ.

²²Ben à bè a ìbanↄnɛ: Beee yãnzi mɛ́ɛ ooare, àton a wɛ̃̀ndi kã̀hãn kɛ à be bↄ́n wé blero, àton a mɛ̀ kã̀hãn kɛ à be bↄ́n wé daro.

²³Wɛ̃̀ndi dɛ pↄ́bleela. Mɛ̀ dɛ pↄ́kãsãala.

²⁴À gbáa kãnkãnanↄ gwa. Aↄ̃è pↄ́ tↄ̃ro aↄ̃è pↄ́ kɛ̃ro, aↄ̃ↄ dↄ̃̀ ke gbàsↄ vĩro, baa kↄ̃n beeeo Luda è ń gwa. Á bɛ̀ɛ vĩ maamaa dɛ bãanↄla fá!

²⁵A tɛ́, dé bé eé fↄ̃ à a wɛ̃̀ndi gbã̀a kaara, baa gurↄ do, a kã̀hãnkɛna guuu?

²⁶Tó é yã nɛ́ngo kɛ̀ fↄ̃ro, bↄ́yãnzi ée yã kpaaanↄ kã̀hãn kɛɛzi?

²⁷À lá vúdeenↄ gwa sɛ̃̀n lán aↄ̃ↄ dɛ nà. Aↄ̃è zĩi kɛro aↄ̃è buu tãro, mↄde mɛ́ɛ ooare baa Sulemanu kↄ̃n a auzikio, èe uta da à maaa kà aↄ̃ ke ũro.

²⁸Sɛ̃̀la kɛ̀ kuu gbã̀a eé tɛ́ kũ zia, lán Luda è pↄ́ nazi lɛ nà, amↄa ludanaanɛkɛ̃sãnadeenↄ, weé a pↄ́ o dↄↄ́?

²⁹Àton tó pↄ́ kɛ̀ é ble ke pↄ́ kɛ̀ é mi yã dↄare aɛro. Àton à damu kɛro.

³⁰Pↄ́ pìnↄ píngi yã è dↄ anduna kɛ̀ kifiinↄnɛ aɛ, a De sↄ̃ↄ dↄ̃ kɛ̀ pↄ́ pìnↄ kↄ̃ sìao.

³¹À tó kpata kɛ̀ bↄ̀ à kiia yã dↄare aɛ, eé pↄ́ pìnↄ kaaraare.

³²Ma kpàsa nɛ́ngo gbɛ̃nↄ, àton vĩa kɛro, zaakɛ a De pↄyezimɛ à a kpá kpata pìn.

³³À pↄ́ kɛ̀ á vĩinↄ yá à takaasideenↄ gba à ↄↄ. À ↄↄsↄ kɛ̀ è zi kũroo zↄ̃, ludambɛ auziki kɛ̀ è yãaro kákii ũ, kɛ̀ kpãi è sↄ̃ziro, kↄ̀kↄ sↄ̃ è à yakaro.

³⁴Zaakɛ guu kɛ̀ a auziki kún, gwen a làakari égↄ̃ kún se.

³⁵Àgↄ̃ kú soru guu, à tó a fitia gↄ̃ nana.