Lucas 10:4-20

⁴Ikà niyo egpengibing te kwarta, aw kelepì, aw sepatos ekasan niyo. Aw doen otaw kitaen niyo doton te dalan, ikà niyo egsempetanun kandan amon eked kaw keanggà.

⁵Aw domateng kaw doton te balay, onà kaw ikagi diyà te otaw eg-ogpà kidoen, ‘Begayan se kedita niyo te kelinaw.’

⁶Na, aw mèpiya se pedowan te otaw eg-ogpà kidoen, begayan sikandin te kelinaw pineokit te kagi niyo. Meneng aw wedad otaw kidoen mèpiya se pedowan din, lomikò diyà kenyo se inikagi niyo.

⁷Ikà niyo eg-alin-alin, meneng peg-ogpà kaw kidoen te sebad olò balay. Kaen kaw aw inem kaw te pengkey eden se lemaken dan kenyo, so keilangan togpoan se otaw egterbaho.

⁸Pengkey kenan kaw doton, aw segmanen kaw te otaw kidoen, kaen kaw te pengkey eden se ipekaen dan kenyo.

⁹Pegpegolì kaw te otaw doen mesakit. Ikagi kaw diyà kandan, ‘Medapag den se peglowan te Timanem diyà kenyo.’

¹⁰Meneng aw eked kaw segmani te otaw doton te lonsod dotonan niyo, doton kaw te dalan aw ikagi kaw,

¹¹‘Pengkey napò te tanà niyo dimeket diyà te benis day, tektaken day den, amon ketegahan niyo te doen salà niyo. Keilangan metaga-taga kaw te medapag den se peglowan te Timanem diyà kenyo, meneng kimulu kaw kenyan.’

¹²Eneng-enengi niyo se kagi ko kenyo. Pengkey ipelumun te Timanem se tege Sodoma te modi aldaw tepad te salà dan ontò medaet, meneng labi din pa ipelumun se otaw eked pegsagman kenyo.”

¹³“Mekelelayò kaw tege Korasin. Mekelelayò kaw heman tege Bitsayda, so wedà kaw pegselsel. Aw impekità diyà te tege Tiro aw tege Sidon gebii se inang metolos impekità ko kenyo, nenaol den dan peden te sako aw migbodbod den dan peden te abo diyà te olo dan amon ipetaga-taga dan te migselsel dan te salà dan ontò medaet.

¹⁴Pengkey ipelumun te Timanem se tege Tiro aw tege Sidon, meneng labi kaw din pa ipelumun so wedà kaw pemenal kanak.

¹⁵Sikiyo tege Kapirnaom, pengkey meibeg kaw megpelangkaw-langkaw taman te langit, meneng idagdag kaw doton te kilot.”

¹⁶Minikagi heman si Jesus diyà te menge tinoledaan insogò din, “Aw menenalan se otaw diyà kenyo, siak heman se penenelanen din. Aw eked penenalan se otaw diyà kenyo, siak heman se eked din penenelani. Aw eked penenalan se otaw diyà kanak, eked din heman penenelani se Amay ko simogò kanak.”

¹⁷Nayan, penga te peg-olì te kepitowan teg dowa tinoledaan insogò i Jesus doton te kedita te lonsod, neluba dan, aw minikagi dan, “Pengolo, pengkey bosaw nebatog day impelowà pineokit te pegtawal day te ngadan nikaw.”

¹⁸Minikagi si Jesus, “Dimaeg kaw kandan so kinità ko se pegkedagdag i Satanas lekat te langit iling te kilem.

¹⁹Ikà niyo egkelibel kani. Doen tolos imbegay ko kenyo amon domaeg kaw te kedita te sakop i Satanas. Pengkey gìtan niyo se memokan aw doma mekeilo, meneng eked kaw elegi, so wedad palos meleg kenyo.

²⁰Meneng pengkey egdaeg kaw te menge bosaw, kenà niyan se ingkeluba niyo, meneng keilangan meluba kaw so insolat den te Timanem se ngadan niyo kidoen te langit.”