Lukas 10:4-20

⁴Ala pe a mene umtutuna ero pe a takis kole ero pe a mene lemo ae ulina e ero pule. Nenge teke a saolia mele hel nga kue ames ke a hele sakilil ero.

⁵Nenge teke ai teu nga pele e a hele tala ke pomai, ‘Non Palaungana na petanga tu luluch nge imo.’

⁶Nenge teke none nem na poinga urana pe purpure petanga nem lape lemo helenga urana ngana nem masio nge i ke nek. Pe nenge teke ero, lemo helenga urana ngana nemur lape haka mule nge imo.

⁷Atu mana nga pele elle nem ke a ngaungau pe a ininia utar nenge te tunge lala nge imo iange a ume lamam pe urumo laka. Pe ama lilis rara nga pele hel pule ero ol.

⁸Ala nga kileng e pe ai teu langa pele e pe a ngaua utar nenge te tunge lala nge imo.

⁹A hemas mule iri nenge aria haleles nga lamam pe a hele lange hehei pe hana ke a teke, ‘NeHalang nena naualanga urana toto ngana heroi taua imo lo.’

¹⁰Pe nenge teke a langa kileng e pe te ulo ele imo ai hot langa kue pe a heleia iri ke a teke,

¹¹‘Mo pasis sue lemo kileng ana maruchrue nga apemem ke a eteia nge NeHalang lemene ero toto ia lemo poinga poreke ngana mur. Imo letemo matana ke nek, NeHalang nena naualanga urana toto ngana at rochroi toto nge imo pe lememo ero ia lo!’

¹²E hele ke manmanna toto lange imo. Nga etue palaungana nem lape NeHalang letena porekeia kileng nenge Sotom pe lemo kileng ero!”

¹³“Imo nenge Korasin lape atu ngamo poreke toto! Pe imo nenge Petsaita lape a poreke toto pule! Iange NeHalang poia ure papalaungana nge imo ke a esia lo pe letemo manmanna ia ero. Pe toinge NeHalang poia ure papalaungana nemur nge Tir pe Siton lape iri te hulia reria poinga mur nga halang nike. Iri te henonou hote iri nge te hulia reria poinga poreke ngana mur ke pomai; te heronia hengeron muna hulu ngana pe te hepore singiria ana apou!

¹⁴Nga etue nenge NeHalang nau teu at nge ita elle pe elle nga rera poinga mur lape letena poreke ia iri nenge Tir pe Siton unne sune pe imo nem ero toto.

¹⁵Pe imo nenge Kapernam nenge a teke ala nga lut nga tapa. Lape te tamal sue imo ke ala nge sio toto nga kileng au ngana!”

¹⁶Iesus hele lange na hana mur, “Mele nenge longo taua imo longo taua iau pule pe mele nenge ulo ele imo ulo ele iau pule pe mele nenge ulo ele iau ulo ele I nenge kulosia iau at.”

¹⁷Hana iri ana non kina mol pe analoch pe nai (72) neu teat mule pe te iech toto. Pe te hele lange Iesus, “Non Soke, uneinei mur pule mo kulos hote iri nga iong em pe te longo tau mana!”

¹⁸Pe Iesus tuacholia lange iri, “E esia non poreke ngana nge losio at nga tapa ke pomanga kileng chalem ngana.

¹⁹A longo ke nek! Iau e tunge lek kerkerenga lange imo ke imo sipomo a poia ume nemur nenge pomai. Ai haka nga ilimo nenge te hunun pe a hekolkole iri. Pe ei mur nenge te hunun ita, lape apoia iri ke pomam pule. Pe a hekou sue lemo ngarang Non Poreke ngana nem nena kerkerenga. Pe ute pele nge heporeke imo ero.

²⁰Uneinei ne mur te longo taua imo pe a iech sakilil ero nge a mene kerkerenga palaungana nem. A iech toto mana nga emo nge tehas sue nga lut nga tapa.”