Luka 10:4-20

⁴Sungkoi, sungsa neh khokhom khaw khuen uh boeh, longpueng ah hlang kuttu uh boeh.

⁵Im te na kun thil uh coeng atah lamhma la, 'He im khuiah ngaimongnah om saeh,' ti na uh.

⁶Te ah te ngaimongnah kah a capa a om van atah nangmih kah ngaimongnah loh anih soah om ni. Te pawt koinih nangmih taengla koep ha bal bitni.

⁷Te dongah amah tekah im ah naeh uh, amih taengkah te ca uh lamtah o uh. Bibikung tah a thapang a dang hamla tueng pai. Im pakhat lamloh im pakhat la thoeih uh boeh.

⁸Khopuei te na kun uh thil tih nangmih te n'doe uh atah na taengah han tawn te ca uh.

⁹A khuikah tattloel te hoeih sak uh lamtah amih te, 'Pathen kah ram tah nangmih taengah yoei coeng,' ti nah.

¹⁰Tedae khopuei te na kun thil uh vaengah nangmih te n'doe uh pawt atah toltung ah cet uh.

¹¹'Na khopuei lamkah loh kaimih kho dongah tangdik aka kap te nangmih kan khoek uh thil coeng,' ti na uh. Tedae te nen te Pathen kah ram tah yoei coeng tila ming uh.

¹²Nangmih taengah ka thui, tekah khohnin ah Sodom te tekah khopuei lakah a phoeng la om ni.

¹³Anunae nang Khorazin, anunae nang Bethsaida, nangmih ah thaomnah aka om te Tyre neh Sidon ah om koinih, tlamhni neh hmaiphu dongah ngol uh vetih yut uh daengrhae pawn ni.

¹⁴Tedae laitloeknah khuiah Tyre neh Sidon te nangmih lakah a phoeng la om ni.

¹⁵Kapernaum nang te, vaan la na pomsang pawt nim? Tedae Hell la na cungpung bitni.

¹⁶Nangmih taengah aka hnatun long tah kai ol a hnatun tih, nangmih aka hnawt long tah kai ni n'hnawt. Tedae kai aka hnawt long tah ka tueih hlang te khaw a hnawt,” a ti nah.

¹⁷Sawmrhih panit tah omngaihnah neh mael uh tih, “Boeipa, nang ming nen tah rhaithae pataeng kaimih taengah boe a ngai uh coeng,” a ti uh.

¹⁸Te vaengah amih te, “Satan he vaan lamkah khophaa a tlak banglam ni ka hmuh.

¹⁹Rhul neh saelkhui-ta-ai khaw, rhal kah thaomnah boeih khaw cawt thil hamla nangmih taengah saithainah kam paek he. Te dongah pakhat nen pataeng nangmih te n'thae sak loengloeng boel saeh.

²⁰Tedae mueihla loh nangmih taengah boe a ngai dongah he omngaih uh boeh, vaan ah na ming a tarhit dongah mah omngaih uh,” a ti nah.