Ruku 10:4-20

⁴Tiretí ankan ída vá moní kain unan má ona khain unan má arantan anamun má bare vá oriyáke mae ída vá aasá ma esantanona nanin banta van bayan mino inúpá ino seno.

⁵“Oriyare ma mana namumpin ma oferante vá esé araí in baya vá máa seno, ‘Áesin Tiyarafenu ano vá tire antun ná ará kusin amino.’

⁶Mai namumpin ma mana ará kusin má bain banta ma vantin maen Tiyarafenui ará kusin mano mai vanta vá bei kéká bápin banten mifo máan banta ma ída vantin maen Tiyarafenui ará kusin mai vanta vá bei kéká bápin ída vanten mino.

⁷Tiretí ankan mai namumpin mana vá bákeya mai finté ma amin nain dunan má non má ana vá nano. Para vara seyo, yoriyá ein banta ano miyan baré iyan mifo siretí ankan ída vá ena namumpin e fere khuve ono.

⁸Máan tin nompo siretí ankan ma mana kákan barurá ma oresin ma kama iyáken aviren má naumpin ma mo kaúden ma amin nain dunan ná parav á nano.

⁹Tiretí ankan mai varu rákena aí nanin banta kayo ayofiyáke vá Tiyarafenui yafisin baru inka siretí ankani ádé erikhein mino seya vá betí tiameno.

¹⁰Tiretí ankan ma mana varufin oresin ma mai varuráké kéká ano ma ída e avían mápin ma kaintiya siretí ankan mai varui aasá o mantaveya vá máa seno,

¹¹‘Tiretí ankani varu rákena kayó ano setí ankan tirantantá dampakhein ma yo fúpá tian karúdanuna anon tiretí ankan aní iyáken mai avúavá ma vareona ano umei e ono’ se vá betin tiamiyákeya vá ‘Tiyarafenui yafisin baru inka ádé erikhen mifo siretí ankan kama e vá ineno,’ seya vá betí ankan tiameno.

¹²Téi siretí ankan tiamiyá uno. Banasi ma yaimin damú ma Tiyarafenu ano aní ukheintá ma afoká intin mai varu rákena nanin bantai uman mano Sodomú baru rákena nanin bantai uman esantanten mino.

¹³Máa semí, “Korasiníke nanin banta oe, sirun uron mi ke ono. Betsaidáke nanin banta oe, sirun uron mi ke ompo mana vanta ano ma Taiyá bá Saidoní bái varufin ma oriven máan avúavá daná ma mo afoká intin maen betí ankan kanaíen ará baéden arunaná auí daná uren amon ánompin kakhufaren kumanten betíi ume van arunan inté ein mino.

¹⁴Banté ein mifo Tiyarafenu ano ma vanasi yaiminton ma aní ukhein damú ma yákó intin tiretin amaniná ma afoká inain uman mano Taiya sú Saidoni úpin ma afoká ukhá ein uman moéken esantanten mino.

¹⁵Máan tinten mifo éi Kapeneamú baru oe, éin iye ano avían dan ayontá kainten nafino. Ída mana ano aviranten mifo pefá ma fúkein nanin bantai varufin manan aravin nono.”

¹⁶Máa siren Yisasi mai seventi-tu (72) vanta siamemí, “Tiretí ankani vaya ma iniyain nanin banta ano séinti vayan iniyan mifo inká tiretí ma oyan amiyain nanin banta ano mai séin mi oyan timiyan mino. Téin ma oyan timiyain nanin banta ano séin ma sisintá ererunan oyan amiyan mino.”

¹⁷Ínaimpáké seventi-tu (72) vanta ma siantan orikhá ein kéká ano ovaránen amusin iyan eriven me siamemí, “Bafan noe, setí ankan ma éin aví arékun maen namu aunan kayo ano setinti vaya ánain bákuren mino.”

¹⁸Máa síkan Yisasi vetí ankan evaránen tiamemí, “Téi onékun Ban Anon mano inaru me ampiren afayuí ma einíen eraven mino.

¹⁹Ineno. Téi siretí ankan inka ákona amikheruna sireti kanaíeya osafáe kayo vá banta untaran danasinta vá dasádeya siretí ankan kanaíeya siretíi namuro minó ákona esantaresin béi ída kanaíen tiretíi minó daná namu inten mino.

²⁰Máan tinten mifo siretí ankan ída vá amusin iyáke seya namu aunan mano setin too yaiyiyan mino seno. Inarufá ma Tiyarafenu ano ma vei vompon dókifin ma siretin aví uvantein nará amusin ono.