LUKA 10:4-20

⁴Wa nole bakir aisawem lugarapem, nole epeikak, a nole tetergablukak. Wa nole gabge bakowa le mir daratagrawem.

⁵Nade wa metage barotwa wage kikem detkartawem, “Mapodan gairleem muige able metage.”

⁶Ese able lelut mapodan lag waikerer ge wadawer, wabi mapodanira werkab ya abidoge wadawer. Ese able lelut nole mapodan lag waikerer, wage waba werkab ko abialam adem ikadarawem.

⁷Wa no ge able netat metage uridwa. Erwawem a iriawem nalu lu wi wabi wadaiswerawem, ableglam dorgele e sikak dali tabara bodomalam wairep. Ese wa bakiawawem nerut metalam nerut metaem, wage ko tabakomeretwa able metaem nade ya wa urder.

⁸Nade wa bakiawawem muige able utebge, able legize wabi wadirpawem, wi wabi lewer wadaiswerawem wage erwawem.

⁹Wa gimgim le ge nadgirawem able utebge, a able le ge daratagrawem, “Kotor Basalaya pe tabakiamuda wabim maikem.”

¹⁰Ese wa bakiawawem nerut utebge barotwa, a legize nole wabi wadirpawem, wage ko adem bakiawawem gabge bauswa a wage detautawem,

¹¹“Kiki wabi utebira pi kerbi teterlam adem etkaperdeda ko waba sirip obarkare. Agekar Agudira Basalaya pe tabakiamuda wabim maikem.”

¹²Kaka wabi detagreda, Keub Gergerge, Agudira omar pe aukakale ikeredi witwit leem Sodomira ya abra omar wadikereder leem able utebira.

¹³Wai Korazin! Wai Betsaida! Wabi legize ya asiasi wadigiare! Ese able etamilam ge bakerda muige wabidoge eipuge ge bakerda muige Tayage a Saidonge able le pe turidli wi no obamri tabara okasosok wali wamida a tababu tibiu obatimwareda ko merbi waditomerteda wi taba witlam tabatareda!

¹⁴Keub Gergerge Agudira omar ya Taya a Saidon leem aukakale waikereder ya abra omar wabi leem wadikereder.

¹⁵Marim Kapanam! Nako ma laglag nali mari kotorem nagisrare? Mari ya adem wataratimdare Asiasi Utebem!”

¹⁶Iesude eudige tabara memegle daratagerda, “Netide wabi wadasorlare wi kari ko wanasorlare. Netide wabi detwakeda wipe kari ko natwakeda. Netide kari natwakli epe Agudi ko detwakli ge kari taramarikda.”

¹⁷Nade able 72 le tabakomerti wige au sererge urder. Wi detautlare, “Ople keriba aukaka sasrim nagri able demonide ko kerbi dasreda nade ki mari neige ki yabi au kelarkelar daratagreda!”

¹⁸Iesude eudige yabi nakerda, “Ka Satanai geka dasmerer e takesmeri kotorlam mokakalam perper.

¹⁹Wa asrare! Ka wabi kelar daiswerda ya wayakai wa umele wabi teteru tabo a bokani daraskimelare, a wader sasrimsasrim lu pa Kurablera daragriwerteda, a umerkak wabi nalugide ya wabi wadireslare.

²⁰Wa nole sererge uridwa ableglam wabi adud lamargize wabi dasorlare. Wa sererge uridwa ableglam waba nei inoko kotorge taraisirwerteda.