Luk 10:4-20

⁴Gong mot los tu paus na umubek mani, gong tu rat, ma gong tu su. Gong kai mot wasiso taio ra mot etoromi una kisapi.

⁵“Ra mot in nanpat tiro un tu rumu, mot in inanos mugu det lena, ‘A malmal torom mot.’

⁶Ra tu tene malmal in kis tiro iai, anumot a malmal in kis uni. Ra awu, anumot a malmal in milet melet torom mot.

⁷Mot in kis ut tiro iai una rumu ra, mot in nangon ma mot in inum una utna ra di tabor mot nami, uni i tokodos sur din tabor a tene pinapam. Gong mot inep karkarai.

⁸“Ra mot in nanpat un tu tamon, ma din ben ruk mot, mot in nan a utna ra di tabor mot nami.

⁹Mot in ulangolango a kum misait tiro iai, ma mot in inanos tar a taro lena, ‘A matanitu anun o God i sa milau nisamot!’

¹⁰Ra mot in nanpat un tu tamon, ra ka di ben ruk mot, mot in tur kut una kisapi ma mot in watungi lena,

¹¹‘A kubus tagun anumot a tamon, ra kuri una kum kikimet, met tang melet ru i sur a utumarong torom mot. Ikut mot in tasmani lena, a matanitu anun o God i sa milau.’

¹²A watungi tamot, una bung na warkurai, a warkurai torom a tamon ra, in laulau doko taun a warkurai torom a taro Sodom.

¹³“In laulau torom mot a taro Korasin, ma in laulau kai torom mot a taro Betsaida. Ra gunuk di sa pam tar a kum utna na ukisin ri torom a taro Tair ma o Saidon, elar nami ra a sa pam tari torom mot, kanapi det in nukpukus lakit ma det in tobo, det in emar nama kum malu na tupunuk ma det in talus a pinindet nama kubus na sungun. Ikut mot, ka mot nukpukus.

¹⁴A warkurai torom mot a taro Korasin ma o Betsaida, in laulau doko taun a warkurai torom a taro Tair ma o Saidon.

¹⁵Ma mot kai a taro Kapernaum, pepetlai, mot nuki lena din ulabo pas mot usapat netes? Awu, din woro pirso ru mot kut una labino sungun.

¹⁶“Osi ra in longoro mot, i longoro iau ut. Ma osi ra in rosumur gusun mot, i rosumur gusun iau utkai. Ma osi ra i rosumur gusun iau, i rosumur utkai gusun o naro ra i tulu ru iau urin.”

¹⁷A wonom mawit na noino ma aru det milet melet nama gasgas ma det watungi lena, “Labino, ra met lakro ru a kum laulau na nion nama risam, det pirso kut.”

¹⁸O Iesu i watungi tandet lena, “A tama o Satan i puku tagisapat una langit elar namin nememe.

¹⁹Tama i, a sa pitar tar a dekdek tamot sur mot in pas watwat a kum sui ma a kum bukalo kai, ma sur mot in winim pas a dekdekin a ebar, ma katu utna in ban laulau mot.

²⁰Ikut, gong mot gas, uni a kum laulau na nion det mur anumot a wasiso. Mot in gas, uni di sa tumus tar a risamot sapat una langit.”