Luka 10:4-20

⁴Moni tobona, eo tobo, eo aeum tabu au laedi: eo dobila eai tabu tau esau au lautoiei.

⁵Ena numa esau, esau, au awasae alodi eai, au riba baguna, au ene, ‘Loni bena ai tore numa eai ta!’

⁶Ena loni natuna esau metai ie bawa, emi loni arinai i ota: ena nige’e, emi loni abo au abiuioi.

⁷Meta numa me arinai au mia, ena aisadi, aisadi, se lediwa au ai eo au ainom: paana i lolo taupaisoa maisana se mosei. Tabu au lau hari numa, hari numa.

⁸Eo ena eanua esau, esau, aue lage aridi eai, ena se eogaisinimiu, aiai aisadi, aisadi, se peiauri matamiu eai, au aiai:

⁹nei eanua tataodi se asiebo au hemauridi, au ribalau aridi eai, au ene, ‘Eaubada ena basileia ie lagemao, i hanahanauimiu.’

¹⁰Ena eanua esau, esau, aue lage aridi eai isi nige se eogaisinimiu, au lau edi baubau dobiladi eai, au heribadi, au ene,

¹¹‘Emi eanua geregeredi se patuimai, abo ai saugabaedi, abahegirumiu: taiede, riba mamohoina ede au nuatui, Eaubada ena basileia i lagemao, i hanahanauimiu.’

¹²Na ea heribamiu ta, nei asubenana ne, Sodoma abo si ene nige se baaea ariri, doha meta eanua me.

¹³“Korasina kapore oa! Betesaida, kapore oa! Ena Turo eo Sidona aridi eai laulau gigiboridi se ginauridi doha se ginauri arimiu eai beabeaaririna eai wa nuadi se buidio; se babawa baeki se luidi, eo ahu eai se heahudi.

¹⁴Hedudurai asubenana eai Turo eo Sidona abo nige se baaea doha omi.

¹⁵Oa Kaperenauma hinage, se lauisinim galewa ewana eai, hade eai abo se gabadobem.

¹⁶“Ia ena arinamiu i ataiei: arinagu hinage i ataiei: ia ena i isugaraemiu, eau hinage i isugaraegu; ia ena i isugaraegu, ia tau hetamariguma hinage i isugaraei.”

¹⁷Tatao tatao‐haiona‐se‐mate‐saudoudoi wa se uioma, ma kodedi si ene, “Guiau e, demoni hinage oa esam debana eai arinamai se ataiei.”

¹⁸Ie ribalau aridi eai, i ene, “Satani ea ita doha namanamari, galewa eai i beuma.

¹⁹Gigibori ea lediwa arimiu eai gaganadenadewa aemiu eai au ututawaidi, eo waiununa ena gigibori gamagaridi emi gigibori abo i saetawatawai: eo taba nige ginauri esau abo i hebaaeamiu.

²⁰Taiede tabu au kode paana earua baabaaeadi wa arinamiu se ataieyao; au kode mo paana galewa eai esamiu se uridio.”