1Âgo bureŋ, Mâroraonec miti kadahe irec fuŋne kâuc banʒipiŋte ŋazape mananiŋ.
2Ŋoŋe mârâc jaha qâpuc juhapie maŋʒoc fua‐ŋarewec sâc nemuɋâŋ kâpâne jaŋerao ra qohota jumbieŋ.
3Eme irec ŋifecne mupe mananiŋ: Moc e Anuture Mârozi bufahac qacnehame wemocko muocmu “Jesu go sâwecgukopac”, â moc e Tiri Mârozi bufahac mi qacnehame wemocko muocmu “Jesu e Wofuŋ”.
4Mitire kadahe fuŋne fuŋne fokac, Mâro ine mocjaha,
5mitire kiŋaŋ gie fuŋne fuŋne fokac, gie rune ine Wofuŋ mocjaha,
6mitire tâpiri fuŋne fuŋne fokac, tâpiri rune ine Anutu mocjaha. Eki hâcne bâfua‐nâre‐fâreekac.
7Mâro e mitio juhâmonaŋte ŋic ru sâc tâpiri‐ticne kâdoc qanâreekac.
8Moc e Mârozi ecneme miti maŋɋârâŋhec muocmu, moc e Mâro izia ecneme sâc mitire fuŋne hukicne muocmu,
9moc e Mâro izia ecneme mamanasiŋ sâkohec juocmu, moc e Mâro izia ecneme ŋic huc ʒâichec ɋiɋicne bacjopaocmu,
10erâ moc mâsi baocte tâpiri bâfuacneocmu, moc findaŋdâŋ muocte maŋne bâuŋtoocmu, moc e mâro fuŋne fuŋne ʒâŋitaocte maŋne batamaeocmu, moc e miti marac furuo muocte micne baafeckeocmu, moc e miti marac furu manarâ ŋic dâŋjeŋicko bâtikieocte bafickeocmu.
11Wiac i sasawa Mâro izia bafâreekac, ehuc maŋticnere ŋic ru sâc wiac bârâwiŋne‐nâreekac.
12Ŋic nâŋâc sahac‐nâŋeczi mocjaha â sahacte kiŋaŋ qaqafâc ine bocjaha, eme jaŋe bocjahazi qâturepie sahac mocjaha ekac; eme Kristorao sâc ijaha fokac.
13Mâro mocjahazi nâŋâc Miti Opâo bâturec‐nâpome sahac‐nâŋecte sâc erâ mocjaha embeŋ. Judaŋic â Grikŋic, kiŋaŋ qaqa â ŋicbomboŋ, nâŋâc Mâro ijaha sasawa ro maŋ efârekicnere mocjaha embeŋ.
14Eme sahacte kiŋaŋ qaqa iŋuc jaha mocjaha mâcne, bocjaha.
15Eme kike e wemocko ʒiŋuc muzac: “No me aricne, irec sahacte tofa mi ekopac”, iŋuc murâ wemocko sahac beherâ buc juocmu?
16Me hazeczi wemocko ʒiŋuc muzac: “No ʒâŋe aricne, irec sahacte tofa mi ekopac”, iŋuc murâ wemocko sahac beherâ buc juocmu?
17Sahacko ʒâŋe sasawa fome muzac sahaczi hazec basazac. Me hazec sasawa fome muzac sâke basazac.
18Anutu e ine mana tarahuc sahacte kiŋaŋ qaqa gie fuŋne fuŋne mujarewec.
19Sahacte kiŋaŋ qaqa fuŋne‐jeŋic mocjaha efâreme muzac sahac e sâqorerâ arictac ezac.
20Ʒi ine kiŋaŋ qaqazi bocjaha â sahaczi mocjaha.
21Eme ʒâŋezi wemocko me âzâcneocmu, “No go tâmiric sâcne jupemu.” Me qizeczi wemocko kike jasaocmu, “No ŋohe tâmiric sâcne jupemu.”
22Aricne, sahac‐nâŋecte tofafâc dodocne jaŋe tâmiric hâcne sâcne mi juzo.
23Â sahac‐nâŋecte tofafâc wawahane jaŋe hâcne hone jauŋ ejareeŋgopeneŋ, â miminehec jaŋe foŋjopapene biaŋne hawari eeŋgopieŋ.
24Hawari biaŋ jaŋe ine tâtâc foeŋgopieŋ. Anutu e sahac bâfuahuc tofafâcne gâcne wahakicne jaŋe gie fekicne mujarewec.
25I sahac‐nâŋecte tofafâc fâfâuc mi ehuc kiŋaŋ qaqac sâckoa eniŋte iŋuc hâcne ewec.
26Irec tofane moczi ʒâic maname gâcne jaŋe mâmâc mana‐fâreniŋmu, me moczi ʒeri eme gâcne mâmâc ʒeri efâreniŋmu.
27Ŋoŋe mâmâc sâko qâturerâ Kristore sahac eŋgopieŋ â buc buc sahac‐ticnere kiŋaŋ qaqafâc eŋgopieŋ.
28Anutu e kikefuŋfâc‐ticne nâŋâcnao ŋic ʒiŋuc râec‐jopawec: Qanaŋ aposolo, izi porofete, izi qaqazu, erâ ŋic mâsi bapare tâpirihec â ŋic huc ʒâic bâbâpiaŋ irec tâpirihec, erâ jauŋ bapa, erâ soŋaŋ, erâ dâŋ marac furuo mumu, iŋuc hâcne râec‐jopawec.
29Nâŋâc aposolo sasawa râec‐nâpowec me? Me porofete me qaqazu sasawa râec‐nâpowec me? Me mâsi bapare tâpiri
30me huc ʒâic bâbâpiaŋ irec tâpiri fonâre‐fârekac me? Me dâŋ marac furuo mumu me ŋic dâŋjeŋicko bac bâtikic eene jufâreŋgopeneŋ me?
31Ŋoŋe mitire kadahe fekicne bâfuaniŋte ʒoɋac enʒepieŋ. Eme noni irec hata biaŋne jâmbâŋ ʒi ŋowatupe honeniŋ.
