Korinti I 13

1

2

3

4

5

6

7

8

9

10

11

12

13

14

15

16

¹No ŋicmaracko me aŋelo maracko miti muzapo, ehuc maŋjauŋ tâmiric juzapo, ine qeŋ goŋgoŋ iŋucne erâ dâŋ fânâŋ sawa ezapo.

²Me no porofete juhuc dâŋ soŋne mana‐fârezapo â mitire ʒuhucne mana utucke‐fârezapo â tiki mupe rârieocte irec sâc mamanasiŋ fonarezac, ehuc maŋjauŋ tâmiric juzapo, ine ŋic jawane ezapo.

³Me wiac‐nane sasawa hapetac bâmec bajarezapo â sahac‐nane qikiŋnepe ʒocte nânâ ezac, ehuc maŋjauŋ tâmiricko ezapo, ine racne efârezac.

⁴Maŋjauŋheczi wama ruaine juocmu, maŋjauŋheczi iiŋguuŋ mi eocmu, maŋjauŋheczi penaroŋ mi eocmu, e jahacnere maname fefene mi eocmu;

⁵e ʒaubac tâmiric, iiriac tâmiric, aaric tâmiric, kiŋ babaju tâmiric juocmu;

⁶e sâqocnezi haŋ bame busâqoc manaocmu, â mitizi haŋ bame bubiaŋ manaocmu;

⁷maŋjauŋhec e dede ââsic‐ticne ɋârâŋne, mamanasiŋ‐ticne ɋârâŋne, maŋzi woworic‐ticne ɋârâŋne, maŋuruc‐ticne ɋârâŋne.

⁸Maŋjauŋ i tatarane tâmiric. Findaŋdâŋ mumu i tataranehec, erâ dâŋ marac furuo mumu i wâc tataranehec, â fuŋne mamana i wâc tataranehec.

⁹I ʒiŋucte: Fuŋne mamana‐nâŋec i faisuc â findaŋdâŋ mumu‐nâŋec i faisuc jaha wâc.

¹⁰Juku ine wiac fofo dunduŋne fuame wiac faisuc eenezi omaezokac.

¹¹No ɋiene juhuc ɋiedâŋ mujupac â ɋiemaŋhec jujupac â ɋie mamana mana jupac. Izi juku ŋic erâ ɋie wiac hetarapo.

¹²Dameŋ ʒiŋuczia wiac honeeŋgopeneŋ i turuŋzi hawari bâtikie‐nâreme sisifucne honeeŋgopeneŋ irec sâc, juku ine fârine ʒâŋeo hehec erâ hone mana tarac ezokopac, i Wofuŋzi no hone mana tarac enarewec irec sâc.

¹³Eme fofo sanaŋ foniŋmu ine mamanasiŋ, woworic â maŋjauŋ, jaŋe jahec â moczi. Maŋjauŋzi ine micne ekac.