Korinti I 4

1

2

3

4

5

6

7

8

9

10

11

12

13

14

15

16

¹Ŋoŋe nâŋere manapie Kristore kiŋaŋ qaqa â Anutu boreŋ ʒeŋaŋ‐ticnere soŋaŋ ezejec.

²Eme soŋaŋ e ine metâne juocte mucnekicne.

³Erâ no nahacnere mupe: Ŋoŋe me ŋic tutumaŋ moczi nore dâŋ muniŋmu i manape fârine mi eocmu. Erâ no nahac wâc fuŋne‐nane sâcne mi mupemu.

⁴No bahac‐nane moc mi manakopac, erâ irec bahacmâc jukopac mi muzo. Nore fuŋne babataniŋ mocjaha jukac, Wofuŋ hâcne.

⁵Irec ŋoŋe fuŋne babataniŋte fâro mi enʒepieŋ. Wofuŋ e jahac fisirâ wiac soŋsoŋ fokac i wâc hewirickeocmu, â ŋicmaŋko wiac fokac i mâmâc bâfua‐fâreocmu. Eme Anutuzi ŋic sasawa sâcjeŋic manahuc mumbiaŋ‐jopaocmu.

⁶Âgofâc, dâŋ mukopac i Apolo â no nâhe nâhâcnao iticnehuc mukopac. Eme ŋoŋe nâherao fuŋne kecʒiŋuc honehuc mana taranʒepieŋ: Mitidâŋko sâc mukicne i mi jâuruhuc wiac efezo â mâreŋŋic bafec bawahac enârehuc maŋfefe mi ezo.

⁷Me go ŋiczi wiac hezu hegareniŋte mozi mugarewec? Me go wiac fogarekac i wenimoi gare tahac mi ekicne? Aricne, i gare tahac efârekicne, eme go wemocte manatec mi garekicne tinac eme sahacge bafeekic?

⁸Ŋoŋe ine biac gapec‐ŋopakicne, biac mâriri sâkohec embiŋ juŋgopieŋ, nâŋe tâmiric ŋicwofuŋ embiŋ juŋgopieŋ. Jâmbomac ŋicwofuŋ enʒapiŋ me, ehuc hefârec‐nâpopie ŋoŋerao ʒuhuckehuc ŋicwofuŋ jaha enʒapeŋ.

⁹No manape Anutuzi aposolo nâŋe ŋic jawane jaŋere guruo râec‐nâpowec ekac, ʒikare biŋe ekicne tinac. Mâmâc sâko, aŋelo mecne ŋic mecne, honec‐nâpopie mamakucne eeŋgopeneŋ hâcne.

¹⁰Nâŋe Kristore erâ ŋic mutucne embeŋ, ŋoŋe ine Kristorao ʒuhuckerâ mamana sâkohec embiŋ, nâŋe gegec dodocne, ŋoŋe ine sasanaŋhec, ŋoŋe fekicne, nâŋe ine waha qaqane.

¹¹Nâŋe nânâ opâre hâmo sipiric embeŋzi eeŋgopeneŋ, erâ ŋaqi tâmiric â ʒika faio â fic hae tâmiric jumbeŋzi juŋgopeneŋ.

¹²Â wiac piticne hotâckenaŋte nâŋe nâŋâcne mezi gie baeŋgopeneŋ. Musoriŋ‐nâpohapie jambuŋ‐jopaeŋgopeneŋ, fific guguriŋ enârehapie mana urueeŋgopeneŋ.

¹³Musâqorec‐nâpohapie mu bâmiriŋ ejareeŋgopeneŋ, nâŋe ŋic mâmâc sâko jaŋere jawa sânʒâŋ tinac jumbeŋzi juŋgopeneŋ hâcne.

¹⁴No mimi qaqa eŋarepere mâcne, no naru motecfâc‐mae ŋoŋe uŋ sawaŋ eŋarehuc dâŋ ʒi qâreŋkekopac.

¹⁵Kristoo wiʒecfâc‐ŋeŋic guruhec juŋareŋgopieŋ mecne, â mamac ine wemocko bocjaha juŋarenʒapiŋ, Kristo Jesure erâ Biŋebiaŋ ŋazahuc no mocjahazi mamac‐ŋeŋic epo jukopac.

¹⁶Eme irec nore kike hata bâjâpehuc juniŋte hazec qâuŋ ŋazape mananʒepieŋ.

¹⁷No irec erâ hâcne Timoteo, Wofuŋko motec biaŋ‐mae junarekac, e ŋoŋerao sorepe fakac, fârâ no Kristore miti hata kikefuŋ hae sâc jaza jowatuc eekopac i manasu‐ŋareme mananʒepieŋ.

¹⁸Ŋoŋeraonec gâcnezi e mi wareocmu, nore iŋuc muhuc mukac mupe embiŋ.

¹⁹No ine Wofuŋzi maname sâckeme mi ʒoraha ŋoŋerao fâpemu, fârâ mukac mupe eeŋgopieŋ jaŋe dâŋjeŋicte mi muhuc tâpiri‐jeŋicte fuŋne bataniŋkepemu.

²⁰Anuture miti hata i dâŋko mâcne, sasanaŋko fua taniŋkeekac.

²¹Eme ŋoŋe nore weniŋuc muŋgopieŋ? Kâcbiŋhec fâpemurâ muŋgopieŋ, me maŋjauŋ â buuruchec fâpemurâ muŋgopieŋ?